ദുബൈ വിമാനത്താവളത്തിലെ ‘സ്മാ​ർ​ട്ട് റെ​ഡ് കാ​ർ​പെ​റ്റ് ' വൻ ഹിറ്റ്

ദുബൈ: ദു​ബൈ അ​ന്താ​രാ​ഷ്ട്ര വി​മാ​ന​ത്താ​വ​ള​ത്തി​ലെ ‘സ്മാ​ർ​ട്ട് റെ​ഡ് കാ​ർ​പെ​റ്റ് കോ​റി​ഡോ​റി’​ന് മികച്ച പ്രതികരണം. എ​മി​ഗ്രേ​ഷ​ൻ ന​ട​പ​ടി​ക​ൾ വേഗത്തിലാക്കാൻ വേണ്ടിയാണ് അധികൃതർ ഈ മാർഗ്ഗം അവതരിപ്പിച്ചത്. യാത്രക്കാർ ഒരു പ്രത്യേക പാതയിലൂടെ കടന്നു പോയാൽ വളരെ പെട്ടെന്ന് എ​മി​ഗ്രേ​ഷ​ൻ ന​ട​പ​ടി​ക​ൾ പൂ​ർ​ത്തി​യാ​ക്കാ​ൻ കഴിയും.

കൂടുതൽ യാത്രക്കാർ ഇപ്പോൾ റെഡ് കാർപെറ്റ് ഉപയോഗിക്കാൻ തുടങ്ങിയതായി ജി ഡി ആ​ർ എ​ഫ് എ ദു​ബൈ മേ​ധാ​വി ല​ഫ്. ജ​ന​റ​ൽ മു​ഹ​മ്മ​ദ്‌ അ​ഹ്‌​മ​ദ്‌ അ​ൽ മ​ർ​റി പറഞ്ഞു.

‘സ്മാ​ർ​ട്ട് റെ​ഡ് കാ​ർ​പെ​റ്റിലൂടെ കടന്ന് പോകുമ്പോൾ തന്നെ നിർമ്മിത ബുദ്ധി നിങ്ങളെ തിരിച്ചറിയുകയും തുടർ നടപടികൾ പൂർത്തിയാക്കുകയും ചെയ്യും. അത്യാധുനിക സ്കാനിംഗ് സാങ്കേതികവിദ്യകൾ, മുഖം തിരിച്ചറിയൽ (Face Recognition), സ്മാർട്ട് സെൻസറുകൾ എന്നിവ റെ​ഡ് കാ​ർ​പെ​റ്റിന്റെ ഇരുവശത്തും സജ്ജീകരിച്ചിട്ടുണ്ട്. അവയുടെ പ്രവർത്തനമാണ് നടപടികൾ വേഗത്തിലാക്കാൻ സഹായിക്കുന്നത്.

ഒ​രാ​ളുടെ യാത്ര നടപടികൾ പൂർത്തിയാക്കാൻ ശ​രാ​ശ​രി 6 മു​ത​ൽ 14 സെ​ക്ക​ൻ​ഡ് വ​രെ മാ​ത്ര​മേ ആവശ്യമായി വരുന്നുള്ളു. ഒരേ സമയം പത്ത് പേരുടെ ഇമിഗ്രേഷൻ നടപടികൾ പൂർത്തിയാക്കാൻ കഴിയും. പുതിയ സംവിധാനത്തിലൂടെ വിമാനത്താവളത്തിലെ തിരക്ക് കുറയ്ക്കാൻ സാധിക്കുമെന്നും യാത്രക്കാർക്ക് മികച്ച അനുഭവം ഒരുക്കാൻ കഴിയുമെന്നും എയർപോർട്ട് അധികൃതർ പറഞ്ഞു.