ഈ റോഡിൽ വേഗം കുറയ്‌ക്കരുത്; പിഴ നല്‍കേണ്ടി വരുമെന്ന് ദുബൈ പൊലീസ്

ദുബൈ: അതിവേഗ പാതയിലൂടെ വാഹനങ്ങൾ വേഗം കുറച്ചു ഓടിക്കുന്ന ഡ്രൈവർമാർക്കെതിരെ കർശന നടപടി സ്വീകരിക്കുമെന്ന് ദുബൈ പൊലീസ്. വേഗതയിൽ വരുന്ന വാഹനങ്ങൾക്ക് തടസം സൃഷ്ടിക്കുന്ന തരത്തിൽ വാഹനമോടിക്കുന്നതും കുറ്റകരമാണ്. ഈ രണ്ട് നിയമലംഘനങ്ങൾക്കും 400 ദിനാർ വരെ പിഴ ചുമത്തുമെന്നും പൊലീസ് അറിയിച്ചു.

അതിവേഗ പാതയിൽ വളരെ പതുക്കെ വാഹനമോടിക്കുന്നത് മറ്റ് ഡ്രൈവർമാരെ ആശയക്കുഴപ്പത്തിലാകും. പ്രത്യേകിച്ച് പിന്നാലെ വരുന്ന വാഹനങ്ങൾ അമിത വേഗത്തിലാണെങ്കിൽ പെട്ടെന്ന് ട്രാക്ക് മാറ്റാൻ ശ്രമിക്കുകയും വാഹനങ്ങൾ തമ്മിൽ കൂട്ടിയിടിച്ചു അപകടം ഉണ്ടാകുകയും ചെയ്യും. ഇതൊഴിവാക്കാൻ ഡ്രൈവർമാർ പ്രത്യേകം ശ്രദ്ധ പുലർത്തണമെന്ന് ദുബൈ പൊലീസിലെ ജനറൽ ട്രാഫിക് വകുപ്പിന്റെ ആക്ടിങ് ഡയറക്ടർ  ജുമ സലിം ബിൻ സുവൈദാൻ പറഞ്ഞു.

വേഗത കുറച്ചു പോകുന്ന വാഹനങ്ങൾ വലത് ലെയിനിൽ തുടരുകയും വേഗത്തിൽ പോകുന്നവരും ഓവർടേക്ക് ചെയ്യുന്നവരും ഇടത് ലെയിൻ ഉപയോഗിക്കണമെന്നും അദ്ദേഹം അഭ്യർത്ഥിച്ചു. അടുത്തിടെ സംഭവിച്ച അപകടങ്ങളിൽ പ്രധാന കാരണം വാഹനത്തിന്റെ വേഗത കുറച്ചതാണെന്ന് കണ്ടെത്തിയതിന്റെ അടിസ്ഥാനത്തിലാണ് ഗതാഗത നിയമം ഓർമ്മപ്പെടുത്തി അധികൃതർ രംഗത്ത് എത്തിയത്.