ഈ ഒരു നിയമം അറിഞ്ഞിരുന്നാൽ 400 ദിർഹം പിഴ നൽകേണ്ട; 2 സെക്കന്റ് നിയമം എന്നാൽ എന്ത്?

ദുബൈ: റോഡിലൂടെ വാഹനമോടിക്കുമ്പോൾ മുന്നിൽ പോകുന്ന വാഹനവുമായി നിശ്ചിത അകലം പാലിക്കണമെന്ന് ഓർമ്മപ്പെടുത്തി ദുബൈ പൊലിസ്. ഈ ട്രാഫിക്ക് നിയമം പാലിക്കാതെ വാഹനമോടിച്ചാൽ 400 ദിർഹം പിഴയും, നാല് ബ്ലാക്ക് പോയിന്റും ഡ്രൈവറുടെ മേൽ ചുമത്തും. 30 ദിവസത്തേക്ക് വാഹനം പിടിച്ചെടുക്കുമെന്നും ദുബൈ പൊലീസ് അറിയിച്ചു.

വാഹനങ്ങൾ നിശ്ചിത അകലം പാലിക്കുന്നുണ്ടോ എന്ന് കണ്ടെത്താൻ എ ഐ ക്യാമറകൾ ഉപയോഗിച്ചുള്ള പരിശോധനയും നടത്തുന്നുണ്ട്. നിയമം ലംഘിക്കുന്നവർക്കതിരെ കർശന നടപടി സ്വീകരിക്കുമെന്നും പൊലീസ് വ്യക്തമാക്കി. ഈ നിയമം പാലിക്കുന്നത് വഴി അപകടങ്ങൾ കുറയ്ക്കാനും റോഡ് ഉപയോഗിക്കുന്ന മറ്റുള്ളവരുടെ സുരക്ഷ ഉറപ്പാക്കാൻ കഴിയും.

ഷെയ്ഖ് സായിദ് റോഡ്, അൽ ഖൈൽ റോഡ്, എമിറേറ്റ്സ് റോഡ് എന്നിവിടങ്ങളിൽ വ്യാപകമായി ഡ്രൈവർമാർ ഈ നിയമം ലംഘിക്കുന്നതായും അധികൃതർ കണ്ടെത്തിയിട്ടുണ്ട്. മുന്നിലൂടെ വലിയ വേഗതയിൽ സഞ്ചരിക്കുന്ന വാഹനങ്ങൾ പെട്ടെന്ന് ബ്രെക്കിട്ടാൽ പിറകിൽ വരുന്ന വാഹനങ്ങൾ കൂട്ടിയിടിക്കാനും അപകടം ഉണ്ടാകാനും സാധ്യതയുണ്ട്. ഇത് ഒഴിവാക്കാൻ 2 സെക്കന്റ് നിയമം എല്ലാവരും പാലിക്കണമെന്നും പൊലീസ് അഭ്യർത്ഥിച്ചു.

എന്താണ് 2 സെക്കന്റ് നിയമം ?

നമ്മൾ സഞ്ചരിക്കുന്ന വാഹനം മറ്റു വാഹനങ്ങളുമായി നിശ്ചിത ദൂരത്തിലാണോ ഉള്ളതെന്ന് കണ്ടെത്താനുള്ള മാർഗ്ഗമാണ് 2 സെക്കന്റ് നിയമം.

1. ഇതിനായി ആദ്യം നിങ്ങളുടെ മുന്നിൽ കാണുന്ന നിശ്ചിത ദൂരത്തിലുള്ള ഒരു പോസ്റ്റ്, സൂചന ബോർഡ്,മരം എന്നിവ ഒരു പോയിന്റ് ആയി മനസിൽ കരുതുക

2. മുന്നിലുള്ള വാഹനം നിങ്ങൾ മനസിൽ കണ്ട ആ പോയിന്റ് കടന്നു പോകുമ്പോൾ മുതൽ മനസിൽ എണ്ണാൻ ആരംഭിക്കുക.

3. രണ്ട് സെക്കൻഡിനുള്ളിൽ നിങ്ങൾ ആ പോയിന്റ് കടന്നു പോയാൽ നിങ്ങളുടെ വാഹനം നിശ്ചിത ദൂരത്തിലല്ല എന്ന് മനസിലാക്കാം. അതനുസരിച്ച് നിങ്ങളുടെ വാഹനത്തിന്റെ വേഗത കുറയ്ക്കുക.