ലഗേജുമായി അലയേണ്ട, വീട്ടിലിരുന്നു ചെക്ക്-ഇൻ ചെയ്യാം; പുതിയ സംവിധാനവുമായി ഷാർജ

ഷാർജ: യാത്രക്കാർക്ക് മികച്ച യാത്രാനുഭവം ഒരുക്കുന്നതിനായി ഷാർജ രാജ്യാന്തര വിമാനത്താവളം പുതിയ ‘ഹോം ചെക്ക്-ഇൻ’ (Home Check-In) സേവനം അവതരിപ്പിച്ചു. ഇതിലൂടെ യാത്രക്കാർക്ക് വീടുകൾ,ഹോട്ടലുകൾ, ജോലിസ്ഥലങ്ങൾ എന്നിവിടങ്ങളിൽ നിന്ന് തന്നെ ചെക്ക്-ഇൻ നടപടികൾ പൂർത്തിയാക്കാൻ കഴിയും. പുതിയ സംവിധാനത്തിലൂടെ സമയം ലാഭിക്കാനും യാത്രാ സമ്മർദ്ദം കുറക്കാനും കഴിയുമെന്ന് അധികൃതർ വ്യക്തമാക്കി.

യാത്രക്കാർ പറയുന്ന സ്ഥലങ്ങളിൽ ഷാർജ എയർപോർട്ടിലെ പ്രത്യേക ടീം എത്തും. അവർ ലഗേജ് ശേഖരിച്ച ശേഷം തൂക്കം പരിശോധിച്ച് ടാഗ് പതിപ്പിക്കുകയും ബോർഡിങ് പാസ് നൽകുകയും ചെയ്യും. ഇതോടെ യാത്രക്കാർ വിമാനത്താവളത്തിൽ എത്തിയാൽ ഇനി ക്യൂവിൽ നിൽക്കേണ്ട ആവശ്യമില്ല.

നേരിട്ട് പാസ്പോർട്ട് കൺട്രോളിലേക്കോ സുരക്ഷാ പരിശോധനയ്ക്കോ പോകാം. കുട്ടികളോടൊപ്പം യാത്ര ചെയ്യുന്ന കുടുംബങ്ങൾക്കും ബിസിനസ് യാത്രക്കാർക്കും ഈ സംവിധാനം ഏറെ പ്രയോജനകരമാകുമെന്ന് അധികൃതർ അറിയിച്ചു.

സേവനം ബുക്ക് ചെയ്യാൻ SHJ Home Check-In മൊബൈൽ ആപ്പ്, ഔദ്യോഗിക വെബ്സൈറ്റ്, അല്ലെങ്കിൽ കോൾ സെന്റർ (800745424) വഴിയും അപേക്ഷിക്കാം.
പാക്കേജുകളും നിരക്കുകളും ഇങ്ങനെ

• കോറൽ പാക്കേജ് (1–2 ബാഗുകൾ) – 145 ദിർഹം

• സിൽവർ പാക്കേജ് (3–4 ബാഗുകൾ) – 165 ദിർഹം

• ഗോൾഡ് പാക്കേജ് (6 ബാഗുകൾ വരെ) – 185 ദിർഹം

വിമാനം പുറപ്പെടുന്നതിന് കുറഞ്ഞത് എട്ട് മണിക്കൂർ മുമ്പ് ബുക്കിങ് പൂർത്തിയാക്കണം. നിലവിൽ സേവനം ഷാർജയിലെ തിരഞ്ഞെടുത്ത പ്രദേശങ്ങളിൽ മാത്രമാണ് ഉള്ളത്. എന്നാൽ അടുത്ത ഘട്ടങ്ങളിൽ മുഴുവൻ എമിറേറ്റിലേക്കും വ്യാപിപ്പിക്കാനുള്ള പദ്ധതിയുണ്ടെന്ന് അധികൃതർ വ്യക്തമാക്കി.