ദുബൈയിലെ ഷെയർ ടാക്സി വൻ ഹിറ്റ്; കൂടുതൽ ഇടങ്ങളിലേക്ക് വ്യാപിപ്പിക്കുന്നു

ദുബൈ: ​ കൂടുതൽ സ്ഥലങ്ങളിലേക്ക്​ ഷെയർ ടാക്സി സർവിസ് ആരംഭിക്കാൻ യു എ ഇ ഒരുങ്ങുന്നു. ദുബൈ വേൾഡ് ട്രേഡ് സെന്‍റർ,ആൽ മക്തൂം അന്താരാഷ്ട്ര വിമാനത്താവളം എന്നീ ലൊക്കേഷനുകളിൽ​ കൂടി സർവിസ്​ ആരംഭിക്കും. ഷെയർ ടാക്സി സംവിധാനത്തിന് എമിറേറ്റ്സിലെ ജനങ്ങൾ വലിയ പിന്തുണയാണ് നൽകിയത്. അത് കൊണ്ടാണ് കൂടുതൽ സ്ഥലങ്ങളിലേക്ക്​ വ്യാപിപ്പിക്കാൻ തീരുമാനിച്ചതെന്ന് ദു​ബൈ റോഡ്​ ഗതാഗത അതോറിറ്റി (ആർ.ടി.എ) അറിയിച്ചു.

കഴിഞ്ഞ വർഷമാണ് ഷെയർ ടാക്സി സർവിസ് സർവീസ് ദുബൈയിൽ ആരംഭിച്ചത്. ദുബൈയിലെ ഇബ്​ൻ ബത്തൂത്ത മാളിൽ നിന്ന്​ അബൂദബിയിലെ അൽ വഹ്​ദ മാളിലേക്കായിരുന്നു ആദ്യമായി സർവിസ് നടത്തിയത്. ഒരു വർഷത്തിനിടെ ഈ റൂട്ടിൽ ഷെയർ ടാക്സി ഉപയോഗിച്ചവരുടെ എണ്ണത്തിൽ 228 ശതമാനം വർധനവ് രേഖപ്പെടുത്തി.

ഇതിന്റെ അടിസ്ഥാനത്തിലാണ് മറ്റുള്ള റൂട്ടുകളിലും ഫീൽഡ് സ്റ്റഡി നടത്താൻ അധികൃതർ തീരുമാനിച്ചത്. ഈ പഠന റിപ്പോർട്ടിന്റെ അടിസ്ഥാനത്തിലാണ് കൂടുതൽ സ്ഥലങ്ങളിലേക്ക് ഷെയർ ടാക്സി സർവിസ് വ്യാപിപ്പിക്കുന്നത്.

കുറഞ്ഞ നിരക്കിൽ അതിവേഗം യാത്ര ചെയ്യാം എന്നതാണ് ഈ പദ്ധതിയുടെ പ്രത്യേകത. ഒരേ സ്ഥലത്തേക്ക് യാത്രചെയ്യുന്ന ഒന്നിലധികം യാത്രക്കാർക്ക് ഒരു വാഹനത്തിൽ സഞ്ചരിക്കാൻ അനുമതി നൽകുന്നതാണ് ഷെയർ ടാക്സി സർവീസ്. ഇതോടെ റോഡുകളിലെ വാഹനത്തിരക്ക് കുറയ്ക്കാനും കാർബൺ വ്യാപനത്തിൽ കുറവ് വരുത്താനും കഴിഞ്ഞതായി അധികൃതർ പറഞ്ഞു.