യു എ ഇയിൽ ജോലി ചെയ്യുന്നവർക്ക് പ്രിയം 'നിർമ്മിത ബുദ്ധി'; മൈക്രോസോഫ്റ്റിന്റെ റിപ്പോർട്ട് പുറത്ത്

ദുബൈ: ജോലി സ്ഥലങ്ങളിൽ ആർട്ടിഫിഷ്യൽ ഇന്റലിജൻസ് (AI) ഉപയോഗിക്കുന്നവരുടെ പട്ടികയിൽ ഒന്നാം സ്ഥാനത്ത് യു എ ഇ. നിർമ്മിത ബുദ്ധി ഉപയോഗത്തെക്കുറിച്ചുള്ള മൈക്രോസോഫ്റ്റ് തയ്യാറാക്കിയ റിപ്പോർട്ടിലാണ് യു എ ഇ ഒന്നാം സ്ഥാനത്ത് എത്തിയത്. 'എ ഐ ഫോർ ഗുഡ് ലാബ്' എന്ന റിപ്പോർട്ട് പ്രകാരം യു എ ഇയിൽ ജോലി ചെയ്യുന്ന 59.4% പേരും എ ഐ സോഫ്റ്റ്‌വെയറുകൾ ഉപയോഗിക്കുന്നുണ്ട്.

അതായത് യു എ ഇയിലെ പത്ത് ജീവനക്കാരിൽ ആറു പേരും എ ഐ സേവനങ്ങൾ ഉപയോഗിച്ചാണ് അവരുടെ ജോലികൾ ചെയ്യുന്നത് എന്നാണ് റിപ്പോർട്ട് പറയുന്നത്.

30ലേറെ രാജ്യങ്ങളിൽ നടത്തിയ സർവ്വേയിൽ രണ്ടാം സ്ഥാനത്തുള്ളത് സിംഗപ്പൂർ ആണ്. 58.6% ആളുകൾ ജോലി സ്ഥലങ്ങളിൽ ചാറ്റ് ജി പി ടി, മിഡ്‌ ജേർണി, സോഫ്റ്റ്‌ കോ പൈലറ്റ് എന്നീ സോഫ്റ്റ്‌വെയറുകൾ ഉപയോഗിക്കുന്നതായി കണ്ടെത്തിയിട്ടുണ്ട്.

 ആർട്ടിഫിഷ്യൽ ഇന്റലിജൻസ് കൂടുതൽ ഫലപ്രദമായി ഉപയോഗിക്കുന്ന രാജ്യങ്ങളുടെ പട്ടികയിലും യു എ ഇ മുന്നിലാണ്. ആഗോളതലത്തിലെ കണക്കിൽ 97 ശതമാനം യു എ ഇ നിവാസികളും നിർമ്മിത ബുദ്ധി സാങ്കേതിക വിദ്യ ഇഷ്ടപ്പെടുന്നവരാണ്. 

എ ഐ ഉപയോഗിച്ചുള്ള നിരവധി പദ്ധതികൾ ഇതുവരെ രാജ്യത്ത് നടപ്പിലാക്കിയിട്ടുണ്ട്. ആഗോളതലത്തിൽ തന്നെ യു എ ഇ ഒരു ഡിജിറ്റൽ ഹബ്ബ് ആക്കാനുള്ള പ്രവർത്തനങ്ങൾ സർക്കാർ മുമ്പ് തന്നെ ആരംഭിച്ചിട്ടുണ്ട്. അതിന്റെ പ്രവർത്തനങ്ങൾ മികച്ച രീതിയിൽ ആണ് മുന്നോട്ടുപോകുന്നത് എന്നതിന്റെ സൂചനയാണ് മൈക്രോസോഫ്റ്റ് റിപ്പോർട്ട്.