ദീപാവലിക്ക് നരേന്ദ്ര മോദി അയോധ്യയില്‍; ഏഴരലക്ഷം വിളക്കുകള്‍ കത്തിക്കും; ഗിന്നസ് റെക്കോര്‍ഡിലേക്ക്

ന്യൂഡല്‍ഹി: പ്രധാനമന്ത്രി നരേന്ദ്രമോദി ദീപാവലിക്ക് അയോധ്യ സന്ദര്‍ശിക്കും. അദ്ദേഹത്തിനൊപ്പം ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥും ഉണ്ടാകും. നവംബര്‍ നാലിനാണ് ദീപാവലി.

ക്ഷേത്രനഗരത്തില്‍ പത്ത് ദിവസം നീണ്ടുനില്‍ക്കുന്ന ദീപാവലി ആഘോഷം പ്രധാനമന്ത്രി ഉദ്ഘാടനം ചെയ്യും. സംസ്ഥാന സര്‍ക്കാരും അയോധ്യവികസനസമിതിയും സംയുക്തമായാണ് പരിപാടി സംഘടിപ്പിക്കുന്നത്.

സരയൂ നദിയുടെ തീരത്ത് 7.5 ലക്ഷം വിളക്കുകള്‍ കത്തിച്ച് പുതിയ ഗിന്നസ് ബുക്ക് റെക്കോര്‍ഡ് ഇടാനും സംഘാടകര്‍ തീരുമാനിച്ചിട്ടുണ്ട്. 2017ല്‍  യോഗി ആദിത്യനാഥ് മുഖ്യമന്ത്രിയായി അധികാരമേറ്റതിന് പിന്നാലെ സംസ്ഥാനത്ത് ദീപാവലി ആഘോഷങ്ങള്‍ വിപുലമാക്കിയരുന്നു. ഇത് യോഗി സര്‍ക്കാരിന്റെ അഞ്ചാമത് ദീപാവലി ആഘോഷമാണ്. 2019ല്‍ സരയൂ തീരത്ത് 4,10,000 ചെരാതുകള്‍ കത്തിച്ചിരുന്നു. 2020ല്‍ 6,06,569 വിളക്കുകളാണ് കത്തിച്ച് ഗിന്നസ് ബുക്കില്‍ ഇടംപിടിച്ചിരുന്നു. കഴിഞ്ഞ വര്‍ഷം കോവിഡ് പശ്ചാത്തലത്തില്‍ ദീപാവലി ആഘോഷത്തിന് തദ്ദേശീയര്‍ക്ക് മാത്രമെ പ്രവേശനം അനുവദിച്ചിരുന്നുള്ളു.