ഇടതു തരം​​ഗത്തിലും തൃപ്പൂണിത്തുറ കോ‌ട്ട പിടിച്ചെടുത്ത് ബാബു; സ്വരാജ് വീണു  

കൊച്ചി: ഇഞ്ചോടിഞ്ച് പോരാട്ടം നടന്ന തൃപ്പൂണിത്തുറ നിയോജക മണ്ഡലത്തിൽ യുഡിഎഫ് സ്ഥാനാർത്ഥി കെ ബാബുവിന് വിജയം. 992 വോട്ടുകളുടെ ഭൂരിപക്ഷത്തിന് എൽഡിഎഫ് സ്ഥാനാർത്ഥി എം സ്വരാജിനെയാണ് ബാബു വീഴ്ത്തിയത്. വിജയത്തിലൂടെ കഴിഞ്ഞ തവണ കൈവിട്ട മണ്ഡലം ബാബു തിരികെ പിടിച്ചു. 

അവസാന നിമിഷം വരെ ഫലം മാറിമറിഞ്ഞ മണ്ഡലത്തിൽ ബാബു 65,875 വോട്ടുകൾ നേടി. സ്വരാജിന് 64,883 വോട്ടുകളാണ് ലഭിച്ചത്. എൻഡിഎ സ്ഥാനാർത്ഥി ഡോ. കെഎസ് രാധാകൃഷ്ണൻ 23,756 വോട്ടുകളാണ് സ്വന്തമാക്കിയത്. 

സംസ്ഥാനം മുഴുവൻ ഇടതുതരം​ഗം ആഞ്ഞടിച്ചപ്പോൾ ഏറെ പ്രതീക്ഷ പുലർത്തിയ തൃപ്പൂണിത്തുറയിൽ സ്വരാജിന് കാലിടറി. മണ്ഡലം നിലനിർത്താനുള്ള സ്വരാജിന്റെ ശ്രമം അവസാന നിമിഷം ബാബു പരാജയപ്പെടുത്തി. 

ശിവസേന സ്ഥാനാർത്ഥി അരുൺ ബാബു 232 വോട്ടുകൾ പിടിച്ചു. എസ്.യു.സി.ഐ സ്ഥാനാർത്ഥി സിബി അശോകൻ 173 വോട്ടുകളും സ്വതന്ത്രരായി മത്സരിച്ച രാജേഷ് പൈറോഡ് 201 വോട്ടുകളും കെപി അയ്യപ്പൻ 88 വോട്ടുകളും പിടിച്ചു. നോട്ടയ്ക്ക് 1099 വോട്ടുകൾ.