വഖഫ് ബോർഡിൽ സമവായം, പരസ്യപ്രസ്താവനാ വിലക്കിന് പുല്ലുവില, കേരളത്തിന് ലീഡ്; ഇന്നത്തെ 5 പ്രധാന വാര്‍ത്തകള്‍

വഖഫ് ബോര്‍ഡ് പുനഃസംഘടനയുമായി ബന്ധപ്പെട്ട തര്‍ക്കത്തില്‍ സമവായം. കോണ്‍ഗ്രസിലെ പരസ്യപ്രസ്താവനാ വിലക്ക് ലംഘിച്ച് ജെബി മേത്തര്‍. രഞ്ജിട്രോഫിയില്‍ കേരളത്തിന് ലീഡ്. ഇന്നത്തെ 5 പ്രധാന വാര്‍ത്തകള്‍ ( Top 5 News Today ) അറിയാം.

 സംസ്ഥാന വഖഫ് ബോര്‍ഡ് പുനഃസംഘടനയുമായി ബന്ധപ്പെട്ട തര്‍ക്കത്തിനിടെ, കാന്തപുരം എപി അബൂബക്കര്‍ മുസലിയാരെ കണ്ട് മന്ത്രി എന്‍ ഷംസുദ്ദീന്‍. ബോര്‍ഡില്‍ എപി വിഭാഗത്തിന് പ്രാതിനിധ്യം ഉണ്ടാകുമെന്ന് മന്ത്രി ഉറപ്പു നല്‍കി. ഇതേത്തുടര്‍ന്ന് മുസ്ലിം ജമാ അത്ത് നടത്താന്‍ നിശ്ചയിച്ചിരുന്ന മാര്‍ച്ച് പിന്‍വലിച്ചു. മന്ത്രിയുടെ ഉറപ്പിന്റെ പശ്ചാത്തലത്തിലാണ് മാര്‍ച്ചില്‍ നിന്നും പിന്മാറുന്നതെന്ന് ഭാരവാഹികള്‍ അറിയിച്ചു.

കെപിസിസിയുടെ പ്രസ്താവനാ വിലക്ക് ലംഘിച്ച് പരസ്യ പ്രതികരണവുമായി മഹിളാ കോണ്‍ഗ്രസ് സംസ്ഥാന അധ്യക്ഷ ജെബി മേത്തര്‍ എംപി. അടൂര്‍ പ്രകാശിനും കെ സുധാകരനും എതിരെ മന്ത്രി കെ മുരളീധരന്‍ നടത്തിയ പരാമര്‍ശത്തെ ജെബി മേത്തര്‍ തള്ളി. അടൂര്‍ പ്രകാശിന് പിന്നില്‍ ആരെങ്കിലും ഉണ്ടെന്ന് തോന്നുന്നില്ല. അഭിപ്രായങ്ങള്‍ വ്യക്തിസ്വാതന്ത്ര്യമാണ്. അത് ചോദ്യം ചെയ്യരുതെന്നും ജെബി മേത്തര്‍ പറഞ്ഞു.

പത്തനംതിട്ടയിലെ പുളികീഴിൽ മൂന്ന് വര്‍ഷം മുമ്പ് കുട്ടിയുടെ മൃതദേഹം കണ്ടെത്തിയ സംഭവം കൊലപാതകമെന്ന് തെളിഞ്ഞു. തന്റെ ആൺസുഹൃത്ത് കുട്ടിയെ ശ്വാസം മുട്ടിച്ച് കൊലപ്പെടുത്തുകയായിരുന്നു എന്ന് അമ്മ മൊഴി നൽകി. ചതുപ്പിൽ കുഴിച്ചിട്ട നിലയിലാണ് മൂന്നു വയസ്സുള്ള കുഞ്ഞിന്റെ മൃതദേഹം കണ്ടെത്തിയിരുന്നത്. മൂന്നു വർഷങ്ങൾക്ക് ശേഷമാണ് കുട്ടിയുടെ അമ്മയായ നാടോടി സ്ത്രീയെ പൊലീസ് പിടികൂടുന്നത്.

കോക്രോച്ച് ജനതാ പാര്‍ട്ടിയെ പിന്തുണച്ച് മുന്‍ ബിജെപി നേതാവ് കെ അണ്ണാമലൈ. സിജെപി ഉന്നയിക്കുന്ന ചോദ്യങ്ങളെ പിന്തുണയ്ക്കുന്നു. അതില്‍ മറുപടി കേന്ദ്രസര്‍ക്കാര്‍ മറുപടി പറയണമെന്നും അണ്ണാമലൈ ആവശ്യപ്പെട്ടു. പ്രതിഷേധ സമരം നടത്തിയ സിജെപി നേതാക്കളായ സൗരവ് ദാസ്, അശുതോഷ് രങ്ക എന്നിവരെ ഡല്‍ഹി പൊലീസ് കൈകാര്യം ചെയ്ത രീതിയെയും അണ്ണാമലൈ വിമര്‍ശിച്ചു. സിജെപി നേതാക്കള്‍ ഇപ്പോഴും ജുഡീഷ്യല്‍ കസ്റ്റഡിയില്‍ തുടരുന്നത് നിയമവാഴ്ചയെക്കുറിച്ചുള്ള ആശങ്കകള്‍ ഉയര്‍ത്തുന്നുവെന്ന് അദ്ദേഹം പറഞ്ഞു.

 ഒഡിഷയ്‌ക്കെതിരായ രഞ്ജി ട്രോഫി പോരാട്ടത്തില്‍ നിര്‍ണായക ഒന്നാം ഇന്നിങ്‌സ് ലീഡ് സ്വന്തമാക്കി കേരളം. ഒന്നാം ഇന്നിങ്‌സില്‍ 404 റണ്‍സെടുത്ത കേരളം ഒഡിഷയെ 225 റണ്‍സില്‍ ഓള്‍ ഔട്ടാക്കി. നിലവില്‍ ഒഡിഷ ഫോളോ ഓണ്‍ ചെയ്യുകയാണ്. 4 വിക്കറ്റുകള്‍ വീഴ്ത്തിയ വിശാഖ് ചന്ദ്രന്റെ മികച്ച ബൗളിങാണ് കേരളത്തിനു കരുത്തായത്. ആദിത്യ സാര്‍വതെ 3 വിക്കറ്റുകള്‍ സ്വന്തമാക്കി.