സിപിഎം  സംസ്ഥാന സെക്രട്ടേറിയറ്റ് ഇന്ന് ; ശശീന്ദ്രൻ വിഷയം ചർച്ചയാകും

തിരുവനന്തപുരം : സിപിഎം  സംസ്ഥാന സെക്രട്ടേറിയറ്റ് യോ​ഗം ഇന്ന് ചേരും. മന്ത്രി എ കെ ശശീന്ദ്രനെതിരായ ആരോപണം യോ​ഗം ചർച്ച ചെയ്യും.  കഴിഞ്ഞദിവസം ചേര്‍ന്ന അവൈലബിള്‍ സെക്രട്ടേറിയറ്റ് വിഷയം ചര്‍ച്ച ചെയ്തിരുന്നെങ്കിലും നിലപാട് പരസ്യപ്പെടുത്തിയിരുന്നില്ല. 

ശശീന്ദ്രനെതിരായ ആരോപണത്തില്‍ യുവതി ഉറച്ചുനില്‍ക്കുന്ന സാഹചര്യത്തില്‍ പ്രശ്നം ​ഗൗരവകരമാകുമോ എന്ന ആശങ്ക സിപിഎമ്മിനുമുണ്ട്. വിഷയത്തിൽ ശശീന്ദ്രന്റെ രാജി ആവശ്യപ്പെട്ട് പ്രതിപക്ഷ പാർട്ടികൾ സമരരം​ഗത്തിറങ്ങിയിട്ടുണ്ട്. 

നിയമസഭയിൽ മന്ത്രി ശശീന്ദ്രനെ  ന്യായീകരിക്കുന്ന നിലപാടാണ് മുഖ്യമന്ത്രി പിണറായി വിജയൻ സ്വീകരിച്ചത്.  മന്ത്രി തെറ്റൊന്നും ചെയ്തിട്ടില്ലെന്നും, പാർട്ടിക്കർ തമ്മിലുള്ള പ്രശ്നത്തിലാണ് ശശീന്ദ്രൻ ഇടപെട്ടത് എന്നുമാണ് മുഖ്യമന്ത്രി വിശദീകരിച്ചത്. യുവതിയുടെ പരാതി സ്വീകരിക്കാൻ വൈകിയതിൽ ഡിജിപി അന്വേഷിക്കുമെന്നും മുഖ്യമന്ത്രി വ്യക്തമാക്കി.