ഫെയ്സ്ബുക്കിലൂടെ 17കാരിയെ പരിചയപ്പെട്ടു; പീഡനം, തട്ടിക്കൊണ്ടു പോകൽ; മോഷ്ടാവായ യുവാവ് പിടിയിൽ

കോട്ടയം: പ്രണയം നടിച്ച് പതിനേഴുകാരിയെ പീഡിപ്പിച്ച ശേഷം തട്ടിക്കൊണ്ടു പോയ സംഭവത്തിൽ മോഷ്ടാവായ യുവാവ് പിടിയിൽ. കോട്ടയം കറുകച്ചാലിലാണ് സംഭവം. കൊല്ലം കടയ്ക്കൽ ഉണ്ണിമുക്ക് തട്ടത്തരികത്ത് മുഹമ്മദ് ഷാൻ (19) ആണ് അറസ്റ്റിലായത്. ഒരു വർഷം മുൻപാണു ഷാൻ പെൺകുട്ടിയെ ഫെയ്സ്ബുക്കിലൂടെ പരിചയപ്പെട്ടത്. 

അർധ രാത്രി വീട്ടിൽ നിന്നിറങ്ങിയ പെൺകുട്ടി ഷാനിനൊപ്പം പിതാവിന്റെ വീട്ടിലെത്തി. ഇവിടെ വച്ചു ഷാൻ പെൺകുട്ടിയെ പീഡിപ്പിച്ചു. ഷാനിന്റെ സ്‌കൂട്ടറിൽ ഇരുവരും കൊല്ലത്തേക്കു പോയി. 

പെൺകുട്ടിയെ തട്ടിക്കൊണ്ടുപോയ വിവരം ഉടൻ ബന്ധുക്കൾ കറുകച്ചാൽ പൊലീസിൽ അറിയിച്ചു. വെള്ളിയാഴ്ച പുലർച്ചെ നാലരയോടെ കൊല്ലം കടയ്ക്കലിൽ എത്തിയപ്പോൾ ഇവർ സഞ്ചരിച്ച സ്‌കൂട്ടറിന്റെ ടയർ പഞ്ചറായി. സ്‌കൂട്ടർ തള്ളി റോഡിലൂടെ നടക്കുകയായിരുന്ന ഇരുവരെയും പൊലീസ് പിടികൂടി ചോദ്യം ചെയ്യുകയായിരുന്നു.