നായ കുറുകെചാടി, റോഡിൽ വയറടിച്ചു വീണ ​ഗർഭിണിക്ക് ദാരുണാന്ത്യം

കോട്ടയം; കുഞ്ഞിനു വേണ്ടിയുള്ള എട്ടു വർഷമായുള്ള അവരുടെ കാത്തിരിപ്പായിരുന്നു. എന്നാൽ ആ മുഖമൊന്നുകാണുന്നതിന് മുന്നേ റിൻസി പോയി, കൂടെ ​ഗർഭസ്ഥശിശുവും. നായ കുറുകെ ചാടിയതിനെ തുടർന്ന് സ്കൂട്ടർ മറിഞ്ഞുണ്ടായ അപകടത്തിലാണ് ​ഗർഭിണിയും കുഞ്ഞും മരിച്ചത്. 

ചേർപ്പുങ്കൽ മാർ സ്ലീവാ മെഡിസിറ്റിയിലെ സ്റ്റാഫ് നഴ്‌സായ കളത്തൂർ കളപ്പുരയ്ക്കൽ റിൻസമ്മ ജോൺ (റിൻസി– 40) ആണ് മരിച്ചത്. ഇന്നലെ രാവിലെ പാലാ-പൂഞ്ഞാർ ഹൈവേയിൽ ചേർപ്പുങ്കലിലാണ് അപകടമുണ്ടായത്. ഭർത്താവിനൊപ്പം യാത്ര ചെയ്യുമ്പോൾ നായ റോഡിനു കുറുകെ ചാടിയതിനെത്തുടർന്ന് സ്കൂട്ടർ മതിലിൽ ഇടിച്ചു മറിയുകയായിരുന്നു. 

7 മാസം ഗർഭിണിയായ റിൻസമ്മ റോഡിൽ വയറടിച്ചു വീണു. ഉടൻ ആശുപത്രിയിൽ എത്തിച്ചെങ്കിലും റിൻസമ്മയെയും ഗർഭസ്ഥശിശുവിനെയും രക്ഷിക്കാനായില്ല. സ്കൂട്ടർ ഓടിച്ചിരുന്ന ഭർത്താവ് ബിജുവിനും (45) പരുക്കേറ്റു. 8 വർഷം മുൻപ് വിവാഹിതരായ ഇവർക്കു കുട്ടികളില്ലായിരുന്നു.