അമേരിക്കയിൽ അസാധാരണ നടപടി; തീരുവയിൽ ആശങ്ക വേണ്ട: ഇന്നത്തെ അഞ്ചു പ്രധാന വാർത്തകൾ

അമേരിക്കയില്‍ വെള്ളിയാഴ്ച ഉച്ചയ്ക്ക് ശേഷം പുറപ്പെടേണ്ട മുഴുവന്‍ വിമാന സര്‍വീസുകളും ഫെഡറല്‍ ഏവിയേഷന്‍ അഡ്മിനിസ്ട്രേഷന്‍(എഫ്എഎ) താത്കാലികമായി നിര്‍ത്തിവച്ചു. എയര്‍ ട്രാഫിക് കണ്‍ട്രോള്‍ സെന്ററുകളിലെ ആശയവിനിമയ സംവിധാനത്തിലുണ്ടായ തകരാറിനെ തുടര്‍ന്നാണ് നടപടിയെന്ന് എഫ്എഎ പുറത്തിറക്കിയ അറിയിപ്പില്‍ വ്യക്തമാക്കി. ഇതടക്കം അഞ്ചു പ്രധാന വാർത്തകൾ ചുവടെ:

അമേരിക്കയില്‍ വെള്ളിയാഴ്ച ഉച്ചയ്ക്ക് ശേഷം പുറപ്പെടേണ്ട മുഴുവന്‍ വിമാന സര്‍വീസുകളും ഫെഡറല്‍ ഏവിയേഷന്‍ അഡ്മിനിസ്ട്രേഷന്‍(എഫ്എഎ) താത്കാലികമായി നിര്‍ത്തിവച്ചു. എയര്‍ ട്രാഫിക് കണ്‍ട്രോള്‍ സെന്ററുകളിലെ ആശയവിനിമയ സംവിധാനത്തിലുണ്ടായ തകരാറിനെ തുടര്‍ന്നാണ് നടപടിയെന്ന് എഫ്എഎ പുറത്തിറക്കിയ അറിയിപ്പില്‍ വ്യക്തമാക്കി.

വിയറ്റ്‌നാം, ഇന്തോനേഷ്യ, കംബോഡിയ തുടങ്ങിയ രാജ്യങ്ങളുമായി താരതമ്യം ചെയ്യുമ്പോള്‍ തീരുവയുടെ കാര്യത്തില്‍ ഇന്ത്യയ്ക്ക് മുന്‍തൂക്കം നല്‍കാമെന്ന് അമേരിക്ക ഉറപ്പുനല്‍കിയതായി റിപ്പോര്‍ട്ട്. ഇടക്കാല വ്യാപാര കരാറിനായി ഇരുരാജ്യങ്ങളും തമ്മില്‍ ചര്‍ച്ച പുരോഗമിക്കുകയാണ്. എന്നാല്‍ അമേരിക്കയുടെ മൊത്തത്തിലുള്ള തീരുവ ചട്ടക്കൂട് നിലവില്‍ വന്നാല്‍ മാത്രമേ ഇത് സാധ്യമാകൂ എന്ന് ബന്ധപ്പെട്ട ഉദ്യോഗസ്ഥരെ ഉദ്ധരിച്ചുള്ള റിപ്പോര്‍ട്ടുകളില്‍ പറയുന്നു.

തിരുവനന്തപുരത്ത് മെഡിക്കല്‍ ദന്തല്‍ പിജി വിദ്യാര്‍ഥിനിയെ പീഡിപ്പിക്കാന്‍ ശ്രമം. നെടുമങ്ങാട് ജില്ലാ സര്‍ക്കാര്‍ ആശുപത്രിയിലെ സീനിയര്‍ ഡോക്ടര്‍ക്കെതിരെയാണ് പരാതി.

സ്പേസ് എക്സിന്റെ സ്റ്റാര്‍ഷിപ്പ് റോക്കറ്റിന്റെ 15-ാം പരീക്ഷണ വിക്ഷേപണം വിജയം. ഇന്ത്യന്‍ സമയം പുലര്‍ച്ചെ 4.17 നായിരുന്നു വിക്ഷേപണം. ഭ്രമണപഥത്തിലെത്തി ഭൂമിയില്‍ നിന്ന് പുറപ്പെട്ട അതേ സ്ഥലത്തേക്ക് തന്നെ തിരിച്ചെത്തുന്ന ആദ്യത്തെ 'റൗണ്ട്-ട്രിപ്പ്' റോക്കറ്റ് യാത്രയായി ഇത് മാറുമെന്നാണ് പ്രതീക്ഷ. പൂര്‍ണ്ണമായും വീണ്ടും ഉപയോഗിക്കാവുന്ന റോക്കറ്റ് സംവിധാനം വികസിപ്പിക്കാനുള്ള ഇലോണ്‍ മസ്‌കിന്റെ ശ്രമങ്ങളിലെ നിര്‍ണായകമായ ഒരു പരീക്ഷണമാണിത്.

ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദ്ദത്തിന്റെ സ്വാധീനഫലമായി സംസ്ഥാനത്ത് ചൊവ്വാഴ്ച വരെ ഒറ്റപ്പെട്ട സ്ഥലങ്ങളില്‍ നേരിയ / ഇടത്തരം മഴയ്ക്ക് സാധ്യത. മധ്യ കിഴക്കന്‍ അറബിക്കടലിലും സമീപ വടക്കന്‍ ലക്ഷദ്വീപ് പ്രദേശങ്ങള്‍ക്കും മുകളിലായി ചക്രവാതച്ചുഴിയും തുടരുന്നുണ്ട്. ഇതും മഴയെ സ്വാധീനിക്കുന്നുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.