'മാമി എവിടെ?'; പൊലീസിന്റെ വീഴ്ചകളിലും രാഷ്ട്രീയ ആരോപണങ്ങളിലും കുടുങ്ങിയ തിരോധാനം

“മാമി എവിടെ?” — രണ്ട് വർഷമായി കോഴിക്കോട് നഗരത്തിന്റെ തെരുവുകളിൽ, സോഷ്യൽ മീഡിയ ചർച്ചകളിൽ, കുടുംബത്തിന്റെ കണ്ണീരിൽ, അന്വേഷണ ഫയലുകളുടെ നിശ്ശബ്ദതയിൽ വീണ്ടും വീണ്ടും ഉയരുന്ന ചോദ്യം ഇതാണ്. ഒരു ദിവസം രാവിലെ വീട്ടിൽ നിന്ന് പുറത്തിറങ്ങിയ മുഹമ്മദ് അത്തൂർ എന്ന “മാമിയെ" പിന്നീട് ആരും കണ്ടിട്ടില്ല. “മാമി”യുടെ തിരോധാനം ഇന്നും കേരള പൊലീസിന് ഉത്തരം കണ്ടെത്താനാകാത്ത വലിയ ദുരൂഹതയായി തുടരുകയാണ്.

കാലം കടന്നുപോയിട്ടും മാമിയെക്കുറിച്ചുള്ള ഒരു വ്യക്തമായ സൂചന പോലും പുറത്തുവരാത്തത് ഈ കേസിനെ സംസ്ഥാനത്തെ ഏറ്റവും ചർച്ച ചെയ്യപ്പെടുന്ന അൺസോൾവ്ഡ് മിസ്റ്ററികളിലൊന്നാക്കി മാറ്റിയിരിക്കുകയാണ്. പൊലീസ് വീഴ്ചകൾ, ഉന്നതതല ഇടപെടൽ ആരോപണങ്ങൾ, രാഷ്ട്രീയ വിവാദങ്ങൾ, സാമ്പത്തിക തർക്കങ്ങൾ, റിയൽ എസ്റ്റേറ്റ് ബന്ധങ്ങൾ — എല്ലാം കൂടിച്ചേർന്ന സങ്കീർണ അന്വേഷണമായാണ് “മാമി കേസ്” ഇന്ന് മാറിയിരിക്കുന്നത്.

യുഡിഎഫ് സർക്കാർ അധികാരത്തിലെത്തിയ പശ്ചാത്തലത്തിൽ മാമിയുടെ കുടുംബവും ആക്ഷൻ കമ്മിറ്റിയും മുഖ്യമന്ധ്രി വി.ഡി. സതീശനെ സമീപിക്കാൻ തീരുമാനിച്ചിരിക്കുകയാണ്. നിലവിലെ ക്രൈംബ്രാഞ്ച് അന്വേഷണത്തിനും കേസിൽ കാര്യമായ മുന്നേറ്റമുണ്ടാക്കാനാകാത്ത സാഹചര്യത്തിലാണ് പുതിയ സർക്കാരിന്റെ ഇടപെടൽ തേടുന്നത്.

2023 ഓഗസ്റ്റ് 21നാണ് കോഴിക്കോട് ആസ്ഥാനമായി പ്രവർത്തിച്ചിരുന്ന റിയൽ എസ്റ്റേറ്റ് ഇടനിലക്കാരൻ മുഹമ്മദ് അത്തൂർ കാണാതാകുന്നത്. കുടുംബത്തിന്റെ മൊഴിപ്രകാരം, അന്ന് രാവിലെ വീട്ടിൽ നിന്ന് പുറത്തിറങ്ങിയ മാമി പിന്നീട് ഭാര്യയ്ക്ക് വൈകുമെന്ന സന്ദേശം അയച്ചിരുന്നു. തുടർന്ന് ഭാര്യയോടും ഡ്രൈവറോടും ഒരു ബിസിനസ് പങ്കാളിയോടുമാണ് അവസാനമായി സംസാരിച്ചത്.

അതിന് പിന്നാലെ മൊബൈൽ ഫോൺ സ്വിച്ച് ഓഫ് ആയി. അന്വേഷണസംഘത്തിന് ലഭിച്ച ടവർ ലൊക്കേഷൻ വിവരങ്ങൾ പ്രകാരം ഓഗസ്റ്റ് 22 ഉച്ചവരെ തലക്കുളത്തൂർ ഭാഗത്ത് നിന്ന് ഫോണിന്റെ സിഗ്നൽ ലഭിച്ചിരുന്നു. അതിന് ശേഷം മാമിയെക്കുറിച്ചോ അദ്ദേഹത്തിന്റെ ഫോണിനെക്കുറിച്ചോ യാതൊരു വിവരവും ലഭിച്ചിട്ടില്ല.

കോഴിക്കോട് കേന്ദ്രീകരിച്ച് പ്രവർത്തിച്ചിരുന്ന പ്രമുഖ റിയൽ എസ്റ്റേറ്റ് ബ്രോക്കറായിരുന്നു മാമി. ഗൾഫ് എൻആർഐ ബന്ധങ്ങളും കോടിക്കണക്കിന് രൂപയുടെ ഭൂമി ഇടപാടുകളും അദ്ദേഹത്തിനുണ്ടായിരുന്നുവെന്നാണ് അന്വേഷണവുമായി ബന്ധപ്പെട്ട വൃത്തങ്ങൾ പറയുന്നത്.

കാണാതാകുന്നതിന് ഏതാനും ആഴ്ചകൾക്ക് മുമ്പ് ദുബായിൽ നടന്നതായി പറയപ്പെടുന്ന വൻ ഭൂമി ഇടപാടുമായി ബന്ധപ്പെട്ട സാമ്പത്തിക സമ്മർദ്ദങ്ങൾ അദ്ദേഹത്തെ അലട്ടിയിരുന്നുവെന്ന വിവരങ്ങളും പുറത്തുവന്നിരുന്നു. എന്നാൽ ഇതുസംബന്ധിച്ച് ഔദ്യോഗിക സ്ഥിരീകരണമൊന്നും ഉണ്ടായിട്ടില്ല.

മാമിയുടെ തിരോധാനത്തിന് പിന്നാലെ ഭാര്യ റുക്സാന പൊലീസിൽ പരാതി നൽകിയെങ്കിലും ആദ്യഘട്ട അന്വേഷണത്തിൽ ഗുരുതര വീഴ്ചകളുണ്ടായെന്ന ആരോപണം പിന്നീട് ശക്തമായി ഉയർന്നു. നാടകാവ് പൊലീസാണ് ആദ്യം കേസ് അന്വേഷിച്ചത്. എന്നാൽ പിന്നീട് ക്രൈംബ്രാഞ്ചും വകുപ്പുതല അന്വേഷണവും നടത്തിയ പരിശോധനകളിൽ നിർണായക തെളിവുകൾ സമയത്ത് ശേഖരിക്കാത്തതടക്കമുള്ള ഗുരുതര പിഴവുകൾ കണ്ടെത്തി.

മാമി അവസാനമായി സഞ്ചരിച്ച വഴികളിലെ സി.സി.ടി.വി ദൃശ്യങ്ങൾ സമയബന്ധിതമായി ശേഖരിക്കാത്തതിനാൽ പല ദൃശ്യങ്ങളും പിന്നീട് ഓവർറൈറ്റ് ആയി നഷ്ടപ്പെട്ടുവെന്നാണ് അന്വേഷണ റിപ്പോർട്ടുകൾ വ്യക്തമാക്കുന്നത്.

ടവർ ലൊക്കേഷൻ വിവരങ്ങൾ ഫലപ്രദമായി പിന്തുടരുന്നതിലും ഡിജിറ്റൽ തെളിവുകൾ സംരക്ഷിക്കുന്നതിലും അന്വേഷണസംഘം പരാജയപ്പെട്ടുവെന്ന വിലയിരുത്തലും ഉണ്ടായി.

ഈ അന്വേഷണ വീഴ്ചകളെ തുടർന്ന് അന്നത്തെ നാടകാവ് സ്റ്റേഷൻ ഹൗസ് ഓഫീസർ പി.കെ. ജിജീഷ്, എസ്.ഐ. ബിനു മോഹൻ, സീനിയർ സി.പി.ഒമാരായ എം.വി. ശ്രീകാന്ത്, കെ.കെ. ബിജു എന്നിവർക്കെതിരെ വകുപ്പുതല അന്വേഷണവും നടന്നു.

ക്രൈംബ്രാഞ്ച് റിപ്പോർട്ടിനെ തുടർന്നാണ് ഉത്തരമേഖല ഐജി രാജ്പാൽ മീണ അന്വേഷണത്തിന് ഉത്തരവിട്ടത്. ആദ്യ 48 മണിക്കൂറിനുള്ളിൽ തെളിവുകൾ ഫലപ്രദമായി ശേഖരിച്ചിരുന്നെങ്കിൽ കേസിൽ നിർണായക വഴിത്തിരിവുണ്ടാകുമായിരുന്നുവെന്നാണ് പിന്നീട് അന്വേഷണ വൃത്തങ്ങൾ തന്നെ വിലയിരുത്തിയത്.

കേസിന്റെ ആദ്യഘട്ടത്തിൽ തന്നെ മറ്റൊരു നിർണായക ആരോപണവും ഉയർന്നു. മാമി വീട്ടിൽ സൂക്ഷിച്ചിരുന്ന വലിയ തുക പണവും കാണാതായതായി കുടുംബം ആരോപിച്ചു. ഇതോടെ കേസ് സാധാരണ തിരോധാനത്തിൽ നിന്ന് സാമ്പത്തിക തർക്കങ്ങളിലേക്കും റിയൽ എസ്റ്റേറ്റ് മാഫിയ ബന്ധങ്ങളിലേക്കും തിരിഞ്ഞു. കുടുംബം പിന്നീട് ഹൈക്കോടതിയെ സമീപിച്ച് സി.ബി.ഐ അന്വേഷണം ആവശ്യപ്പെട്ടു. റിയൽ എസ്റ്റേറ്റ് മാഫിയ മാമിയെ തടവിലാക്കിയിരിക്കാമെന്നും നിലവിലെ അന്വേഷണം ഗൗരവതരമല്ലെന്നും ഹർജിയിൽ ആരോപിച്ചിരുന്നു.

അന്വേഷണത്തിന്റെ തുടക്കം മുതൽ പൊലീസിന്റെ നിരീക്ഷണത്തിലുണ്ടായിരുന്ന പ്രധാന വ്യക്തികളിൽ ഒരാൾ മാമിയുടെ ഡ്രൈവർ രാജിത്ത് കുമാറായിരുന്നു. ഇയാളെ പലവട്ടം ചോദ്യം ചെയ്തെങ്കിലും കേസിൽ പ്രതിയാക്കിയിരുന്നില്ല. പിന്നീട് അന്വേഷണം ക്രൈംബ്രാഞ്ചിലേക്ക് മാറിയതിന് പിന്നാലെ രാജിത്തും ഭാര്യ തുഷാരയും അപ്രത്യക്ഷരായത് വീണ്ടും വലിയ ചർച്ചയായി.

ഇരുവരെയും പിന്നീട് ഗുരുവായൂരിലെ ഒരു ലോഡ്ജിൽ നിന്ന് കണ്ടെത്തി. പിന്നാലെ രാജിത്ത് പൊലീസിനെതിരെ ഗുരുതര ആരോപണങ്ങളുമായി രംഗത്തെത്തി. തനിക്കും കുടുംബത്തിനുമേൽ അന്വേഷണത്തിന്റെ പേരിൽ നിരന്തര സമ്മർദ്ദവും പീഡനവും ഉണ്ടായിരുന്നുവെന്നും ജീവിതം തകർത്തുവെന്നും ഇയാൾ ആരോപിച്ചു. ആത്മഹത്യാ സൂചനയുള്ള വോയ്സ് സന്ദേശവും രാജിത്ത് അയച്ചതായി റിപ്പോർട്ടുകൾ പുറത്തുവന്നു.

ഒരു വർഷത്തിലേറെ കഴിഞ്ഞിട്ടും കേസിൽ പുരോഗതിയില്ലാതിരുന്നതോടെ 2024ൽ കുടുംബത്തിന്റെയും ആക്ഷൻ കൗൺസിലിന്റെയും പ്രതിഷേധം ശക്തമായി. മുഖ്യമന്ത്രി പിണറായി വിജയനെ നേരിൽ കണ്ട കുടുംബം സി.ബി.ഐ അല്ലെങ്കിൽ ക്രൈംബ്രാഞ്ച് അന്വേഷണം ആവശ്യപ്പെട്ടു. എന്നാൽ അതിന് പിന്നാലെ അന്നത്തെ എ.ഡി.ജി.പി എം.ആർ. അജിത് കുമാറിന്റെ മേൽനോട്ടത്തിൽ പ്രത്യേക അന്വേഷണസംഘം രൂപീകരിക്കപ്പെട്ടത് പുതിയ വിവാദങ്ങൾക്ക് വഴിവച്ചു.

പുതിയ എസ്.ഐ.ടിയിലെ ഒൻപത് അംഗങ്ങളിൽ ഏഴുപേരും നേരത്തെ അന്വേഷണം നടത്തിയ അതേ ഉദ്യോഗസ്ഥരാണെന്നായിരുന്നു കുടുംബത്തിന്റെ ആരോപണം. ഇതോടെ അന്വേഷണം അട്ടിമറിക്കപ്പെടുകയാണെന്ന സംശയം കൂടുതൽ ശക്തമായി.

ഇതിനിടെയാണ് മുൻ നിലമ്പൂർ എം.എൽ.എ പി.വി. അൻവർ മാമി കേസിൽ ഗുരുതര ആരോപണങ്ങളുമായി രംഗത്തെത്തിയത്. അജിത് കുമാറിന് കേസിൽ “ദൃശ്യവും അദൃശ്യവുമായ പങ്കുണ്ട്” എന്നാണ് അൻവർ ആരോപിച്ചത്.

മാമിയുടെ കുടുംബത്തെ സന്ദർശിച്ച ശേഷമാണ് അദ്ദേഹം ഇക്കാര്യം പരസ്യമായി പറഞ്ഞത്. തനിക്ക് ലഭിച്ച വിവരങ്ങളും തെളിവുകളും സീൽ ചെയ്ത കവറിൽ ക്രൈംബ്രാഞ്ച് ഐജിക്കും ഡി.ജി.പിക്കും കൈമാറുമെന്നും അദ്ദേഹം വ്യക്തമാക്കി. അന്വേഷണം ഉന്നതതലത്തിൽ നിന്ന് സ്വാധീനിക്കപ്പെടുന്നുവെന്ന ആരോപണവും അൻവർ ഉയർത്തി.

അൻവറിന്റെ ആരോപണങ്ങൾ പിന്നീട് വലിയ രാഷ്ട്രീയ വിവാദങ്ങൾക്ക് വഴിവച്ചു. അജിത് കുമാറിനെയും മുൻ മലപ്പുറം എസ്.പി സുജിത് ദാസിനെയുംതിരായ ആരോപണങ്ങളിൽ കേന്ദ്ര ഏജൻസി അന്വേഷണം ആവശ്യപ്പെട്ട് അൻവർ ഹൈക്കോടതിയിൽ ഹർജിയും ഫയൽ ചെയ്തു. ആ ഹർജിയിലും മാമിയുടെ തിരോധാനവുമായി ബന്ധപ്പെട്ട ആരോപണങ്ങൾ ആവർത്തിക്കപ്പെട്ടു.

എന്നാൽ പിന്നീട് ഡി.ജി.പി നേതൃത്വത്തിലുള്ള ഉന്നതതല അന്വേഷണസംഘം അജിത് കുമാറിനെതിരായ നേരിട്ടുള്ള ആരോപണങ്ങൾക്ക് തെളിവില്ലെന്ന കണ്ടെത്തലിലെത്തി. അതേസമയം കേസുമായി ബന്ധപ്പെട്ട അദ്ദേഹത്തിന്റെ ചില തീരുമാനങ്ങൾ “അനുചിതമായിരുന്നു” എന്നും അന്വേഷണസംഘം നിരീക്ഷിച്ചു.

മാമി കേസിൽ തുടർച്ചയായി ഉയർന്ന പ്രധാന വിമർശനം അന്വേഷണം ഉദ്ദേശപൂർവ്വം വൈകിപ്പിച്ചുവെന്നതായിരുന്നു. കുടുംബത്തിന്റെയും ആക്ഷൻ കൗൺസിലിന്റെയും വാദമനുസരിച്ച് കേസിലെ ഏറ്റവും നിർണായകമായ ആദ്യ 48 മണിക്കൂർ പൊലീസ് ഫലപ്രദമായി ഉപയോഗിച്ചില്ല.

സി.സി.ടി.വി ദൃശ്യങ്ങൾ നഷ്ടപ്പെടുകയും മൊബൈൽ ഡാറ്റ വൈകി പരിശോധിക്കപ്പെടുകയും ചെയ്തതോടെ നിർണായക തെളിവുകൾ ഇല്ലാതായെന്നാണ് ആരോപണം. പിന്നീട് ക്രൈംബ്രാഞ്ചും ആദ്യ അന്വേഷണത്തിൽ ഗുരുതര വീഴ്ചകളുണ്ടായിരുന്നുവെന്ന് റിപ്പോർട്ട് നൽകിയതോടെ ഈ ആരോപണങ്ങൾക്ക് കൂടുതൽ ബലം ലഭിച്ചു.

2024 സെപ്റ്റംബറിൽ സംസ്ഥാന പൊലീസ് മേധാവി കേസ് ക്രൈംബ്രാഞ്ചിന് കൈമാറി. കോഴിക്കോട് റേഞ്ച് ഐജി പി. പ്രകാശിന്റെ മേൽനോട്ടത്തിൽ ഡി.വൈ.എസ്.പി യു. പ്രേമൻ നേതൃത്വം നൽകുന്ന സംഘമാണ് അന്വേഷണം ഏറ്റെടുത്തത്. അതിന് മുമ്പ് ഒരു വർഷത്തിലേറെ പ്രവർത്തിച്ച പ്രത്യേക അന്വേഷണസംഘത്തിനും കേസിൽ നിർണായക സൂചനകൾ കണ്ടെത്താനായിരുന്നില്ല. മലപ്പുറം എസ്.പി എസ്. ശശിധരൻ കേസ് സി.ബി.ഐയ്ക്ക് കൈമാറണമെന്ന ശുപാർശ ഡി.ജി.പിക്ക് നൽകിയിരുന്നതായും റിപ്പോർട്ടുകളുണ്ട്.

ക്രൈംബ്രാഞ്ച് അന്വേഷണം ആരംഭിച്ചതിന് ശേഷം നൂറുകണക്കിന് ആളുകളെ ചോദ്യം ചെയ്തതായും സാമ്പത്തിക ഇടപാടുകൾ വിശദമായി പരിശോധിച്ചതായും റിപ്പോർട്ടുകളുണ്ട്. എന്നിരുന്നാലും ഇന്നുവരെ കേസിൽ വ്യക്തമായ പുരോഗതിയില്ല. മാമിയെ കണ്ടെത്താനായിട്ടില്ല. മൃതദേഹമോ വ്യക്തമായ തട്ടിക്കൊണ്ടുപോകൽ തെളിവുകളോ ലഭിച്ചിട്ടില്ല. ഇത് കൊലപാതകമാണോ, സാമ്പത്തിക വൈരാഗ്യത്തിന്റെ ഭാഗമായി നടന്ന അട്ടിമറിയാണോ, അല്ലെങ്കിൽ ആസൂത്രിതമായ അപ്രത്യക്ഷമാകലാണോ എന്നതിൽ ഇന്നും വ്യക്തതയില്ല.

ഇപ്പോൾ കേരളത്തിലെ ഏറ്റവും ദുരൂഹമായ തിരോധാന കേസുകളിലൊന്നായാണ് “മാമി കേസ്” പരിഗണിക്കപ്പെടുന്നത്. സോഷ്യൽ മീഡിയയിലും പൊതുചർച്ചകളിലും ഇത് ഇന്നും “അൺസോൾവ്ഡ് മിസ്റ്ററി”യായാണ് ഉയരുന്നത്. എന്നാൽ കുടുംബത്തിന് ഇത് ഒരു ദുരൂഹതയല്ല — അവസാനമില്ലാത്ത കാത്തിരിപ്പാണ്. രണ്ട് വർഷത്തിലേറെയായിട്ടും അവർ ഇന്നും അതേ ചോദ്യം ആവർത്തിക്കുകയാണ്: “മാമി എവിടെ?”