ഇ ശ്രീധരന്റെ കാൽകഴുകി, സാഷ്ടാംഗം പ്രണമിച്ച് പ്രവർത്തകർ; വിമർശനം രൂക്ഷം

പാലക്കാട്; ബിജെപി സ്ഥാനാർഥി ഇ ശ്രീധരന്റെ കാൽകഴുകി തുടയ്ക്കുന്ന പ്രവർത്തകന്റെ ചിത്രം പുറത്തുവന്നതിന് പിന്നാലെ സോഷ്യൽ മീഡിയയിൽ വിമർശനം രൂക്ഷമാകുന്നു. പ്രചാരണത്തിനെത്തിയ പാലക്കാട്ടെ സ്ഥാനാർഥി ശ്രീധരന്റെ കാൽ കഴുകുകയും സാഷ്ടാം​ഗം പ്രണമിക്കുകയും ചെയ്യുന്ന പ്രവർത്തകരുടെ ചിത്രങ്ങളാണ് ചർച്ചയാലുന്നത്.

രൂക്ഷ വിമർശനങ്ങളാണ് ഇതിനെതിരെ ഉയരുന്നത്. പ്രാചീന കാലത്തെ സാസ്കാരിക മൂല്യങ്ങളാണ് ചിത്രം ഉയര്‍ത്തുന്നതെന്നും ജാതീയതയും സവര്‍ണ മനോഭാവവുമാണ് ഇതിലൂടെ പ്രകടമാകുന്നതെന്നുമാണ് വിമർശനം. ചിത്രങ്ങൾ ഇടത്, കോണ്‍ഗ്രസ് അനുകൂല പ്രൊഫൈലുകളിത് വ്യാപകമായി പങ്കുവച്ചിട്ടുമുണ്ട്. എന്നാല്‍ വിവാദങ്ങളോട് പ്രതികരണത്തിനില്ലെന്ന നിലപാടിലാണ് ബിജെപി.

ഇ. ശ്രീധരന്‍റെ വരവോടെ ശക്തമായ ത്രികോണ മത്സരമാണ് പാലക്കാട് നടക്കുക. മൂന്നാമൂഴം തേടുന്ന കോണ്‍ഗ്രസിലെ ഷാഫി പറന്പിലും സിപിഎമ്മില്‍ നിന്നും സിപി. പ്രമോദുമാണ് മുഖ്യ എതിരാളികള്‍.