ശൈത്യകാല മഴയിൽ  57% കുറവ്  ; മഴയില്ലാതെ മൂന്ന് ജില്ലകൾ

തിരുവനന്തപുരം > സംസ്ഥാനത്ത് പെയ്ത ശൈത്യകാല മഴയിൽ ഇത്തവണ 57% കുറവ് രേഖപ്പെടുത്തി. ജനുവരി, ഫെബ്രുവരി മാസങ്ങളിലായി ശരാശരി 22.4 മില്ലിമീറ്റർ ലഭിക്കേണ്ട സ്ഥാനത്ത് ഇത്തവണ പെയ്തത് 9.6 മില്ലിമീറ്റർ മാത്രം. കഴിഞ്ഞ ശൈത്യകാലത്ത് 13.1 മില്ലിമീറ്റർ ലഭിച്ചിരുന്നു.

ഇത്തവണ ഏറ്റവും കൂടുതൽ മഴ ലഭിച്ചതു തിരുവനന്തപുരം ജില്ലയിലാണ് (51.1). കോഴിക്കോട്, പാലക്കാട്‌, തൃശൂർ ജില്ലകളിൽ മഴ ലഭിച്ചില്ല. തിരുവനന്തപുരം, ആലപ്പുഴ, എറണാകുളം, കണ്ണൂർ, കാസർകോട് ജില്ലകളിൽ കഴിഞ്ഞ വർഷത്തെക്കാൾ മഴ കിട്ടിയെന്നും കണക്കുകൾ സൂചിപ്പിക്കുന്നു. 

തിരുവനന്തപുരത്ത് കഴിഞ്ഞവർഷം 11.0 മില്ലിമീറ്റർ മഴ ലഭിച്ച സ്ഥാനത്ത് ഇത്തവണ 51.1 മില്ലിമീറ്റർ മഴയാണ് ലഭിച്ചത്. എറണാകുളത്ത് കഴിഞ്ഞ തവണ 7.2 മില്ലീമീറ്റർ മഴയാണ് ലഭിച്ചതെങ്കിൽ, ഇത്തവണ 36.9 മില്ലിമീറ്റർ മഴ പെയ്തു. ആലപ്പുഴയിൽ 2019 ൽ മൂന്നു മില്ലി മീറ്റർ മഴ കിട്ടിയപ്പോൾ ഇത്തവണ അത് 14.6 മില്ലി മീറ്ററായി ഉയർന്നു. 

അതേസമയം പത്തനംതിട്ടയിൽ  2019 ൽ 75.3 മില്ലിമീറ്റർ മഴ ലഭിച്ച സ്ഥാനത്ത് ഇത്തവണ പെയ്തത് 11.4 മില്ലിമീറ്റർ മാത്രം. ഇടുക്കിയിൽ കഴിഞ്ഞവർഷം 25.9 മില്ലിമീറ്റർ മഴയാണ് പെയ്തതെങ്കിൽ ഇത്തവണ ലഭിച്ചത് 4.5 മില്ലി മീറ്റർ മാത്രവും. വയനാട്ടിലും മഴ ​ഗണ്യമായി കുറഞ്ഞു.