'വയസ് താത്കാലികമായിരിക്കും പക്ഷേ ഭാര്യയുടെ കൈയിലെ മുട്ടന്‍ വടി അങ്ങനെ അല്ല!'- ചിരിപ്പിക്കും വീഡിയോ പങ്കിട്ട് സെവാഗ്

ന്യൂഡല്‍ഹി: കളിക്കുന്ന കാലത്ത് ബാറ്റ് കൊണ്ട് ആരാധകരെ ആനന്ദിപ്പിച്ച താരമാണ് മുൻ ഇന്ത്യൻ ഓപ്പണർ വീരേന്ദര്‍ സെവാഗ്. വിരമിച്ച ശേഷം സാമൂഹിക മാധ്യമങ്ങളിലൂടെ രസകരമായ കാര്യങ്ങള്‍ പങ്കു വയ്ക്കുന്നതിലും സെവാഗ് മുന്നിലാണ്. താരം പങ്കിടുന്ന വീഡിയോകളും കുറിപ്പുകളുമെല്ലാം ശ്രദ്ധേയമാകാറുണ്ട്. അത്തരമൊരു വീഡിയോയാണ് ഇപ്പോള്‍ ആരാധകര്‍ ഏറ്റെടുത്തിരിക്കുന്നത്. 

ഒരു ചടങ്ങില്‍ യുവാക്കളടക്കമുള്ളവര്‍ നൃത്തം ചെയ്യുമ്പോള്‍ ഒരു വയോധികന്‍ അവര്‍ക്കൊപ്പം കൂടി ഡാന്‍സ് കളിക്കുന്നതാണ് വീഡിയോ. ഡാന്‍സ് കളിക്കുന്ന ഈ പ്രായമുള്ള ആളുടെ അടുത്തേക്ക് അയാളുടെ ഭാര്യ മുട്ടന്‍ വടിയുമായി എത്തുന്നതോടെ കക്ഷി ഒട്ടും സമയം കളയാതെ അവിടെ നിന്ന് ഓടി രക്ഷപ്പെടുന്നതും വീഡിയോയിലുണ്ട്. 

ഈ വീഡിയോയ്ക്ക് സെവാഗ് നല്‍കിയ ക്യാപ്ഷനാണ് ശ്രദ്ധേയമാകുന്നത്. 'വയസ് താത്കാലികം മാത്രമാണ്. എന്നാല്‍ ഭാര്യയുടെ കൈയിലെ മുട്ടന്‍ വടി ശാശ്വതമാണ്'- എന്നായിരുന്നു വീരുവിന്റെ കുറിപ്പ്. എന്തായാലും വീഡിയോയും അതിന്റെ ക്യാപ്ഷനും വൈറലായി മാറിയിരിക്കുകയാണ്.