ജിമ്മിലെ പരിശീലനത്തിനിടെ കുഴഞ്ഞു വീണു; ബം​ഗാൾ യുവ ക്രിക്കറ്റ് താരത്തിന് ദാരുണാന്ത്യം

കൊൽക്കത്ത: ബം​ഗാൾ യുവ ക്രിക്കറ്റ് താരം ജമ്മിലെ പരിശീലനത്തിനിടെ കുഴഞ്ഞു വീണു മരിച്ചു. 22 വയസുള്ള പ്രിയജിത്ത് ഘോഷിനാണ് മരണം സംഭവിച്ചത്. വ്യായാമം ചെയ്യുന്നതിനിടെ താരത്തിനു ഹൃദയാഘാതമുണ്ടായി. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ബം​ഗാളിലെ ജില്ലാതല ടൂർണമെന്റുകളിൽ തിളങ്ങിയ പ്രിയജിത്ത് ബം​ഗാൾ രഞ്‍ജി ടീമിലേക്കുള്ള വിളി കാത്തു നിൽക്കുന്നതിനിടെയാണ് അപ്രതീക്ഷിത വിയോ​ഗം.

2018-19ൽ ബം​ഗാൾ ക്രിക്കറ്റ് അസോസിയേഷൻ സംഘടിപ്പിച്ച ജില്ലാ അണ്ടർ‌ 16 ടൂർണമെന്റിൽ ടോപ് സ്കോററായാണ് താരം ശ്രദ്ധേയനായത്. ബം​ഗാളിലെ ഭോൽപുരി സ്വദേശിയാണ്. നാട്ടിലെ ജിമ്മിൽ പരിശീലിക്കുന്നതിനിടെ പ്രിയജിത്തിനു ശരീരിക അസ്വസ്ഥകൾ ഉണ്ടായി. പിന്നാലെ കുഴഞ്ഞു വീണ് മരിക്കുകയായിരുന്നു. വരാനിരിക്കുന്ന ആഭ്യന്തര ക്രിക്കറ്റ് സീസണിനു മുന്നോടിയായുള്ള കഠിന പരിശീലനത്തിനിടെയായിരുന്നു താരം.

യുവ താരത്തിന്റെ അകാല വിയോ​ഗത്തിൽ ബം​ഗാൾ ക്രിക്കറ്റ് അസോസിയേഷൻ അനുശോചിച്ചു. പ്രയാസമേറിയ ഈ ഘട്ടത്തിൽ പ്രിയജിത്തിന്റെ കുടുംബത്തിനൊപ്പം നിൽക്കേണ്ട സമയമാണെന്നു ബം​ഗാൾ പ്രോ ടി20 ലീ​ഗ് എക്സിൽ കുറിച്ചു.