ഇന്ത്യ- പാക് പോരാട്ടം സെമിയിൽ അല്ലെങ്കിൽ ഫൈനലിൽ! ഏഷ്യൻ ​ഗെയിംസ് ക്രിക്കറ്റ് ചിത്രം തെളിഞ്ഞു

ടോക്യോ: ജപ്പാനിലെ ഐചി നാ​ഗോയയിൽ നടക്കുന്ന ഏഷ്യൻ ​ഗെയിംസ് ടി20 ക്രിക്കറ്റ് പോരാട്ടത്തിന്റെ ചിത്രം തെളിഞ്ഞു. ഇന്ത്യയുടെ പുരുഷ, വനിതാ ടീമുകൾ പങ്കെടുക്കുന്നുണ്ട്. ഇരു വിഭാ​ഗത്തിൽ ഇന്ത്യയാണ് നിലവിലെ സ്വർണ മെഡൽ ജേതാക്കൾ. സെപ്റ്റംബർ 19 മുതൽ ഒക്ടോബർ 4 വരെയാണ് ഏഷ്യൻ ​ഗെയിംസ് മത്സരങ്ങൾ. ഏഷ്യൻ ​ഗെയിംസിൽ ഇത് നാലാം തവണയാണ് ക്രിക്കറ്റ് മത്സരയിനമായി ഉൾപ്പെടുന്നത്. ​ഗെയിംസിൽ പുരുഷ ടീമിന്റെ മത്സരങ്ങൾ സെപ്റ്റംബർ 24 മുതലും വനിതകളുടെ പോരാട്ടം സെപ്റ്റംബർ 17നും ആരംഭിക്കും.

പുരുഷ വിഭാ​ഗത്തിൽ റാങ്കിങിൽ മുന്നിലുള്ള ഇന്ത്യ, പാകിസ്ഥാൻ, ബം​​ഗ്ലാദേശ്, ശ്രീലങ്ക ടീമുകൾ നേരിട്ട് ക്വാർട്ടറിലെത്തിയിട്ടുണ്ട്. ​ഗ്രൂപ്പ് ഘട്ടത്തിൽ അഫ്​ഗാനിസ്ഥാൻ, ജപ്പാൻ, നേപ്പാൾ എ ​ഗ്രൂപ്പിലും ഹോങ്കോങ് ചൈന, മലേഷ്യ, ഒമാൻ ടീമുകൾ ബി ​ഗ്രൂപ്പിലും കളിക്കും. ഈ രണ്ട് ​ഗ്രൂപ്പുകളിൽ നിന്നാണ് ശേഷിക്കുന്ന നാല് ടീമുകൾ ക്വാർട്ടറിലെത്തുക. ഓരോ ​ഗ്രൂപ്പിലേയും ആദ്യ രണ്ട് സ്ഥാനക്കാരാണ് ക്വാർട്ടർ കളിക്കുക.

ആരാധകർ പ്രതീക്ഷയോടെ കാത്തിരിക്കുന്ന ഇന്ത്യ- പാകിസ്ഥാൻ ബ്ലോക്ക്ബസ്റ്റർ പോരാട്ടം ​ഗെയിംസിൽ ഒരു തവണ മാത്രമാണ് സംഭവിക്കാൻ സാധ്യത കാണുന്നത്. അത് സെമി ഫൈനലിലോ അല്ലെങ്കിൽ ഫൈനലിലോ ആയിരിക്കും.

വനിതാ ടീം ക്വാർട്ടറിൽ ജപ്പാനെ നേരിടും. ഇതിൽ വിജയിച്ചാൽ ഹർമൻപ്രീത് കൗറും സംഘവും സെമിയിലെത്തും. ബം​ഗ്ലാദേശ്, ചൈന എന്നിവരുൾപ്പെട്ട പൂളിലാണ് ഇന്ത്യ കളിക്കുന്നത്. ഇതിൽ ഒരു ടീമായിരിക്കും സെമിയിൽ എതിരാളികൾ. മറ്റ് ക്വാർട്ടർ പോരാട്ടങ്ങളിൽ ശ്രീലങ്ക- മലേഷ്യയേയും പാകിസ്ഥാൻ തായ്ലൻഡിനേയും നേരിടും. ഈ മത്സരങ്ങളിൽ വിജയിക്കുന്നവർ രണ്ടാം സെമിയിൽ നേർക്കുനേർ വരും. വനിതാ വിഭാ​ഗത്തിലും ഇന്ത്യ- പാക് പോരാട്ടം സംഭവിക്കുകയാണെങ്കിൽ ഫൈനലിലായിരിക്കും.

പുരുഷ ടീമിനെ ശ്രേയസ് അയ്യരാണ് നയിക്കുന്നത്. തിലക് വർമയാണ് വൈസ് ക്യാപ്റ്റൻ. കൗമാര വിസ്മയം വൈഭവ് സൂര്യവംശി ഉൾപ്പെടെ 15 അം​ഗ ടീമിനെ ഇന്ത്യ തിരഞ്ഞെടുത്തിട്ടുണ്ട്. വനിതാ ടീം ക്യാപ്റ്റൻ ഹർമൻപ്രീത് കൗറും വൈസ് ക്യാപ്റ്റൻ സ്മൃതി മന്ധാനയും.