'പെൺകുട്ടിയെ ചുംബിച്ച് വൈഭവ് സൂര്യവംശി'! 15കാരൻ ഇന്ത്യൻ താരത്തിനു പോലും രക്ഷയില്ല

ചെന്നൈ: 15കാരൻ വണ്ടർ കി‍ഡ് ക്രിക്കറ്റ് താരം വൈഭവ് സൂര്യവംശിയേയും വെറുതെവിടാതെ വ്യാജ എഐ ചിത്രങ്ങൾ. ഒരു പെൺകുട്ടിയും വൈഭവ് സൂര്യവംശിയും ഒരുമിച്ചുള്ള വ്യാജ ചിത്രങ്ങളാണ് സമൂഹ മാധ്യമങ്ങളിൽ പ്രചരിക്കുന്നത്. പെൺകുട്ടിയെ വൈഭവ് ചുംബിക്കുന്ന ‘മിറർ സെൽഫി’ രൂപത്തിലുള്ള വ്യാജ ചിത്രമാണ് പ്രചരിക്കുന്നത്. ഇതിനെതിരെ കടുത്ത പ്രതിഷേധവും ഉയർന്നിട്ടുണ്ട്.

’വൈഭവ് സൂര്യവംശിക്കൊപ്പമുള്ള ഈ പെൺകുട്ടി ആരാണ്? ആരാധകർ വലിയ ആകാംക്ഷയിലാണ്, ഇന്റർനെറ്റിലെ ഏറ്റവും ചൂടേറിയ ചർച്ചാ വിഷയമായി ഇതു മാറിയിരിക്കുന്നു’- എന്ന കുറിപ്പ് സഹിതമാണ് പല പേജുകളിലും ചിത്രം പ്രചരിക്കുന്നത്.

കേവലം 15 വയസ് മാത്രം പ്രായമായ ഒരു താരത്തിന്റെ ഇത്തരത്തിലുള്ള വ്യാജ ചിത്രങ്ങൾ നിർമിക്കുന്നതിനെതിരേയും പ്രചരിപ്പിക്കുന്നതിനെതിരേയും വ്യാപക വിമർശനമാണ് ഉയരുന്നത്. അതേസമയം സംഭവത്തിൽ വൈഭവ് സൂര്യവംശിയോ അദ്ദേഹവുമായി അടുത്തു ബന്ധപ്പെട്ടവരോ വിഷയത്തിൽ ഇതുവരെ പ്രതികരിച്ചിട്ടില്ല.

ദുലീപ് ട്രോഫി ഫൈനലിൽ ഈസ്റ്റ് സോണിനു വേണ്ടി സൗത്ത് സോണിനെതിരെ കളിക്കുകയാണ് വൈഭവ് സൂര്യവംശി ഇപ്പോൾ. ടീമിന്റെ വൈസ് ക്യാപ്റ്റൻ കൂടിയാണ് താരം. ഫൈനലിന്റെ ആദ്യ ഇന്നിങ്സിൽ 44 റൺസെടുത്ത് പുറത്തായ താരത്തിന് രണ്ടാം ഇന്നിങ്സിൽ 16 പന്തിൽ‌ 8 റൺസെടുക്കാനെ സാധിച്ചുള്ളൂ.