ആര് തിരുത്തും ഈ റെക്കോര്‍ഡ്; ഐപിഎല്ലില്‍ സൂര്യവംശിക്ക് അപൂര്‍വ നേട്ടം; 'ഒറ്റയാള്‍ പട്ടാളം'

ഐപില്‍ രണ്ടാം ക്വാളിഫയര്‍ മത്സരത്തില്‍ ചരിത്രനേട്ടവുമായി രാജസ്ഥാന്‍ റോയല്‍സ് താരം വൈഭവ് സൂര്യവംശി. ഐപിഎല്ലിന്റെ ഒരു സീസണില്‍ 700 റണ്‍സ് തികയ്ക്കുന്ന ആദ്യ അണ്‍ക്യാപ്ഡ് (ഇതുവരെ ദേശീയ ടീമിനായി കളിക്കാത്ത) താരം എന്ന റെക്കോര്‍ഡാണ് ഈ പതിനഞ്ചുകാരന്‍ സ്വന്തമാക്കിയത്.

ഗുജറാത്ത് ടൈറ്റന്‍സിനെതിരെ ഇന്ന് റങ്ങുമ്പോള്‍ ഈ നാഴികക്കല്ലിലെത്താന്‍ ഈ യുവ ഇടംകൈയ്യന്‍ ബാറ്റര്‍ക്ക് 20 റണ്‍സ് കൂടി വേണമായിരുന്നു. നാലാം ഓവറിലെ രണ്ടാമത്തെ പന്തില്‍ റബാഡയെ ബൗണ്ടറി കടത്തിയാണ് ചരിത്ര നേട്ടം കൈവരിച്ചത്.

ന്യൂചണ്ഡീഗഡിലെ മഹാരാജ യാദവീന്ദ്ര സിങ് സ്റ്റേഡിയത്തിലെ ബാറ്റിങ്ങിന് ബുദ്ധിമുട്ടേറിയ പിച്ചില്‍ വെറും നാല് റണ്‍സിനാണ് വൈഭവിന് സെഞ്ച്വറി നഷ്ടമായത്. 47 പന്തുകള്‍ നേരിട്ട താരം 96 റണ്‍സെടുത്തു പുറത്തായി. ഏഴു സിക്‌സുകളും എട്ടു ഫോറുകളും ഉള്‍പ്പെടുന്നതാണ് വൈഭവിന്റെ ഇന്നിങ്‌സ്.