പരിക്ക് ഭേദമായി, ഇനി ഫിറ്റ്നസ് കടമ്പ മാത്രം; ഇന്ത്യൻ സ്‌ക്വാഡിലേക്ക് വാഷിങ്ടന്‍ സുന്ദർ വരും

ബെംഗളൂരു: ന്യൂസിലന്‍ഡിനെതിരായ ഏകദിന പരമ്പരയ്ക്കിടെ പരിക്കേറ്റ ഇന്ത്യന്‍ ഓൾ റൗണ്ടർ വാഷിങ്ടന്‍ സുന്ദർ തിരിച്ചു വരുന്നു. ബെംഗളൂരുവിലെ ബി സി സി ഐയുടെ സെന്റർ ഓഫ് എക്സലൻസ് (CoE)യിൽ നിലവിൽ താരം പരിശീലനവും ആരംഭിച്ചിട്ടുണ്ട്.

വാഷിങ്ടന്‍ സുന്ദർ ഫെബ്രുവരി 4ന് ഫിറ്റ്നസ് പരിശോധനയ്ക്ക് വിധേയനാകും. ഫിറ്റ്നസ് തെളിയിക്കാൻ കഴിഞ്ഞാൽ താരത്തിന് ഇന്ത്യയുടെ ടി20 ലോകകപ്പ് സ്‌ക്വാഡിൽ ഇടം നേടാം.

ജനുവരി 11ന് ന്യൂസിലൻഡിനെതിരായ ആദ്യ ഏകദിനത്തിലാണ് സുന്ദറിന് സൈഡ് സ്‌ട്രെയ്ൻ പരിക്ക് പറ്റിയത്. ഔദ്യോഗിക മെഡിക്കൽ റിപ്പോർട്ട് ലഭിക്കുന്നതുവരെ മറ്റൊരാളെ ടീമിൽ ഉൾപ്പെടുത്തേണ്ട എന്നായിരുന്നു ടീം മാനേജ്‍മെന്റ് നിലപാട്. ലോകകപ്പ് ടീമുകളിൽ മാറ്റങ്ങൾ വരുത്താനുള്ള അവസാന തീയതി ജനുവരി 30 ആണെങ്കിലും താരത്തെ തന്നെ ടീമിൽ നിലനിർത്താനാണ് ബി സി സി ഐ തീരുമാനം.

ലോകകപ്പിനുള്ള ഇന്ത്യൻ ടീം ഫെബ്രുവരി 3ന് മുംബൈയിൽ എത്തി പരിശീലനം ആരംഭിക്കും. ഫെബ്രുവരി 4ന് ദക്ഷിണാഫ്രിക്കയ്‌ക്കെതിരെയാണ് ആദ്യ സന്നാഹ മത്സരം.

ഫിറ്റ്നസ് പരിശോധനയിലൂടെ സുന്ദറിന്റെ ലോകകപ്പ് പ്രവേശനവുമായി ബന്ധപ്പെട്ട കൃത്യമായ ധാരണ ബി സി സി ഐയ്ക്ക് ലഭിക്കും. ഇതിന് ശേഷമാകും എന്ന് ടീമിനൊപ്പം ചേരണം എന്ന കാര്യത്തിൽ ടീം മാനേജ്‍മെന്റ് അന്തിമ തീരുമാനം എടുക്കുകയുള്ളു.