വനിതാ ലോകകപ്പിൽ പാകിസ്ഥാന് വീണ്ടും തോൽവി; ഓസ്ട്രേലിയയ്ക്ക് മിന്നും ജയം, മൂണിക്ക് സെഞ്ച്വറി

കൊളംബോ: വനിതാ ഏകദിന ലോകകപ്പില്‍ പാകിസ്ഥാനെതിരെ ഓസ്ട്രേലിയയ്ക്ക് വിജയം. പാകിസ്ഥാനെ 107 റൺസിനാണ് ഓസീസ് വനിതകൾ പരാജയപ്പെടുത്തിയത്. ഓസ്ട്രേലിയ മുന്നോട്ടുവെച്ച 222 റണ്‍സ് വിജയലക്ഷ്യം തേടി ബാറ്റുചെയ്ത പാകിസ്ഥാൻ 114 റണ്‍സിന് ഓള്‍ഔട്ടായി. 35 റൺസെടുത്ത സിദ്ര അമീൻ മാത്രമാണ് പാകിസ്ഥാനായി അൽപ്പമെങ്കിലും ചെറുത്തു നിന്നത്.

വിജയം തേടി ബാറ്റ് ചെയ്യാനിറങ്ങിയ പാകിസ്ഥാന്റെ തുടക്കം തകർച്ചയോടെയായിരുന്നു. 31 റണ്‍സിനിടെ അഞ്ചു വിക്കറ്റുകളാണ് നഷ്ടമായത്. ക്യാപ്റ്റന്‍ ഫാത്തിമ സന 11 റണ്‍സെടുത്ത് പുറത്തായി. ഒരു വശത്ത് വിക്കറ്റുകള്‍ വീഴുമ്പോഴും സിദ്ര ആമിന്‍ ചെറുത്തു നിന്നതാണ് പാകിസ്ഥാനെ വൻ നാണക്കേടിൽ നിന്നും രക്ഷിച്ചത്. ഓസ്‌ട്രേലിയയ്ക്കായി കിം ഗാര്‍ത്ത് മൂന്നുവിക്കറ്റെടുത്തു.

ആദ്യം ബാറ്റുചെയ്ത ഓസ്‌ട്രേലിയ നിശ്ചിത അമ്പത് ഓവറില്‍ ഒന്‍പത് വിക്കറ്റ് നഷ്ടത്തില്‍ 221 റണ്‍സാണെടുത്തത്. ഒരു ഘട്ടത്തില്‍ ഏഴ് വിക്കറ്റ് നഷ്ടത്തില്‍ 76 റണ്‍സെന്ന നിലയിലായിരുന്നു ഓസ്‌ട്രേലിയ. ബെത്ത് മൂണിയുടെ ഒറ്റയാള്‍ പോരാട്ടമാണ് ഓസീസ് സ്‌കോര്‍ 200-കടത്തിയത്. ഓസ്‌ട്രേലിയയ്ക്കായി ബെത്ത് മൂണി സെഞ്ച്വറിയോടെ തിളങ്ങി. മൂണി 114 പന്തില്‍ നിന്ന് 109 റണ്‍സെടുത്ത് പുറത്തായി. അലാന 49 പന്തില്‍ നിന്ന് 51 റണ്‍സെടുത്തു.