'ഏഴാം സ്ഥാനത്തല്ല ഇറങ്ങേണ്ടത് നാല്, അഞ്ച് സ്ഥാനങ്ങളിൽ; എന്നിട്ട് ടീമിനെ മുന്നിൽ നിന്ന് നയിക്കു'- ധോനിയോട് ​ഗംഭീർ

ന്യൂഡൽഹി: ഐപിഎല്ലിൽ ചെന്നൈ സൂപ്പർ കിങ്സ് നായകനെന്ന നിലയിൽ എംഎസ് ധോനി ഏഴാം സ്ഥാനത്ത് ബാറ്റിങിന് ഇറങ്ങുന്നതിനെ വിമർശിച്ച് മുൻ ഇന്ത്യൻ ഓപ്പണർ ​ഗൗതം ​ഗംഭീർ. ധോനി ടീമിനെ മുന്നിൽ നിന്ന് നയിക്കണമെന്ന് ഗംഭീർ വ്യക്തമാക്കി. 

ധോനി ബാറ്റിങ് ഓർഡറിൽ  നാലാമതോ അഞ്ചാമതോ ഇറങ്ങണം. ഏഴാം സ്ഥാനത്തിറങ്ങി ധോനിക്ക് ടീമിനെ നയിക്കാനാവില്ലെന്നും ​ഗംഭീർ തുറന്നടിച്ചു. ചെന്നൈയുടെ ബൗളിങ് നിരയിൽ ചില പ്രശ്നങ്ങളുണ്ടെന്നും ​ഗംഭീർ വ്യക്തമാക്കി. ഒരു ടെലിവിഷൻ ഷോയിൽ സംസാരിക്കവേയാണ് ​ഗംഭീർ ഇക്കാര്യം വ്യക്തമാക്കിയത്. 

'നായകൻ എപ്പോഴും മുന്നിൽ നിന്ന് നയിക്കുന്നവനാകണം. ഏഴാം സ്ഥാനത്ത് ബാറ്റിനിറങ്ങി ടീമിനെ നയിക്കാൻ ധോനിക്ക് കഴിയില്ല. ഇക്കാര്യം പലതവണ നമ്മൾ ചർച്ച ചെയ്തിട്ടുണ്ട്. ആ​ഗ്രഹിക്കുന്ന പോലെ ​ഗ്രൗണ്ടിന്റെ ഏത് ഭാ​ഗത്തേക്കും പന്ത് പായിക്കാൻ കഴിയുന്ന പഴയ ധോനിയല്ല ഇപ്പോൾ അദ്ദേഹം. അതുകൊണ്ടുതന്നെ അദ്ദേഹം ബാറ്റിങ് ഓർഡറിൽ നേരത്തെ ഇറങ്ങണം. എന്റെ അഭിപ്രായത്തിൽ അദ്ദേഹം നാലാമതോ അഞ്ചാമതോ ഇറങ്ങണം. അതിൽ താഴേക്ക് പോകരുത്'- ​ഗംഭീർ വ്യക്തമാക്കി. 

ഐപിഎല്ലിലെ ഡൽഹിക്കെതിരായ ആദ്യ മത്സരത്തിൽ ധോനി രണ്ട് പന്ത് നേരിട്ട് റണ്ണെടുക്കാതെ പുറത്തായിരുന്നു. 190 റൺസിനടുത്ത് സ്കോർ ചെയ്തിട്ടും ചെന്നൈക്ക് ജയിക്കാനുമായില്ല. കഴിഞ്ഞ സീസണിലും ധോനിക്ക് കാര്യമായി തിളങ്ങാനായില്ല.