അഹമ്മദാബാദ്: ഇംഗ്ലണ്ടിനെതിരായ ആദ്യ ടി20 പോരാട്ടത്തില്‍ 125 റണ്‍സ് വിജയ ലക്ഷ്യം മുന്നില്‍ വച്ച് ഇന്ത്യ. ആദ്യം ബാറ്റ് ചെയ്ത 20 ഓവറില്‍ ഏഴ് വിക്കറ്റ് നഷ്ടത്തില്‍ 124 റണ്‍സെടുത്തു. അര്‍ധ സെഞ്ച്വറിയുമായി പൊരുതിയ ശ്രേയസ് അയ്യരുടെ ബാറ്റിങ് കരുത്തിലാണ് ഇന്ത്യ ഈ സ്‌കോറിലെത്തിയത്. ശ്രേയസ് 48 പന്തില്‍ എട്ട് ഫോറും ഒരു സിക്‌സും സഹിതം 67 റണ്‍സെടുത്തു.
ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ തുടക്കത്തില്‍ തന്നെ തകര്‍ന്നു. സ്‌കോര്‍ ബോര്‍ഡില്‍ മൂന്ന് റണ്‍സ് ചേര്‍ക്കുന്നതിനിടെ രണ്ട് വിക്കറ്റുകള്‍ ഇന്ത്യക്ക് നഷ്ടമായി. സ്‌കോര്‍ രണ്ടില്‍ നില്‍ക്കേ ഒരു റണ്‍സെടുത്ത കെഎല്‍ രാഹുലാണ് ആദ്യം പുറത്തായത്. തൊട്ടുപിന്നാലെ ഇന്ത്യന്‍ ക്യാപ്റ്റന്‍ വിരാട് കോഹ്ലി പൂജ്യം റണ്‍സില്‍ മടങ്ങി. ആര്‍ച്ചറാണ് രാഹുലിനെ പുറത്താക്കിയത്. രാഹുലിന് പകരമെത്തിയ കോഹ്ലി വന്ന വേഗത്തില്‍ തന്നെ കൂടാരം കയറുകയായിരുന്നു. പിന്നാലെ സ്‌കോര്‍ 20ല്‍ നില്‍ക്കേ ധവാനും പുറത്തായി. കോഹ്ലിയെ ആദില്‍ റഷീന്റെ പന്തില്‍ ക്രിസ് ജോര്‍ദാന്‍ ക്യാച്ചെടുത്ത് മടക്കുകയായിരുന്നു. മാര്‍ക്ക് വുഡാണ് ധവാനെ പുറത്താക്കിയത്.
പിന്നീട് ക്രീസിലെത്തിയ ഋഷഭ് പന്തും ശ്രേയസ് അയ്യരും ചേര്‍ന്ന് ഇന്നിങ്‌സ് നേരെയാക്കാന്‍ ശ്രമം നടത്തി. എന്നാല്‍ മികച്ച രീതിയില്‍ ബാറ്റ് വീശിയ പന്തിന്റെ പുറത്താകല്‍ ഇന്ത്യക്ക് തിരിച്ചടിയായി. പന്ത് രണ്ട് ഫോറും ഒരു സിക്‌സും സഹിതം 23 റണ്‍സെടുത്ത് മടങ്ങി.
ഒരറ്റത്ത് ശ്രേയസ് അയ്യര്‍ പിടിച്ചു നിന്ന് പൊരുതിയതാണ് ഇന്ത്യക്ക് കരുത്തായത്. ഹര്‍ദ്ദിക് പാണ്ഡ്യ 19 റണ്‍സെടുത്തു. അവസാന ഓവറിലാണ് ശ്രേയസ് മടങ്ങിയത്. ശാര്‍ദ്ദുല്‍ ഠാക്കൂര്‍ പൂജ്യത്തിന് പുറത്തായി. വാഷിങ്ടന്‍ സുന്ദര്‍ മൂന്ന് റണ്‍സും അക്ഷര്‍ പട്ടേല്‍ ഏഴ് റണ്‍സുമായും പുറത്താകാതെ നിന്നു.
ഇന്ത്യ രോഹിത് ശര്‍മയ്ക്ക് വിശ്രമം അനുവദിച്ചു. പകരം ശിഖര്‍ ധവാനും കെഎല്‍ രാഹുലും ചേര്‍ന്നാണ് ഇന്നിങ്‌സ് ഓപ്പണ്‍ ചെയ്തത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
