മുംബൈ: പ്രമുഖ വാഹന നിര്‍മ്മാതാക്കളായ മഹീന്ദ്രയുടെ പുതിയ എക്‌സ് യുവി 3എക്‌സ്ഒ സിഎന്‍ജി വേര്‍ഷന്‍ നാളെ വിപണിയില്‍ അവതരിപ്പിക്കും. ഈ മിഡ് സ്‌പെസിഫിക്ക് വേരിയന്റിന്റെ വില നാളെ പ്രഖ്യാപിക്കും.

വാഹനത്തിന്റെ ബൂട്ടിലാണ് ഡ്യുവല്‍ സിഎന്‍ജി സിലിണ്ടര്‍ ക്രമീകരിച്ചിരിക്കുന്നത്. ഈ മോഡലിന് 1.2 ലിറ്റര്‍ പെട്രോള്‍ എന്‍ജിനാണ് കരുത്തുപകരുന്നത്. എങ്കിലും ഇത് T-GDi യൂണിറ്റ് ആയിരിക്കുമോ അതോ TCMPFi യൂണിറ്റ് ആയിരിക്കുമോ എന്ന കാര്യത്തില്‍ അവ്യക്തത നിലനില്‍ക്കുന്നുണ്ട്. നെക്‌സോണിന് ശേഷം ഇത്രയും വൈവിധ്യമാര്‍ന്ന പവര്‍ട്രെയിന്‍ ഓപ്ഷനുകള്‍ വാഗ്ദാനം ചെയ്യുന്ന ഈ സെഗ്മന്റിലെ രണ്ടാമത്തെ കാറായിരിക്കും ഇത്.

ഇലക്ട്രിക് സിംഗിള്‍- പെയ്ന്‍ സണ്‍റൂഫ്, 10.25 ഇഞ്ച് ടച്ച്‌സ്‌ക്രീന്‍ യൂണിറ്റ്, ഫാബ്രിക് അപ്പഹോള്‍സ്റ്ററി, ത്രീ സ്‌പോക്ക് സ്റ്റിയറിങ് വീല്‍, 16 ഇഞ്ച് അലോയ് വീലുകള്‍, എന്‍ജിന്‍ സ്റ്റാര്‍ട്ട്- സ്‌റ്റോപ്പ് ബട്ടണ്‍, പെട്രോള്‍, സിഎന്‍ജി മോഡുകള്‍ക്കിടയില്‍ മാറുന്നതിനുള്ള പ്രത്യേക സ്വിച്ച് എന്നിവയുള്‍പ്പെടെയുള്ള ഫീച്ചറുകളോടെയാണ് ഈ മോഡല്‍ വിപണിയില്‍ എത്തുന്നത്.