ന്യൂഡല്‍ഹി: പ്രമുഖ വാഹന നിര്‍മ്മാതാക്കളായ റെനോയുടെ എസ് യുവി മോഡലായ ട്രൈബറിന്റെ അപ്‌ഡേറ്റ് വേര്‍ഷന്‍ സെപ്റ്റംബര്‍ അവസാനം വിപണിയില്‍. മുന്‍ പതിപ്പിനെ അപേക്ഷിച്ച് കരുത്തുറ്റ എന്‍ജിനാണ് പുതിയ മോഡലിന്റെ ഏറ്റവും വലിയ പ്രത്യേകത.

നാച്ചുറലി ആസ്പിറേറ്റഡ് 1.0 ലിറ്റര്‍ പെട്രോള്‍ എന്‍ജിന് പകരം ടര്‍ബോ പെട്രോള്‍ എന്‍ജിനുമായാണ് വിപണിയില്‍ എത്തുക. നിറയെ യാത്രക്കാരും ലഗേജുകളുമായുള്ള യാത്രയ്ക്ക് പഴയ എന്‍ജിന്‍ പോരാ എന്ന വിലയിരുത്തലിന്റെ അടിസ്ഥാനത്തിലാണ് പുതിയ എന്‍ജിന്‍ വരുന്നത്. റെനോ കിഗറില്‍ ഉപയോഗിച്ചിരിക്കുന്ന അതേ എച്ച്ആര്‍10 ടര്‍ബോ പെട്രോള്‍ എന്‍ജിനാണ് പുതിയ മോഡലിന് കരുത്തുപകരുക.

പുതിയ എന്‍ജിന്‍ ക്രമീകരിക്കുന്നതിന് ആവശ്യമായ പ്ലാറ്റ്‌ഫോമും റെനോ വികസിപ്പിച്ചിട്ടുണ്ട്. റെനോ ഗ്രൂപ്പ് എന്‍ട്രി പ്ലാറ്റ്‌ഫോം എന്ന പേരിലാണ് പുതിയ പ്ലാറ്റ്‌ഫോം അവതരിപ്പിക്കുന്നത്. പുതിയ എന്‍ജിന്‍ 99 ബിഎച്ച്പി കരുത്തും 160 എന്‍എം ടോര്‍ക്കും ഉല്‍പ്പാദിപ്പിക്കും. 1.0 ലിറ്റര്‍, ത്രീ സിലിണ്ടര്‍ ടര്‍ബോ ചാര്‍ജ്ഡ് യൂണിറ്റാണ് എന്‍ജിനിലുള്ളത്. ഫൈവ് സ്പീഡ് മാനുവല്‍, സിവിടി ഓട്ടോമാറ്റിക് ഗിയര്‍ബോക്‌സ് ഓപ്ഷനുകളില്‍ വാഹനം ലഭ്യമാകും.

കൂടാതെ സിഎന്‍ജി പതിപ്പും പ്രതീക്ഷിക്കുന്നുണ്ട്. സബ് ഫോര്‍ മീറ്റര്‍ എംപിവി വിഭാഗത്തില്‍ വരുന്ന വാഹനത്തിന് നിലവിലെ പതിപ്പിനെ അപേക്ഷിച്ച് 80,000 രൂപ മുതല്‍ 90,000 രൂപ വരെ അധിക വില വരുമെന്നാണ് കരുതുന്നത്. നിലവിലെ പതിപ്പിന് 5.81 ലക്ഷം രൂപ മുതല്‍ 8.69 ലക്ഷം രൂപ വരെയാണ് വില വരുന്നത്. ടര്‍ബോ സിവിടി വേര്‍ഷന് ഇതില്‍ കൂടുതല്‍ വില വരും.