ന്യൂഡല്ഹി: ഇന്ത്യയുടെ എഥനോള് കലര്ത്തിയ ഇന്ധന പദ്ധതി ഉപഭോക്താക്കള്ക്ക് സുരക്ഷിതവും സാമ്പത്തികമായി ലാഭകരവുമാണെന്ന് കേന്ദ്രസര്ക്കാര്. 20 ശതമാനം എഥനോള് കലര്ത്തിയ പെട്രോള് (E20) ഉപയോഗിക്കുന്നത് വാഹന ഇന്ഷുറന്സ് ക്ലെയിമുകളെ ബാധിച്ചേക്കാമെന്ന ആശങ്കകള് സര്ക്കാര് തള്ളി.
ഇ20 ഇന്ധനം ഉപയോഗിക്കുന്ന വാഹനങ്ങള്ക്ക് ഇന്ഷുറന്സ് പരിരക്ഷ നഷ്ടപ്പെടുമെന്നായിരുന്നു പ്രചാരണം. ഈ വിഷയത്തില് ബന്ധപ്പെട്ട പങ്കാളികളുമായി ചേര്ന്ന് പരിശോധിക്കുകയും പ്രചാരണങ്ങള് തെറ്റാണെന്ന് കണ്ടെത്തുകയും ചെയ്തതായും പെട്രോളിയം, പ്രകൃതിവാതക മന്ത്രാലയം അറിയിച്ചു.'ഇന്ധനത്തില് എഥനോള് കലര്ത്തല് എന്നത് ആഗോളതലത്തില് അംഗീകരിക്കപ്പെട്ട ഒരു രീതിയാണ്. അമേരിക്ക, ബ്രസീല്, ജപ്പാന് എന്നിവയുള്പ്പെടെ നിരവധി രാജ്യങ്ങളില് ഇത് വിജയകരമായി നടപ്പിലാക്കിയിട്ടുണ്ട്,'- മന്ത്രാലയം വ്യക്തമാക്കി. ബ്രസീലില് വര്ഷങ്ങളായി ഉയര്ന്ന അളവില് എഥനോള് കലര്ത്തിയ ഇന്ധനമാണ് ഉപയോഗിക്കുന്നതെന്നും അവിടെ സാധാരണ പെട്രോള് മിശ്രിതം ഇ27 (E27) ആണെന്നും മന്ത്രാലയം ചൂണ്ടിക്കാട്ടി.
ക്രൂഡ് ഓയില് ഇറക്കുമതിയെ ആശ്രയിക്കുന്നത് കുറച്ചതിലൂടെ, എഥനോള് കലര്ത്തിയ ഇന്ധന പദ്ധതി ഇന്ത്യയ്ക്ക് 1.4 ലക്ഷം കോടിയിലധികം രൂപയുടെ വിദേശനാണ്യം ലാഭിക്കാന് സഹായിച്ചതായും സര്ക്കാര് പറഞ്ഞു. ഈ പദ്ധതി എഥനോള് ഉല്പ്പാദനത്തിനായി ഉപയോഗിക്കുന്ന കാര്ഷിക അസംസ്കൃത വസ്തുക്കള്ക്ക് സ്ഥിരമായ ആവശ്യം സൃഷ്ടിച്ചുവെന്നും ഇത് കര്ഷകരെ സഹായിക്കുകയും ഗ്രാമീണ സമ്പദ്വ്യവസ്ഥയ്ക്ക് പിന്തുണ നല്കുകയും ചെയ്യുന്നുണ്ടെന്നും സര്ക്കാര് കൂട്ടിച്ചേര്ത്തു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates