ഗതാഗതക്കുരുക്കില്‍ പെട്ടു കിടക്കുമ്പോള്‍ , ഒന്ന് പറക്കുന്ന കാറായിരുന്നുവെങ്കില്‍ എന്ന് തോന്നിയിട്ടുണ്ടോ ? ആ തോന്നലിന് യുഎസില്‍ നിന്നൊരു സന്തോഷകരമായ വാര്‍ത്ത വരുന്നുണ്ട്. ഗതാഗതക്കുരുക്കിന്  മുകളിലൂടെ യാത്രക്കാരുമായി പറന്ന് നീങ്ങുന്ന ചെറു വിമാനങ്ങള്‍ വിമാന നിര്‍മ്മാതാക്കളായ ബോയിങാണ് പുറത്തിറക്കുന്നത്. പാസഞ്ചര്‍ എയര്‍ വെഹിക്കിള്‍ എന്നാണ് ഈ പറക്കും കാറിനിട്ട പേര്. പൈലറ്റ് വേണ്ടാത്ത പിഎവി ഒരു മിനിറ്റോളമാണ് പരീക്ഷണപ്പറക്കല്‍ നടത്തിയത്.

ഹെലികോപ്ടറിന്റെയും ഡ്രോണിന്റെയും സവിശേഷതകള്‍ ഇതില്‍ കൂടിച്ചേര്‍ന്നിട്ടുണ്ട്. വാഹനത്തിന്റെ ബോഡി ഒരു ബേസില്‍ ഘടിപ്പിച്ചിട്ടുണ്ട്. ഈ ബേസിലുള്ള പ്രൊപ്പല്ലറുകളാണ് ടേക്ക് ഓഫിനും ലാന്‍ഡിങിനും സഹായിക്കുന്നത്. 

 80 കിലോമീറ്റര്‍ ദൂരം ഒറ്റപ്പറക്കലില്‍ താണ്ടാനാവുമെന്നാണ് ബോയിങ് അവകാശപ്പെടുന്നത്. രണ്ടുപേര്‍ക്കും നാലുപേര്‍ക്കും സഞ്ചരിക്കാവുന്ന മോഡലുകളാണ് ഇപ്പോള്‍ നിര്‍മ്മിച്ചിരിക്കുന്നത്. 

 കാര്‍ഗോ വിതരണത്തിനും ആബുലന്‍സായും ടാക്‌സിയായും ഈ പറക്കും കാറുകളെ ഉപയോഗപ്പെടുത്താനാവും. ഇവയുടെ സുരക്ഷകൂടി ഉറപ്പ് വരുത്തി, കുറേക്കൂടി മെച്ചപ്പെട്ട സാങ്കേതിക വിദ്യയുമായി മാത്രമേ പുറത്തിറക്കുകയുള്ളൂ.