ന്യൂഡല്‍ഹി: വിവോ സബ് ബ്രാന്‍ഡ് ആയ ഐക്യൂഒഒ അടുത്ത ഫ്‌ലാഗ്ഷിപ്പ് മോഡല്‍ നാളെ ചൈനയില്‍ അവതരിപ്പിക്കും. ഐക്യൂഒഒ 16 എന്ന പേരിലുള്ള മോഡലില്‍ വലിയ ഡിസൈന്‍ മാറ്റങ്ങള്‍ ഉണ്ടാവുമെന്നാണ് കരുതുന്നത്. ഈ വര്‍ഷം അവസാനത്തോടെ ഇന്ത്യന്‍ വിപണിയില്‍ അവതരിപ്പിക്കുമെന്ന് കരുതുന്ന മോഡലിന് ഇന്ത്യയില്‍ 80,000നും 89,000നും ഇടയില്‍ വില ഉണ്ടാവുമെന്നാണ് റിപ്പോര്‍ട്ടുകള്‍ പറയുന്നത്.

ചതുരാകൃതിയിലുള്ള ഫ്രെയിമിനുള്ളില്‍ സ്ഥാപിച്ചിരിക്കുന്ന മൂന്ന് സെന്‍സറുകളുള്ള പുതിയ കാമറ ഡിസൈന്‍ ആണ് ഏറ്റവും വലിയ പ്രത്യേകത. ഫോണിന്റെ പിന്‍ഭാഗത്ത് ജ്യാമിതീയ പാറ്റേണുകളും ഹോളോഗ്രാഫിക് ഫിനിഷും ഉണ്ട്. ചേസിങ് ലൈറ്റ് വേരിയന്റില്‍ ഫോണ്‍ ചരിക്കുമ്പോള്‍ ചലിക്കുന്നതായി തോന്നുന്ന ചുവപ്പ് ഹോളോഗ്രാഫിക് പാറ്റേണുകളും നീല വെളിച്ചത്തിന്റെ ഇഫക്ടുകളും ഉള്‍പ്പെടുന്ന ലേസര്‍ ഹോളാഗ്രാഫിക് ഇമേജിങ് ഫിനിഷ് ആണ് മറ്റൊരു സവിശേഷത. 165 hz റിഫ്രഷ് റേറ്റ് ഉള്ള 6.85 ഇഞ്ച് ഫ്‌ലാറ്റ് OLED ഡിസ്‌പ്ലേയുമാണ് ഫോണ്‍ വരുന്നത്. ക്വാല്‍കോമിന്റെ സ്‌നാപ്ഡ്രാഗണ്‍ 8 എലൈറ്റ് ജെന്‍ 6 പ്രോ ചിപ്‌സെറ്റ് ആണ് ഇതിന് കരുത്തുപകരുന്നത്. കൂടാതെ ഇതില്‍ 16 ജിബി വരെ റാമും ഒരു ടിബി വരെ സ്‌റ്റോറേജ് ഓപ്ഷനുകളും ഉണ്ട്.

50 എംപി പ്രൈമറി സെന്‍സര്‍, 50 എംപി അള്‍ട്രാവൈഡ് കാമറ, 50 എംപി പെരിസ്‌കോപ്പ് ടെലിഫോട്ടോ കാമറ എന്നിവയാണ് കാമറ വിഭാഗത്തില്‍ വരുന്നത്. മുന്‍വശത്ത് സെല്‍ഫികള്‍ക്കായും വിഡിയോ കോളുകള്‍ക്കുമായി 50 എംപി സെന്‍സറുമായാണ് ഇത് വരുന്നത്. 100w വയര്‍ഡ് ഫാസ്റ്റ് ചാര്‍ജിങ്ങും വയര്‍ലെസ് ചാര്‍ജിങ് ശേഷിയും ലഭിച്ചേക്കാവുന്ന 8500 എംഎഎച്ച് സിലിക്കണ്‍ കാര്‍ബര്‍ ബാറ്ററിയാണ് മറ്റൊരു പ്രത്യേകത.