മുംബൈ: പ്രമുഖ സ്മാർട്ട്‌ഫോൺ നിർമ്മാതാക്കളായ സാംസങ് അടുത്ത തലമുറ ഫോൾഡബിൾ ഫോണുകളായ ഗാലക്‌സി ഇസഡ് ഫ്‌ലിപ്പ് 8, ഗാലക്സി ഇസഡ് ഫോൾഡ് 8 എന്നിവ ജൂലൈ 22ന് വിപണിയിൽ അവതരിപ്പിക്കുമെന്ന് റിപ്പോർട്ട്. പുസ്തകത്തിന്റെ മാതൃകയിലുള്ള ഫോൾഡബിൾ ഫോണിന്റെ കൂടുതൽ വീതിയുള്ള പുതിയൊരു പതിപ്പായിരിക്കും ഇതെന്നാണ് സൂചന. ഈ ഫോണുകളെ കുറിച്ചുള്ള ഔദ്യോഗിക വിവരങ്ങൾ കമ്പനി ഇതുവരെ പുറത്തുവിട്ടിട്ടില്ല.

വരാനിരിക്കുന്ന ഈ ഫ്‌ലിപ്പ്-സ്‌റ്റൈൽ ഫോൾഡബിൾ ഫോണിന് ഏകദേശം 1,19,999 രൂപയായിരിക്കും വിലയെന്ന് പറയപ്പെടുന്നു. ഫ്‌ലിപ്പ് 8ന് 120Hz റിഫ്രഷ് റേറ്റുള്ള 6.9 ഇഞ്ച് ഇന്നർ സ്‌ക്രീൻ ഉണ്ടായിരുന്നേക്കാം. കവർ ഡിസ്പ്ലേ 4.1 ഇഞ്ച് ആയേക്കാം. പ്രവർത്തനക്ഷമതയുടെ കാര്യത്തിൽ, ഈ ഫോൺ എക്സിനോസ് 2600 (Exynos 2600) ചിപ്സെറ്റ് കരുത്തോടെയായിരിക്കും എത്തുകയെന്നും 25W ഫാസ്റ്റ് ചാർജിങ് പിന്തുണയുള്ള 4,300mAh ബാറ്ററി ഇതിൽ ഉൾപ്പെടുത്തിയേക്കുമെന്നും പറയപ്പെടുന്നു.

ഗാലക്സി ഇസഡ് ഫ്‌ലിപ്പ് 8ൽ ഡ്യുവൽ റിയർ കാമറ സെറ്റപ്പ് ഉണ്ടായിരിക്കുമെന്നാണ് പ്രതീക്ഷിക്കുന്നത്. ഇതിൽ 50MP പ്രൈമറി ലെൻസും 12MP അൾട്രാ വൈഡ് ലെൻസും ഉൾപ്പെട്ടേക്കാം. സെൽഫികൾക്കായി, ഫോണിൽ 10MP ഫ്രണ്ട് കാമറ നൽകാനാണ് സാധ്യത. സാംസങ്ങിന്റെ നിലവിലെ ഗാലക്‌സി ഇസഡ് ഫോൾഡ് മോഡലുകളേക്കാൾ വീതിയുള്ളതായിരിക്കും ഇസഡ് ഫോൾഡ് 8 എന്നാണ് റിപ്പോർട്ടുകൾ വ്യക്തമാക്കുന്നത്.