വീടു വൃത്തിയാക്കുമ്പോൾ ബാത്‌റൂമും ഡ്രസ്സിങ് ടേബിളും വൃത്തിയാക്കുമെങ്കിലും അവിടെയുള്ള സാധാനങ്ങളുടെ കാലാവധി പരിശോധിക്കാൻ നമ്മൾ വിട്ടുപോകാറുണ്ട്. മാസങ്ങളായി ഉപയോഗിക്കാതെ കിടക്കുന്ന ക്രീമുകൾ, പകുതി ഉപയോഗിച്ച ഷാംപൂ, പഴയ മേക്കപ്പ് സാധനങ്ങൾ, കാലാവധി കഴിഞ്ഞ മരുന്നുകൾ തുടങ്ങി പലതും നമ്മുടെ ബാത്റൂമിലും ഡ്രസ്സിങ് ടേബിളിലും ഉണ്ടാകാം. ഇവയിൽ ചിലത് ഉപയോഗിക്കുന്നത് ചർമത്തിൽ അസ്വസ്ഥതകൾക്കും അണുബാധയ്ക്കും മറ്റ് ആരോഗ്യപ്രശ്നങ്ങൾക്കും കാരണമാകാം.

ആരോ​ഗ്യ വാർത്തകൾ കൂടുതൽ അറിയാൻ വാട്സ്ആപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

പഴയ ഫേസ് ക്രീമുകളും മോയ്സ്ചറൈസറുകളും

കാലാവധി കഴിഞ്ഞ ക്രീമുകളും അവയുടെ പാക്കറ്റുകളും ഡ്രസ്സിങ് ടേബിളിൽ കിടക്കാറുണ്ട്. കാലാവധി നോക്കാതെ അവയിൽ ചിലത് ഉപയോഗിച്ചിട്ടുമുണ്ടാവും. കാലാവധി കഴിഞ്ഞ ഉൽപ്പന്നങ്ങളുടെ ഘടനയിലും ഗുണനിലവാരത്തിലും മാറ്റങ്ങൾ സംഭവിക്കാം. അതല്ല, മാറ്റങ്ങളൊന്നും പ്രകടമല്ലെങ്കിലും കാലാവധി കഴിഞ്ഞ ഉൽപ്പന്നം സുരക്ഷിതമാണെന്ന് ഉറപ്പിക്കാനാവില്ല.

സൺസ്ക്രീൻ

വെയിൽ കുറവുള്ള ദിവസങ്ങളിൽ സൺസ്ക്രീൻ ഉപയോഗിക്കാതിരിക്കുന്നവർക്ക് അതിന്റെ കാലാവധി ശ്രദ്ധിക്കാതെ പോകാം. എന്നാൽ കാലാവധി കഴിഞ്ഞ സൺസ്ക്രീനിന്റെ സൂര്യപ്രതിരോധ ശേഷി കുറഞ്ഞേക്കാം. ഇത് സൂര്യപ്രകാശം മൂലമുള്ള ചർമനാശത്തിനും സൂര്യാഘാതത്തിനും സാധ്യത വർധിപ്പിക്കും. കുപ്പിയിലോ പാക്കറ്റിലോ രേഖപ്പെടുത്തിയിരിക്കുന്ന കാലാവധി പരിശോധിക്കുക. ചൂടും നേരിട്ടുള്ള സൂര്യപ്രകാശവും ഏൽക്കുന്ന സ്ഥലങ്ങളിൽ സൺസ്ക്രീൻ സൂക്ഷിക്കാതിരിക്കുന്നതും പ്രധാനമാണ്.

പഴയ മസ്കാരയും ഐലൈനറും

ദിവസവും ഉപയോഗിക്കുന്ന മസ്കാരയുടെയോ ലിക്വിഡ് ഐലൈനറുകളും തുറന്ന ശേഷം അധികകാലം ഉപയോഗിക്കുന്നത് കണ്ണിലെ അണുബാധയ്ക്കുള്ള സാധ്യത വർധിപ്പിക്കാം. മസ്കാര സാധാരണയായി തുറന്ന് മൂന്ന് മുതൽ ആറുമാസത്തിനുള്ളിൽ മാറ്റുന്നതാണ് ഉചിതം. ഐ മേക്കപ്പ് ഉൽപ്പന്നങ്ങളിൽ പാക്കറ്റിൽ നൽകിയിരിക്കുന്ന ഉപയോഗകാലാവധി പാലിക്കണം. കണ്ണിന് അണുബാധ ഉണ്ടായ സമയത്ത് ഉപയോഗിച്ച മേക്കപ്പ് ഉൽപ്പന്നങ്ങൾ വീണ്ടും ഉപയോഗിക്കാതിരിക്കുന്നതാണ് നല്ലത്.

ലിപ്സ്റ്റിക്കും ലിപ് ബാമും

പഴയ ലിപ്സ്റ്റിക്കുകളും ലിപ് ബാമുകളും ഡ്രസ്സിങ് ടേബിളിലെ ഡ്രോയറുകളിൽ മറന്നുകിടക്കുന്നത് പതിവാണ്. കാലക്രമേണ ഇവയുടെ മണം, നിറം, ഘടന എന്നിവയിൽ മാറ്റമുണ്ടാകാം. ചൂടുള്ള സ്ഥലങ്ങളിൽ സൂക്ഷിക്കുന്നതും ഉൽപ്പന്നത്തിന്റെ ഗുണനിലവാരത്തെ ബാധിക്കാം. ഉപയോഗിക്കുന്നതിന് മുൻപ് കാലാവധി പരിശോധിക്കുക. മണം മാറിയതോ അസാധാരണമായി ഒട്ടുന്നതോ ഉണങ്ങിപ്പോയതോ ആയ ഉൽപ്പന്നങ്ങൾ ഉപേക്ഷിക്കുക.

കാലാവധി കഴിഞ്ഞ ഷാംപൂവും കണ്ടീഷണറും

ബാത്റൂമിൽ ഒരേസമയം പലതരം ഷാംപൂകളും കണ്ടീഷണറുകളും സൂക്ഷിക്കുന്നവർക്ക് പഴയ കുപ്പികൾ ശ്രദ്ധയിൽപ്പെടാതെ പോകാം. ഇവയുടെ കാലാവധി കഴിഞ്ഞിട്ടുണ്ടോ എന്നും ഉപയോഗിക്കുന്ന കാലയളവിൽ മണം, നിറം, ഘടന എന്നിവ മാറിയിട്ടുണ്ടോ എന്നും പരിശോധിക്കണം. വെള്ളം കുപ്പിക്കുള്ളിൽ കയറുന്നതും ഉൽപ്പന്നം മലിനമാകാനുള്ള സാധ്യത വർധിപ്പിക്കും. സംശയകരമായ മാറ്റങ്ങളുള്ള ഉൽപ്പന്നങ്ങൾ ഉപയോഗിക്കരുത്.

നെയിൽ പോളിഷും റിമൂവറും

ഡ്രസ്സിങ് ടേബിളിൽ വർഷങ്ങളായി കിടക്കുന്ന നെയിൽ പോളിഷ് കുപ്പികൾ പല വീടുകളിലും കാണാം. ഇവയുടെ നിറം വേർതിരിയുക, കട്ടിയാകുക, ഉണങ്ങുക തുടങ്ങിയ മാറ്റങ്ങൾ സംഭവിക്കാം. നെയിൽ പോളിഷ് റിമൂവർ പോലുള്ളവയുടെ കുപ്പികൾ നന്നായി അടച്ചുവയ്ക്കണം. ഇവ തീയും ചൂടും ഏൽക്കാത്ത, വായുസഞ്ചാരമുള്ള സ്ഥലത്ത് സൂക്ഷിക്കുക. കുട്ടികൾക്ക് എത്താത്തിടത്ത് വയ്ക്കുന്നതും പ്രധാനമാണ്.

പഴയ ടൂത്ത് പേസ്റ്റും മൗത്ത് വാഷും

ബാത്റൂമിലെ സിങ്കിന് സമീപം സൂക്ഷിക്കുന്ന ടൂത്ത് പേസ്റ്റിന്റെയും മൗത്ത് വാഷിന്റെയും കാലാവധി പരിശോധിക്കണം. കാലാവധി കഴിഞ്ഞ ടൂത്ത് പേസ്റ്റിന്റെ ഫ്ലൂറൈഡ് ഉൾപ്പെടെയുള്ള ഘടകങ്ങളുടെ ഫലപ്രാപ്തി കുറഞ്ഞേക്കാം. അതിനാൽ പാക്കറ്റിൽ നൽകിയിരിക്കുന്ന കാലാവധി കഴിഞ്ഞ ഉൽപ്പന്നങ്ങൾ മാറ്റുക. മൗത്ത് വാഷിന്റെ നിറത്തിലോ മണത്തിലോ മാറ്റം സംഭവിച്ചിട്ടുണ്ടെങ്കിൽ ഉപയോഗിക്കരുത്. കുപ്പിയുടെ അടപ്പ് എപ്പോഴും മുറുക്കി അടയ്ക്കുകയും വേണം.

കാലാവധി കഴിഞ്ഞ മരുന്നുകളും തൈലങ്ങളും

ബാത്റൂമിലെ കാബിനറ്റിൽ വേദനസംഹാരികൾ, ചർമത്തിൽ പുരട്ടുന്ന തൈലങ്ങൾ, ആന്റിസെപ്റ്റിക് ക്രീമുകൾ, കണ്ണിലൊഴിക്കുന്ന തുള്ളിമരുന്നുകൾ എന്നിവ സൂക്ഷിക്കുന്നവർ ഏറെയാണ്. മരുന്നുകളുടെ കാര്യത്തിൽ കാലാവധി പ്രത്യേകം ശ്രദ്ധിക്കണം. കാലാവധി കഴിഞ്ഞ മരുന്നുകൾ ഉപയോഗിക്കരുത്. കണ്ണിലൊഴിക്കുന്ന തുള്ളിമരുന്നുകൾ തുറന്നതിനു ശേഷം എത്രകാലം ഉപയോഗിക്കാമെന്നത് ഉൽപ്പന്നത്തിനനുസരിച്ച് വ്യത്യാസപ്പെടാം. പാക്കറ്റിലെ നിർദേശങ്ങളും ഡോക്ടറുടെയോ ഫാർമസിസ്റ്റിന്റെയോ ഉപദേശവും പാലിക്കുക. മരുന്നുകൾ ബാത്റൂമിൽ സൂക്ഷിക്കുന്നത് ഒഴിവാക്കുന്നതാണ് നല്ലത്. അവിടെയുള്ള ചൂടും ഈർപ്പവും മരുന്നുകളുടെ ഗുണനിലവാരത്തെ ബാധിക്കാം.