കുതിരയ്ക്ക് കൊടുത്തുകൊണ്ടിരുന്ന മുതിരയുടെ പോഷക​ഗുണം മനസിലാക്കിയതോടെ നമ്മുടെ ഡയറ്റിൽ പതിയെ പതിയെ മുതിര സ്ഥാനം പിടിച്ചു തുടങ്ങി. മുതിരയിൽ അടങ്ങിയ നാരുകൾ കുടലിന്റെ ചലനം സുദ​ഗമമാക്കാനും ദഹനം വേ​ഗത്തിലാക്കാനും സഹായിക്കുന്നു.

മുതിരയിൽ കൊഴുപ്പ് കുറവും നാരുകൾ കൂടുതലുമായതിനാൽ തടി കുറയ്ക്കാൻ ആ​ഗ്രഹിക്കുന്നവർക്ക് മികച്ചതാണ്. രക്തത്തിലെ പഞ്ചസാരയുടെ അളവ് നിയന്ത്രിക്കാനും മുതിര സഹായിക്കും. കാര്യങ്ങൾ ഇങ്ങനൊക്കെയാണെങ്കിലും ചില സാഹചര്യങ്ങളിൽ മുതിര ആരോ​ഗ്യത്തിന് പണി തരാൻ സാധ്യതയുണ്ട്.

• മുതിര ശരീരത്തിൽ ഉഷ്ണമുണ്ടാക്കുന്ന ഒരു ഭക്ഷണമാണ്. ഇത് ശരീരതാപനില വ‍ർധിക്കാൻ കാരണമാകും. അതുകൊണ്ട് വേനൽക്കാലത്ത് മുതിര ഒഴിവാക്കുന്നതാണ് നല്ലത്.

• മറ്റ് പയറുവർഗ്ഗങ്ങളെ അപേക്ഷിച്ച് മുതിര ദഹിക്കാൻ പ്രയാസമാണ്. ഇത് അമിതമായി കഴിക്കുന്നത് ഗ്യാസ്, വയറുവേദന, മലബന്ധം എന്നിവക്ക് കാരണമായേക്കാം. മുതിര നന്നായി കുതിർത്ത ശേഷം വേവിച്ച് ഉപയോഗിക്കുന്നതാണ് നല്ലത്.

• ഗർഭകാലത്ത് മുതിര അമിതമായി കഴിക്കുന്നത് ഒഴിവാക്കണം. ഇതിലെ ഉഷ്ണ സ്വഭാവം ഗർഭസ്ഥ ശിശുവിനും അമ്മക്കും ചിലപ്പോൾ അസ്വസ്ഥതയുണ്ടാക്കാം.

• മുതിര ശരീരത്തിലെ കൊഴുപ്പ് കുറക്കാൻ സഹായിക്കുന്ന ഒന്നാണ്. അതിനാൽ അമിതമായി മെലിഞ്ഞവരോ, പെട്ടെന്ന് തടി വെക്കണമെന്ന് ആഗ്രഹിക്കുന്നവരോ മുതിര പതിവായി കഴിക്കുന്നത് ഗുണകരമാകില്ല.

• യൂറിക് ആസിഡ് വർധനവ് മൂലം സന്ധിവേദന ഉള്ളവർ മുതിര നിയന്ത്രിക്കണം. മുതിരയിൽ അടങ്ങിയിരിക്കുന്ന ചില ഘടകങ്ങൾ യൂറിക് ആസിഡ് നില വർധിപ്പിക്കാൻ കാരണമാകും.

• വയറിൽ അൾസർ ഉള്ളവർക്ക് മുതിരയുടെ ഉപയോഗം ചിലപ്പോൾ എരിച്ചിൽ കൂട്ടാൻ സാധ്യതയുണ്ട്.

• മുതിരയും പാലും കൂടി ചേർത്ത് കഴിക്കുന്നത് ആയുർവേദ പ്രകാരം വിരുദ്ധാഹാരമാണ്. ഇത് ചർമരോഗങ്ങൾക്കും ദഹനക്കേടിനും കാരണമായേക്കാം. മുതിര പാകം ചെയ്യുമ്പോൾ അല്പം ജീരകമോ ഇഞ്ചിയോ ചേർക്കുന്നത് നല്ലതാണ്. ഇത് ദഹനം സുഗമമാക്കാൻ സഹായിക്കും.