മഞ്ഞുകാലം ഹൈപ്പർടെൻഷൻ ഉള്ളവർക്ക് അത്ര നല്ലകാലമല്ല. അന്തരീക്ഷ താപനില കുറയുന്നതോടെ രക്തക്കുഴലുകൾ ചുരുങ്ങുകയും ശാരീരിക പ്രവർത്തനങ്ങൾ കുറയുകയും ചെയ്യുന്നു. കൂടാതെ ഭക്ഷണക്രമത്തിലെ മാറ്റങ്ങളും രക്തസമ്മർദം ഉയരാൻ കാരണമായേക്കാം. അതുകൊണ്ട് തന്നെ മഞ്ഞുകാലത്ത് രക്തസമ്മർദം തുടർച്ചയായി നിരീക്ഷിക്കണം.

രക്തസമ്മർദം ഉയരുന്നത് ഹൃദയാരോ​ഗ്യത്തെയും വൃക്കകളുടെ ആരോ​ഗ്യത്തെയും ബാധിക്കാം. ഹൈപ്പർടെൻഷൻ ഉള്ളവർ തണുപ്പുകാലത്ത് ദിവസത്തിൽ ഒന്നോ രണ്ടോ തവണ രക്തസമ്മർദം വീട്ടിൽ നിരീക്ഷിക്കണം. അളവുകൾ തമ്മിലുള്ള താരതമ്യങ്ങൾ കൃത്യമാണെന്ന് ഉറപ്പിക്കാൻ സ്ഥിരമായ സമയം അത്യാവശ്യമാണ്. പ്രഭാതഭക്ഷണത്തിനും മുൻപും വൈകുന്നേരവും നോക്കുന്നതാണ് നല്ലത്.

രക്തസമ്മർദം വീട്ടിൽ എങ്ങനെ പരിശോധിക്കാം

• രക്തസമ്മർദം അളക്കുന്നതിന് 30 മിനിറ്റ് മുമ്പ് വ്യായാമം, കഫീൻ, പുകയില എന്നിവ ഒഴിവാക്കണം.

• ശാന്തമായി അഞ്ച് മിനിറ്റ് ഇരിക്കുക, പാദങ്ങൾ തറയിൽ വെച്ച് നട്ടെല്ലിന് താങ്ങായി ഇരിക്കുക.

• കഫ് ഹൃദയത്തിന്റെ ലെവലിൽ കൈത്തണ്ടയിൽ കെട്ടാം. ഒരു ഓട്ടോമേറ്റഡ് രക്തസമ്മർദ റെക്കോർഡർ ഉപയോ​ഗിച്ച് രക്തസമ്മർദം അളക്കാവുന്നതാണ്.

• രക്തസമ്മർദ്ദം സാധാരണ നിലയിലാണെങ്കിൽ പോലും തലകറക്കം, നെഞ്ചിലെ അസ്വസ്ഥത അല്ലെങ്കിൽ ശ്വാസതടസ്സം തുടങ്ങിയ ലക്ഷണങ്ങൾ അവ​ഗണിക്കരുത്.

രക്തസമ്മർദം കുറയ്ക്കാൻ

ആരോ​ഗ്യകരമായ ശീലങ്ങളിലൂടെ രക്തസമ്മർദം നിയന്ത്രിക്കാൻ കഴിയും. തണുപ്പുകാലത്ത് വീടിനുള്ളിൽ ചെയ്യാവുന്ന ചെറിയ വ്യായാമങ്ങൾ പരിശീലിക്കുന്നത് ആരോ​ഗ്യം നിലനിർത്താൻ സഹായിക്കും. രക്തസമ്മർദം വർധിപ്പിക്കുന്ന അമിതമായി സോഡിയം അടങ്ങിയതും സംസ്കരിച്ചതുമായ ഭക്ഷണങ്ങൾ പരിമിതപ്പെടുത്തേണ്ടത് പ്രധാനമാണ്. മെഡിറ്റേഷൻ, വായന, അല്ലെങ്കിൽ മാനസിക സമ്മർദം ഒഴിവാക്കാൻ സഹായിക്കുന്ന മറ്റ് ഹോബികൾ എന്നിവ പരിശീലിക്കാവുന്നതാണ്.