വീടുകളിൽ ഏറ്റവും കൂടുതൽ ഉപയോ​ഗിക്കുന്ന ഉപകരണങ്ങളിലൊന്നാണ് ഫ്രിഡ്ജ്. ദിവസവും ഭക്ഷണവും പച്ചക്കറികളും പഴങ്ങളും പാനീയങ്ങളും സൂക്ഷിക്കുന്നതുകൊണ്ട് തന്നെ ഫ്രിഡ്ജിനുള്ളിൽ അഴുക്കും ഭക്ഷണാവശിഷ്ടങ്ങളും ദുർഗന്ധവും എളുപ്പത്തിൽ ഉണ്ടാകാം. പുറമേ വൃത്തിയായി തോന്നാമെങ്കിലും കൃത്യമായ ഇടവേളകളിൽ ക്ലീനിങ് നടത്തിയില്ലെങ്കിൽ ഫ്രിഡ്ജ് വേ​ഗത്തിൽ നശിച്ചുപോകാൻ കാരണമായേക്കാം.

ആരോ​ഗ്യ വാർത്തകൾ കൂടുതൽ അറിയാൻ വാട്സ്ആപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

ഫ്രിഡ്ജ് എത്ര ഇടവിട്ട് വൃത്തിയാക്കണം?

ആഴ്ചയിൽ ഒരിക്കലെങ്കിലും ഫ്രിഡ്ജ് പരിശോധിച്ച് വൃത്തിയാക്കുന്നത് നല്ലതാണ്. ചോർന്ന ഭക്ഷണങ്ങളും പാനീയങ്ങളും, പഴകിയ ഭക്ഷണം തുടങ്ങിയവ ഉടൻ നീക്കം ചെയ്യണം. അതേസമയം മാസത്തിൽ ഒരിക്കൽ ഫ്രിഡ്ജ് പൂർണമായി വൃത്തിയാക്കുന്നത് ശീലമാക്കുന്നത് നല്ലതാണ്.

ഷെൽഫുകൾ, ഡ്രോയറുകൾ, ഡോർ റാക്കുകൾ എന്നിവ പുറത്തെടുത്ത് കഴുകുകയും ഫ്രിഡ്ജിന്റെ ഉൾഭാഗം നന്നായി തുടയ്ക്കുകയും വേണം. കൂടുതൽ ഭക്ഷണം സൂക്ഷിക്കുന്ന വീടുകളിലും ചെറിയ കുട്ടികളുള്ള വീടുകളിലും ഫ്രിഡ്ജ് ഇടയ്ക്കിടെ പരിശോധിക്കുന്നത് കൂടുതൽ നല്ലതാണ്.

ഫ്രിഡ്ജ് വൃത്തിയാക്കുമ്പോൾ ആദ്യം ചെയ്യേണ്ടത്

ഫ്രിഡ്ജിനുള്ളിലെ സാധനങ്ങൾ പുറത്തെടുത്ത ശേഷം കാലാവധി കഴിഞ്ഞതോ ഉപയോഗിക്കാൻ സംശയമുള്ളതോ ആയ ഭക്ഷണം മാറ്റിവയ്ക്കുക. ചോർന്ന ഭക്ഷണവും പാനീയങ്ങളും ഉടൻ വൃത്തിയാക്കണം. ഫ്രിഡ്ജ് വൃത്തിയാക്കുന്നതിന് മുമ്പ് വൈദ്യുതി ഓഫ് ചെയ്തുവെന്ന് ഉറപ്പാക്കണം. പ്രത്യേകിച്ച് ഫ്രിഡ്ജ് പൂർണമായി ക്ലീൻ ചെയ്യുകയാണെങ്കിൽ പ്ലഗ് ഊരിയിടാം.

ഷെൽഫുകളും ഡ്രോയറുകളും മറക്കരുത്

ഫ്രിഡ്ജിനുള്ളിലെ ഷെൽഫുകളിലും ഡ്രോയറുകളിലും ഭക്ഷണത്തിന്റെ ചെറിയ കഷണങ്ങളും ദ്രാവകങ്ങളും അടിഞ്ഞുകൂടാൻ സാധ്യതയുണ്ട്. ഇവ പുറത്തെടുത്ത് സാധാരണ ഡിഷ് വാഷും വെള്ളവും ഉപയോഗിച്ച് കഴുകാം. കഴുകിയ ഭാഗങ്ങൾ പൂർണമായി ഉണക്കിയ ശേഷം മാത്രം ഫ്രിഡ്ജിൽ തിരിച്ചുവയ്ക്കുക.

ഡോർ റാക്കുകളും ശ്രദ്ധിക്കണം

ഫ്രിഡ്ജിന്റെ വാതിലിലെ റാക്കുകൾ പലപ്പോഴും ക്ലീനിങ്ങിൽ മറന്നുപോകുന്ന ഭാഗമാണ്. പാൽ, ജ്യൂസ്, സോസ് തുടങ്ങിയവയുടെ പാടുകൾ ഇവിടെ ഉണ്ടാകാം. ആഴ്ചതോറും ഒന്ന് പരിശോധിച്ച് തുടയ്ക്കുന്നത് നല്ലതാണ്.

ദുർഗന്ധം വന്നാൽ എന്തുചെയ്യണം?

ഫ്രിഡ്ജിൽ നിന്ന് ദുർഗന്ധം വരുകയാണെങ്കിൽ ആദ്യം അതിന്റെ കാരണം കണ്ടെത്തണം. പഴകിയ ഭക്ഷണം, ചോർന്ന പാൽ, പച്ചക്കറി അവശിഷ്ടങ്ങൾ തുടങ്ങിയവ നീക്കം ചെയ്യുക. ബേക്കിങ് സോഡ പോലുള്ള സാധാരണ വീട്ടുപയോഗ സാധനങ്ങൾ ദുർഗന്ധം കുറയ്ക്കാൻ സഹായിച്ചേക്കാം.

ഫ്രിഡ്ജ് വൃത്തിയാക്കുമ്പോൾ ശ്രദ്ധിക്കേണ്ട കാര്യങ്ങൾ

• ചൂടുവെള്ളം ഉപയോഗിച്ച് തണുത്ത ഗ്ലാസ് ഷെൽഫുകൾ ഉടൻ കഴുകരുത്; താപനിലയിലെ പെട്ടെന്നുള്ള മാറ്റം ഗ്ലാസ് പൊട്ടാൻ കാരണമാകാം.

• ശക്തമായ കെമിക്കൽ ക്ലീനറുകൾ ഭക്ഷണം വയ്ക്കുന്ന ഭാഗങ്ങളിൽ ഉപയോഗിക്കുന്നത് ഒഴിവാക്കുക.

• ഫ്രിഡ്ജിന്റെ വെന്റുകൾ തടസ്സപ്പെടാത്തവിധം ഭക്ഷണം ക്രമീകരിക്കുക.

• പഴകിയ ഭക്ഷണം കൃത്യമായി പരിശോധിച്ച് നീക്കം ചെയ്യുക.

• വൃത്തിയാക്കിയ ശേഷം ഭക്ഷണം തിരിച്ചുവയ്ക്കുന്നതിന് മുമ്പ് അകത്തെ ഭാഗങ്ങൾ ഉണങ്ങിയിട്ടുണ്ടെന്ന് ഉറപ്പാക്കുക.