പ്രതിരോധസംവിധാനം ശക്തിപ്പെടുത്തുന്നതിനും രക്തയോട്ടം മെച്ചപ്പെടുത്തുന്നതിനും ശരീരത്തില്‍ ഇരുമ്പിന്‍റെ അംശം വളരെ പ്രധാനമാണ്. പുരുഷന്മാരെ അപേക്ഷിച്ച് സ്ത്രീകളില്‍ ഇരുമ്പിന്റെ അംശം കൂടുതല്‍ ആവശ്യമാണ്. ഇരുമ്പിന്റെ അഭാവം ക്ഷീണം, തളര്‍ച്ച, വിളര്‍ച്ച തുടങ്ങിയവ ലക്ഷണങ്ങള്‍ക്ക് കാരണമാകാം. ഇരുമ്പിന്റെ അഭാവം പരിഹരിക്കുന്നതിന് ഇരുമ്പ് അടങ്ങിയ ഭക്ഷണം ധാരാളം കഴിക്കണമെന്ന് വിദ്ഗധര്‍ ഉപദേശിക്കാറുണ്ട്. എന്നാല്‍ ചില സന്ദര്‍ഭങ്ങളില്‍ ഭക്ഷണം കഴിച്ചാലും പുരോഗതിയുണ്ടാകില്ല.

ശരീരത്തില്‍ ഇരുമ്പിന്‍റെ ആഗിരണം ഫലപ്രദമായി നടക്കാന്‍ ചില കാര്യങ്ങള്‍ ശ്രദ്ധിക്കണം.

ഇരുമ്പ് അടങ്ങിയ ഭക്ഷണം ഡയറ്റില്‍ ചേര്‍ക്കുക

ശരീരത്തില്‍ ഇരുമ്പിന്റെ ആഗിരണം വര്‍ധിപ്പിക്കാന്‍ ഇരുമ്പ് അടങ്ങിയ ഇലക്കറികള്‍, പയറുവര്‍ഗം, ഈന്തപ്പഴം, മാതളനാരങ്ങ തുടങ്ങിയവ ധാരാളം കഴിക്കണം. ഇത് ശരീരത്തിന്റെ ഇരുമ്പിന്റെ അളവു കൂട്ടാന്‍ സഹായിക്കും. നിങ്ങളുടെ പ്രായം, ലിംഗം എന്നിവയെ ആശ്രയിച്ചാണ് ശരീരത്തില്‍ ഇരുമ്പിന്റെ അളവു തീരുമാനിക്കുന്നത്. മുതിര്‍ന്ന പുരുഷന്മാരില്‍ ഇരുമ്പിന്റെ അംശം 8 മില്ലിഗ്രാം മതിയെങ്കില്‍ സ്ത്രീകളില്‍ അത് 18 മില്ലിഗ്രാം ആവശ്യമാണ്.

ചായ/ കാപ്പി എന്നിവയ്‌ക്കൊപ്പം ഇരുമ്പ് അടങ്ങിയ ഭക്ഷണം കഴിക്കരുത്

ചായ, കാപ്പി എന്നിവയ്‌ക്കൊപ്പം ഇരുമ്പ് അടങ്ങിയ ഭക്ഷണം കഴിക്കുന്നത് ശരീരത്തില്‍ ഇരുമ്പിന്റെ ആഗിരണം കുറയ്ക്കാന്‍ കാരണമാകും. ചായയിലും കാപ്പിയിലും ഒരുപോലെ അടങ്ങിയ കഫീനും ടാന്നിനും ഇരുമ്പിന്റെ ആഗിരണം കുറയക്കും. ജപ്പാന്‍ ജേണല്‍ ആയ ക്ലിനിക്കല്‍ ആന്റ് മെഡിക്കല്‍ റിസര്‍ച്ചില്‍ പ്രസിദ്ധീകരിച്ച പഠനത്തില്‍ ചായ കുടിക്കുന്നതു കൊണ്ട് ശരീരത്തില്‍ ഇരുമ്പിന്റെ ആഗിരണം 36 ശതമാനമായും കാപ്പി കുടിക്കുന്നതു കൊണ്ട് ഇരുമ്പിന്റെ ആഗിരണം 62 ശതമാനവുമായി കുറയുമെന്ന് ചൂണ്ടിക്കാണിക്കുന്നു.

എത്ര കഴുകിയിട്ടും അങ്ങോട്ടു ശരിയാവുന്നില്ലേ?; സൂക്ഷിക്കണം, രോഗലക്ഷണമാകാം

വിറ്റാമിന്‍ സി അടങ്ങിയ ഭക്ഷണത്തിനൊപ്പം കഴിക്കാം

വിറ്റാമിന്‍ സി അടങ്ങിയ ഭക്ഷണത്തിനൊപ്പം ഇരുമ്പടങ്ങിയ ഭക്ഷണം കഴിക്കുന്നതാണ് എപ്പോഴും നല്ലതെന്ന് വിദഗ്ധര്‍ പറയുന്നു. കാരണം വിറ്റാമിന്‍ സി ഒരു അസിഡിക് പരിസ്ഥിതി ഉണ്ടാക്കുകയും ഇത് ഇരുമ്പിനെ ലയിപ്പിക്കാന്‍ സഹായിക്കുകയും ചെയ്യുന്നു. ഇലക്കറികള്‍ കൊണ്ട് സാലഡ് ഉണ്ടാക്കുമ്പോള്‍ അതില്‍ അല്‍പം നാരങ്ങ നീര് കൂടി ചേര്‍ക്കൂ. രുചിക്കും ശരീരത്തില്‍ ഇരുമ്പിന്‍റെ ആഗിരണം മെച്ചപ്പെടുത്താനും ഇത് സഹായിക്കും.