സംസ്ഥാനത്ത് എലിപ്പനി ബാധിച്ച് മരിക്കുന്നവരിൽ ഏറ്റവും കൂടുതൽ ആളുകൾ കൂലിപ്പണി തൊഴിലാളികൾ. ആരോഗ്യവകുപ്പിന്റെ 2025-ലെ തൊഴിൽവിഭാഗം തിരിച്ചുള്ള വിശകലനത്തിലാണ് ഈ വിവരം. എലിപ്പനിബാധിച്ച് മരിച്ചവരിൽ 36.72 ശതമാനമാണ് കൂലിപ്പണി തൊഴിലാളികൾ. മഴക്കാലത്ത് ചെളിവെള്ളത്തിലും വെള്ളക്കെട്ടിലും ജോലി ചെയ്യുന്നവരാണ് രോഗത്തിന്റെ ഏറ്റവും വലിയ ഇരകൾ.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

കൃഷിയും അനുബന്ധ ജോലികളും ചെയ്യുന്നവർ (10.94%), വീട്ടുവളപ്പിൽ കൃഷിയിലും ഗാർഡനിങ്ങിലും ഏർപ്പെടുന്നവർ (10.16%), നിർമാണത്തൊഴിലാളികൾ (9.38%), തൊഴിലുറപ്പ് തൊഴിലാളികൾ (7.81%) എന്നിങ്ങനെയാണ് തുടർന്നുള്ള മരണക്കണക്ക്. എലി, അണ്ണാൻ, പൂച്ച, പട്ടി, കന്നുകാലി എന്നിവയുടെ വിസർജ്യത്താൽ മലിനമായ വെള്ളവും മണ്ണുമായി സമ്പർക്കത്തിൽ വരുന്നതിലൂടെയാണ് എലിപ്പനി പ്രധാനമായും പകരുന്നത്.

മറ്റ് തൊഴിൽവിഭാഗങ്ങൾ (ശതമാനത്തിൽ)

• പെയിന്റർ - 4.69

• മത്സ്യത്തൊഴിലാളി, കന്നുകാലി വളർത്തൽ, ഡ്രൈവർ - 3.13 വീതം

• ടൈൽ തൊഴിലാളി, തുന്നൽ തൊഴിലാളി - 2.34 വീതം

• പ്ലംബർ, സെക്യൂരിറ്റി ജീവനക്കാരൻ, തൊഴിലില്ലാത്തവർ - 1.56 വീതം

• ചുമട്ടുതൊഴിലാളി, ഇറച്ചിവെട്ടുകാർ - 0.78 വീതം

• പ്രതിരോധമരുന്ന് ഡോക്‌സിസൈക്ലിൻ

ഉയർന്ന അപകടസാധ്യതയുള്ളവർക്ക് ആഴ്ചയിൽ ഒരിക്കൽ 200 മില്ലിഗ്രാം ഡോക്‌സിസൈക്ലിൻ ഡോക്ടറുടെ നിർദേശപ്രകാരം പ്രതിരോധമരുന്നായി കഴിക്കാം.

എന്താണ് എലിപ്പനി?

ലെപ്‌റ്റോസ്‌പൈറ എന്ന ഒരുതരം ബാക്ടീരിയയാണ് എലിപ്പനിയുടെ വില്ലൻ. എലികൾ, നായകൾ, കന്നുകാലികൾ തുടങ്ങിയ മൃഗങ്ങളുടെ മൂത്രത്തിലൂടെയാണ് ഈ ബാക്ടീരിയ പുറത്തുവരുന്നത്. ഇവ കെട്ടിക്കിടക്കുന്ന വെള്ളത്തിലും നനഞ്ഞ മണ്ണിലും മാസങ്ങളോളം ജീവനോടെയിരിക്കും. ഈ മലിനജലവുമായി നമ്മുടെ ശരീരം സമ്പർക്കത്തിലാകുമ്പോഴാണ് രോഗാണുക്കൾ നമ്മുടെ ശരീരത്തിൽ പ്രവേശിക്കുന്നത്. കാലിലെ ചെറിയ മുറിവുകളോ, കൈയിലെ പോറലുകളോ മതി ഈ അണുക്കൾക്ക് അകത്തേക്ക് കയറാൻ.

സാധാരണ പനിയെന്ന് കരുതി തള്ളിക്കളയരുത്!

പലപ്പോഴും എലിപ്പനിയുടെ ലക്ഷണങ്ങൾ സാധാരണ പനിയുടേതിന് സമാനമായിരിക്കും. അതുകൊണ്ട് തന്നെ പലരും ഇത് തിരിച്ചറിയാൻ വൈകുന്നു. രോഗാണു ശരീരത്തിൽ പ്രവേശിച്ച് ഏകദേശം നാല് മുതൽ 14 ദിവസത്തിനുള്ളിൽ രോഗലക്ഷണങ്ങൾ കണ്ടുതുടങ്ങും.

• കഠിനമായ പനി: സാധാരണ പനിയേക്കാൾ ശക്തമായിരിക്കും എലിപ്പനിയുടെ പനി. വിറയലും ഉണ്ടാകാം.

• പേശിവേദന: പ്രത്യേകിച്ച് കാൽമുട്ടിന് താഴെയുള്ള പേശികളിലും നടുവിനും കഠിനമായ വേദന അനുഭവപ്പെടും. പലരും ഇതിനെ 'ബോഡി പെയിൻ' എന്ന് പറഞ്ഞ് നിസ്സാരമായി കാണാറുണ്ട്.

• കണ്ണുകൾ ചുവക്കുക: കണ്ണുകൾ ചുവന്ന് കലങ്ങി, രക്തം കലർന്ന പോലെ കാണുന്നത് എലിപ്പനിയുടെ ഒരു പ്രധാന ലക്ഷണമാണ്.

• വയറുവേദനയും ഛർദ്ദിയും: വിശപ്പില്ലായ്മയും ഓക്കാനവും ഉണ്ടാകാം.

• തലവേദന: ശക്തമായ തലവേദന എലിപ്പനിയുടെ ലക്ഷണമാണ്.

ഈ ലക്ഷണങ്ങൾ കണ്ടാൽ ഒട്ടും മടിക്കാതെ ഉടൻതന്നെ ഒരു ഡോക്ടറെ കാണണം. സ്വയംചികിത്സ ഒരിക്കലും ചെയ്യരുത്. കാരണം, ചികിത്സ വൈകിയാൽ എലിപ്പനി ഗുരുതരമായി വൃക്ക, കരൾ, ശ്വാസകോശം തുടങ്ങിയ ആന്തരികാവയവങ്ങളെ ബാധിക്കുകയും ജീവഹാനി വരെ സംഭവിക്കുകയും ചെയ്യാം.

എലിപ്പനി എങ്ങനെ പ്രതിരോധിക്കാം?

• രോഗം വന്ന ശേഷം ചികിത്സിക്കുന്നതിനേക്കാൾ നല്ലത് രോഗം വരാതെ നോക്കുന്നതാണ്.

• പ്രതിരോധ ഗുളിക: വെള്ളക്കെട്ടുള്ള സ്ഥലങ്ങളിൽ ജോലി ചെയ്യുന്നവരും, വെള്ളവുമായി സമ്പർക്കത്തിൽ വരുന്നവരും ഡോക്ടറുടെ നിർദ്ദേശപ്രകാരം ഡോക്സിസൈക്ലിൻ (Doxycycline) പോലുള്ള പ്രതിരോധ ഗുളികകൾ കഴിക്കുന്നത് വളരെ നല്ലതാണ്.

• സുരക്ഷാ ഉപകരണങ്ങൾ: മലിനജലവുമായി ഇടപെഴകുമ്പോൾ ഗംബൂട്ടുകളും, കൈയുറകളും ധരിക്കുക. ഇത് രോഗാണുക്കൾ ശരീരത്തിൽ പ്രവേശിക്കുന്നത് തടയും.

• ശുചിത്വം: വീടും പരിസരവും എപ്പോഴും വൃത്തിയായി സൂക്ഷിക്കുക. മാലിന്യങ്ങൾ കെട്ടിക്കിടക്കുന്നത് ഒഴിവാക്കുക. എലികളെ നിയന്ത്രിക്കാൻ ആവശ്യമായ നടപടികൾ സ്വീകരിക്കുക.

• തിളപ്പിച്ച വെള്ളം: തിളപ്പിച്ചാറിയ വെള്ളം മാത്രം കുടിക്കുക. ഭക്ഷണസാധനങ്ങൾ എലികൾക്ക് എത്താത്ത രീതിയിൽ അടച്ചുവെക്കുക.

• ഓർക്കുക, എലിപ്പനി ഒരു ഭീഷണിയാണ്. പക്ഷേ, അത് തടയാൻ നമുക്ക് കഴിയും. ചെറിയൊരു ശ്രദ്ധ മതിയാകും വലിയ ദുരന്തങ്ങൾ ഒഴിവാക്കാൻ. ആരോഗ്യപരമായ കാര്യങ്ങളിൽ ഒരു വിട്ടുവീഴ്ചയും വരുത്താതിരിക്കുക.