ഇന്ത്യയിൽ ഏറ്റവും കൂടുതൽ പ്രമേഹരോ​ഗികളുള്ള സംസ്ഥാനങ്ങളിൽ ഒന്നാണ് കേരളം. ഓരോ വീട്ടിലും കുറഞ്ഞത് ഒരു പ്രമേഹ രോ​ഗിയെങ്കിലും ഉണ്ടാകും. അവരുടെ ഭക്ഷണക്രമീകരണം, ദിനചര്യകൾ, ജീവിതശൈലി എന്നിവയെല്ലാം വളരെ പ്രധാനമാണ്.

പ്രായമാകുമ്പോൾ മാത്രം വരുന്നതാണ് പ്രമേഹമെന്ന മിഥ്യാധാരണ നമുക്കു ചുറ്റുമുണ്ട്. അതുകൊണ്ട് തന്നെ ചെറുപ്പക്കാർ ഭക്ഷണക്രമീകരണത്തിൽ ശ്രദ്ധനൽകാറില്ല. എന്നാൽ ആ ധാരണ തെറ്റാണെന്ന് ദി ന്യൂ ഇന്ത്യൻ എക്സ്പ്രസിനോട് വിശദീകരിക്കുകയാണ് കോഴിക്കോട് ഡയാബ്കെയ‍ർ ഇന്ത്യയിലെ ഡെയബറ്റോളജിസ്റ്റ് ഡോ. സുരേഷ് കുമാർ.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

പ്രമേഹം ഏത് പ്രായത്തിലും വരാം. പ്രായം ടൈപ്പ് 2 പ്രമേഹ സാധ്യത വർധിപ്പിക്കുന്ന ഒരു പ്രധാന ഘടകമാണെങ്കിലും ഇന്ന് ചെറുപ്പക്കാരിലും കുട്ടികളിൽ പോലും കണ്ടുവരുന്നുണ്ട്. അതിനുള്ള പ്രധാന കാരണം ഉദാസീനമായ ജീവിതശൈലി, അമിതവണ്ണം, ജനിതക കാരണങ്ങൾ എന്നിവയാണ്. അതേസമയം ടൈപ്പ് 1 ഡയബറ്റീസ് കുട്ടിക്കാലത്തും കൗമാരപ്രായത്തിലും വികസിക്കുന്നുവെന്നും ഡോ. സുരേഷ് കുമാർ പറഞ്ഞു.

ആരോ​ഗ്യകരമായ ഭക്ഷണക്രമവും വ്യായാമത്തിലൂടെയും പ്രമേഹത്തെ ഫലപ്രദമായി നിയന്ത്രിച്ചു നിർത്താൻ സാധിക്കും. ടൈപ്പ് 2 പ്രമേഹമുള്ള ചിലരിൽ ജീവിതശൈലി മാറ്റങ്ങൾ വലിയ മാറ്റങ്ങൾ ഉണ്ടാക്കിയിട്ടുണ്ടെന്നും അദ്ദേഹം പറയുന്നു.

അമിതമായി പഞ്ചസാര കഴിക്കുന്നത് കൊണ്ടാണ് പ്രമേഹം ഉണ്ടാകുന്നത്!

അമിതമായി പഞ്ചസാര കഴിക്കുന്നതു മാത്രമല്ല പ്രമേഹ സാധ്യത വർധിപ്പിക്കുന്ന ഘടകം. ജനിതക കാരണങ്ങളും ഇൻസുലിൻ പ്രതിരോധം, അമിതവണ്ണം, അനാരോ​ഗ്യകരമായ ജീവിതശൈലി തുടങ്ങിയ നിരവധി മറ്റ് ഘടകങ്ങളും പ്രമേഹ സാധ്യത വർധിപ്പിക്കാം. മധുരപാനീയങ്ങളുടെ നിരന്തരം ഉപഭോ​ഗവും അമിത കലോറിയും ശരീരഭാരം വർധിപ്പിക്കാൻ കാരണമാകുന്നുണ്ട്. ഇത് പ്രമേഹസാധ്യത വർധിപ്പിക്കുമെന്നും അദ്ദേഹം പറയുന്നു.

തടിയുള്ളവർക്ക് മാത്രമാണ് പ്രമേഹം!

പ്രമേഹമുള്ള എല്ലാവർക്കും അമിതവണ്ണമുണ്ടാകണമെന്നില്ല. പ്രത്യേകിച്ച് ഇന്ത്യക്കാർക്ക്. പാരമ്പര്യമായ പ്രമേ​ഹരോ​ഗികളുള്ള കുടുംബമാണെങ്കിലും മക്കൾക്കും പ്രമേഹം വരാനുള്ള സാധ്യത കൂടുതലാണ്. മാത്രമല്ല, മെലിഞ്ഞവരാണെങ്കിലും ഉയർന്ന രക്തസമ്മർദം, കോളസ്ട്രോൾ നിലയിലെ ഏറ്റക്കുറച്ചിലുള്ളവർ, പിസിഒഡി, 35 വയസ്സിന് ശേഷമുള്ള എല്ലാവരും രക്തത്തിലെ പഞ്ചസാര നിരന്തരം പരിശോധിക്കേണ്ടതുണ്ട്.