പുകവലി ഉപേക്ഷിക്കണമെന്ന് ആഗ്രഹമുണ്ടോ? പല തവണ ശ്രമിച്ചിട്ടും പലരും പരാജയപ്പെട്ടൊരു കാര്യമായിരിക്കും അത്. എന്നാൽ ഒരിക്കൽ കൂടി ഒന്ന് ശ്രമിച്ചു നോക്കിയാലോ?. വെറും ഏഴ് ദിവസം സിഗരറ്റ് വലിക്കാതെ ഇരുന്നാൽ നമ്മുടെ ശരീരത്ത് എന്തൊക്കെ മാറ്റങ്ങളാണ് വരുന്നത് എന്നറിയാമോ, അത് ആണ് ആദ്യം നമ്മൾ അറിഞ്ഞിരിക്കേണ്ടത്.

പുകവലി നിർത്തുന്നത് ആദ്യ ദിവസങ്ങളിൽ ബുദ്ധിമുട്ടായി തോന്നിയേക്കാം. എന്നാൽ ശരീരം വീണ്ടെടുക്കാനുള്ള പ്രക്രിയ ആരംഭിക്കുന്നത് ഈ സമയത്തുതന്നെയാണ്.

ആരോ​ഗ്യ വാർത്തകൾ കൂടുതൽ അറിയാൻ വാട്സ്ആപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

ആദ്യ ദിവസം: ശരീരം വീണ്ടെടുക്കാൻ തുടങ്ങുന്നു

സിഗരറ്റ് വലിക്കുന്നത് നിർത്തിയാൽ രക്തത്തിലെ കാർബൺ മോണോക്സൈഡിന്റെ അളവ് കുറയാൻ തുടങ്ങും. പുകവലിയിലൂടെ ശരീരത്തിലെത്തുന്ന ഈ വിഷവാതകം രക്തത്തിന്റെ ഓക്സിജൻ വഹിക്കാനുള്ള ശേഷിയെ ബാധിക്കുന്നു. പുകവലി നിർത്തുന്നതോടെ ശരീരത്തിന് സാധാരണ നിലയിലേക്ക് മടങ്ങാൻ തുടങ്ങും. ആദ്യ 24 മണിക്കൂറിനുള്ളിൽ തന്നെ മാറ്റം നമുക്കു പ്രകടമാകും.

രണ്ടാം ദിവസം: നിക്കോട്ടിൻ പിൻവലിയൽ ലക്ഷണങ്ങൾ

സിഗരറ്റിൽ അടങ്ങിയിരിക്കുന്ന നിക്കോട്ടിൻ ആസക്തിക്ക് കാരണമാകുന്ന ഘടകമാണ്. പുകവലി നിർത്തുമ്പോൾ സിഗരറ്റ് വലിക്കാനുള്ള ശക്തമായ ആഗ്രഹം, അസ്വസ്ഥത, ഉത്കണ്ഠ, ശ്രദ്ധക്കുറവ് തുടങ്ങിയ ലക്ഷണങ്ങൾ അനുഭവപ്പെടാം. ഇവ നിക്കോട്ടിൻ പിൻവലിയലിന്റെ ഭാഗമാണ്. ഈ സമയത്ത് നമ്മൾ ചെയ്യേണ്ടത് ധാരാളം വെള്ളം കുടിക്കുക, നടക്കുക, നന്നായി ശ്വാസം എടുക്കുക തുടങ്ങിയ കാര്യങ്ങളാണ്.

മൂന്നാം ദിവസം: ആഗ്രഹത്തെ നിയന്ത്രിക്കാം

ആദ്യ ദിവസങ്ങളിൽ ചിലർക്ക് സിഗരറ്റ് വലിക്കാനുള്ള ആഗ്രഹം ശക്തമായി അനുഭവപ്പെടാം. എന്നാൽ ഈ ആഗ്രഹം എല്ലായ്പ്പോഴും ഒരേ തീവ്രതയിൽ തുടരണമെന്നില്ല. സിഗരറ്റ് വലിക്കാൻ തോന്നുമ്പോൾ കുറച്ചുനേരം കാത്തിരിക്കുക, പുറത്തേക്ക് നടക്കാൻ പോകുക, സുഹൃത്തുമായി സംസാരിക്കുക തുടങ്ങിയ കാര്യങ്ങൾ പരീക്ഷിക്കാം.

പുകവലി നിർത്തി 72 മണിക്കൂർ കഴിയുമ്പോൾ ശരീരത്തിൽ പ്രധാനപ്പെട്ട മാറ്റങ്ങൾ സംഭവിക്കാം. ശരീരത്തിലെ നിക്കോട്ടിന്റെ അളവ് ഗണ്യമായി കുറയുകയും ശ്വസനം കൂടുതൽ എളുപ്പമാകുകയും ചെയ്യും.

നാലാം ദിവസം: ഉറക്കത്തിലും മാനസികാവസ്ഥയിലും മാറ്റങ്ങൾ

പുകവലി ഉപേക്ഷിക്കുന്ന സമയത്ത് ചിലർക്ക് ഉറക്കക്കുറവ്, ദേഷ്യം, അസ്വസ്ഥത, മാനസിക സമ്മർദം എന്നിവ അനുഭവപ്പെടാം. ഇത് എല്ലാവരിലും ഒരുപോലെ ഉണ്ടാകണമെന്നില്ല. കൃത്യമായ ഉറക്ക സമയം പാലിക്കുന്നതും ലഘുവായ വ്യായാമത്തിൽ ഏർപ്പെടുന്നതും സഹായകരമാണ്.

പുകവലി നിർത്തി 96 മണിക്കൂർ, അതായത് നാല് ദിവസം കഴിയുമ്പോൾ ശരീരം വീണ്ടെടുക്കാനുള്ള പ്രക്രിയ തുടരുന്നു. ചിലർക്ക് ശ്വസനം കൂടുതൽ എളുപ്പമാകുന്നതായി അനുഭവപ്പെടാം. രുചിയും മണവും തിരിച്ചറിയാനുള്ള കഴിവിലും പുരോഗതി ഉണ്ടായേക്കാം.

അഞ്ചാം ദിവസം: പുതിയ ശീലങ്ങൾ വളർത്താം

ചായ കുടിക്കുമ്പോഴും ഭക്ഷണശേഷവും സുഹൃത്തുക്കളോടൊപ്പം ഇരിക്കുമ്പോഴും സിഗരറ്റ് വലിക്കണമെന്ന് തോന്നുന്നുണ്ടോ? ഇത്തരം സാഹചര്യങ്ങൾ തിരിച്ചറിയുക.

സിഗരറ്റിന് പകരം ചെറിയൊരു നടത്തം, ആരോഗ്യകരമായ ലഘുഭക്ഷണം, പുകവലിക്കാത്ത സുഹൃത്തുക്കളോടൊപ്പം സമയം ചെലവഴിക്കൽ തുടങ്ങിയ ശീലങ്ങൾ പരീക്ഷിക്കാം. പുകവലി നിർത്തി അഞ്ച് ദിവസം കഴിയുമ്പോൾ രക്തത്തിലെ കാർബൺ മോണോക്സൈഡിന്റെ അളവ് സാധാരണ നിലയിലേക്ക് മടങ്ങിയിട്ടുണ്ടാകും. ഇതോടെ രക്തത്തിന് ഓക്സിജൻ വഹിക്കാനുള്ള ശേഷി മെച്ചപ്പെടുന്നു.

ആറാം ദിവസം: പണവും ആരോഗ്യവും സംരക്ഷിക്കാം

സിഗരറ്റ് വാങ്ങാൻ ദിവസവും ചെലവാക്കുന്ന തുക കണക്കാക്കിനോക്കൂ. ഉദാഹരണത്തിന്, ദിവസവും 100 രൂപ ചെലവാക്കുന്ന ഒരാൾക്ക് ആറു ദിവസം പുകവലി ഒഴിവാക്കിയാൽ 600 രൂപ ലാഭിക്കാം. ഈ പണം മറ്റൊരു ആവശ്യത്തിനായി മാറ്റിവയ്ക്കുന്നത് പുകവലി ഉപേക്ഷിക്കാനുള്ള പ്രചോദനമാകാം.

പുകവലി നിർത്തി ആറു ദിവസം കഴിയുമ്പോഴും ശരീരം വീണ്ടെടുക്കാനുള്ള പ്രക്രിയ തുടരുന്നു. സിഗരറ്റ് വലിക്കാനുള്ള ആഗ്രഹവും അസ്വസ്ഥതയും ചിലരിൽ തുടരാം. ഈ സമയത്ത് ശ്വാസം എടുക്കുന്നതിലും രുചിയും മണവും തിരിച്ചറിയുന്നതിലും മാറ്റങ്ങൾ അനുഭവപ്പെടാം.

ഏഴാം ദിവസം: ഒരാഴ്ചയുടെ നേട്ടം

ഏഴ് ദിവസം പുകവലിക്കാതെ പൂർത്തിയാക്കുന്നത് മികച്ച കാര്യമാണ്. എന്നാൽ ഒരാഴ്ചകൊണ്ട് ശ്വാസകോശം പൂർണമായി ശുദ്ധമാകുകയോ പുകവലിയുടെ എല്ലാ ദോഷങ്ങളും മാറുകയോ ചെയ്യില്ല. പുകവലി നിർത്തി ഒരാഴ്ച കഴിയുമ്പോൾ ശരീരം വീണ്ടെടുക്കാനുള്ള പ്രക്രിയ തുടരുന്നു.

സിഗരറ്റിനോടുള്ള ആഗ്രഹം ചിലരിൽ കുറഞ്ഞുതുടങ്ങാം, എന്നാൽ നിക്കോട്ടിൻ പിൻവലിക്കൽ ലക്ഷണങ്ങൾ തുടരാനും സാധ്യതയുണ്ട്. രുചിയും മണവും തിരിച്ചറിയുന്നതിൽ പുരോഗതി അനുഭവപ്പെടാം. ഒരാഴ്ചകൊണ്ട് ശ്വാസകോശം പൂർണമായി ശുദ്ധമാകില്ലെങ്കിലും, പുകവലി ഒഴിവാക്കുന്നത് തുടരുന്നത് ദീർഘകാല ആരോഗ്യത്തിന് ഗുണകരമാണ്.

ഓർക്കുക... പുകവലി ഉപേക്ഷിക്കാൻ ബുദ്ധിമുട്ടുണ്ടെങ്കിൽ ഡോക്ടറുടെ സഹായം തേടാം. നിക്കോട്ടിൻ പാച്ച്, ഗം, കൗൺസലിങ് തുടങ്ങിയ മാർഗങ്ങൾ പുകവലി ഉപേക്ഷിക്കാൻ സഹായിച്ചേക്കാം. ഒരാഴ്ച ഒരു തുടക്കം മാത്രമാണ്, പുകവലി ഒഴിവാക്കുന്നത് തുടരൂ, ആരോഗ്യം സംരക്ഷിക്കൂ.