പ്രണയിക്കാൻ മനുഷ്യർക്ക് പ്രായം ഒരിക്കലും ഒരു തടസമല്ലെന്ന് തെളിയിക്കുന്ന ഒരു വിഡിയോയാണ് സോഷ്യൽമീഡിയയിൽ ഇപ്പോൾ ലൈക്കുകൾ വാരിക്കൂട്ടുന്നത്. നീണ്ട 60 വർഷത്തെ കാത്തിരിപ്പിന് ശേഷം 78-ാം വയസിൽ തന്റെ പ്രണയം കൂട്ടുകാരിയോട് തുറന്ന് പറയുന്ന ഒരു ഡോക്ടർ. അതിന് സാക്ഷ്യം വഹിക്കുന്നതോ യുഎസിലെ ടാമ്പാ വിമാനത്താവളം. സിനിമയിലെ ക്ലൈമാക്‌സ് സീൻ പോലെ വളരെ മധുരമുള്ള കാഴ്ചയായിരുന്നു അത്. 

പ്രണയം തുറന്ന് പറയാൻ വിമാനത്താവളത്തിൽ പൂക്കളുമായി കൂട്ടുകാരിയെ കാത്തു നിൽക്കുകയാണ് ഡോക്ടർ. അൽപ സമയത്തിനുള്ളിൽ ഡോക്ടറുടെ അടുത്തേക്ക് വരുന്ന സ്ത്രീയെ കെട്ടിപ്പിടിച്ച് ഉമ്മ വെച്ച ശേഷം. പൂക്കൾ സമ്മാനിച്ചു പിന്നീട് നിലത്ത് മുട്ടിലിരുന്ന് ഒരു മോതിരം വെച്ചുനീട്ടി വിവാഹഭ്യർഥന നടത്തി. സ്കൂൾ കാലം മുതൽ ഡോക്ടർക്ക് നാൻസിയോട് പ്രണയമാണ്. എന്നാൽ പറയാൻ ധൈര്യം കിട്ടിയത് ഇപ്പോഴാണ്. 

‘നാൻസി, നീ എനിക്ക് എല്ലാമാണ്. വാക്കുകൾ കൊണ്ട് പറയാവുന്നതിലുമപ്പുറം ഞാൻ നിന്നെ സ്നേഹിക്കുന്നു. എന്റെ ഇനിയുള്ള ജീവിതം നിന്നോടൊപ്പം ജീവിക്കാൻ ഞാൻ ആഗ്രഹിക്കുന്നു. നിന്നെ ലോകത്തിലെ ഏറ്റവും സന്തോഷവതിയായ സ്ത്രീയാക്കണം. നാൻസി നീ എന്റെ സോൾമേറ്റ് ആവുമോ ?’– എന്ന് ഡോക്ടർ നാൻസിയോട് ചോദിച്ചു.

നാൻസിയുടെ സമ്മതം കിട്ടിയതോടെ ഡോക്‌‍ടർ സന്തോഷം കൊണ്ട് ചാടി. ചുറ്റുമുള്ളവർ ഇരുവരെയും കയ്യടിച്ച് പ്രോത്സഹിപ്പിച്ചു. വിഡിയോയ്‌ക്ക് താഴെ നിരവധി പേരാണ് ആശംസകൽ അറിയിച്ച് കമന്റ് ചെയ്‌തത്.