ഇടുക്കി: കേന്ദ്ര വനം-പരിസ്ഥിതി മന്ത്രാലയത്തിന്റെ പരിസ്ഥിതി ലോല മേഖലാ (ഇ.എസ്.എ) കരട് വിജ്ഞാപനവുമായി ബന്ധപ്പെട്ട് ഉയർന്നിട്ടുള്ള കർഷക ആശങ്കകൾ പരിഹരിക്കണമെന്നാവശ്യപ്പെട്ട് ഇടുക്കി ജില്ലയിലെ പഞ്ചായത്തുകളിൽ പ്രത്യേക ഗ്രാമസഭകൾ ചേർന്ന് പ്രമേയം പാസ്സാക്കി. ജില്ലയിലെ മുപ്പതോളം പഞ്ചായത്തുകളിൽ ഒരേ സമയത്താണ് അടിയന്തര ഗ്രാമസഭകൾ ചേർന്ന് കേന്ദ്ര സർക്കാരിനെതിരെ പ്രമേയം പാസ്സാക്കിയത്. ജില്ലയിലെ ആകെയുള്ള 52 ഗ്രാമപഞ്ചായത്തുകളിലും പ്രമേയം പാസ്സാക്കി കേന്ദ്ര സർക്കാരിന് സമർപ്പിക്കാനാണ് ജനപ്രതിനിധികളുടെ തീരുമാനം.

ചില പഞ്ചായത്തുകളിൽ കഴിഞ്ഞ ദിവസം തന്നെ പ്രമേയം പാസാക്കിയിരുന്നു. ബാക്കിയുള്ള പഞ്ചായത്തുകളിൽ ഈ മാസം 25-ന് മുൻപായി ഗ്രാമസഭകൾ ചേർന്ന് പ്രമേയം അംഗീകരിക്കും. സാധാരണക്കാരുടെ ജനവാസ മേഖലകൾ, കൃഷിഭൂമി, തോട്ടങ്ങൾ എന്നിവയെ പരിസ്ഥിതി ലോല നിയന്ത്രണങ്ങളുടെ പരിധിയിൽനിന്ന് പൂർണ്ണമായും ഒഴിവാക്കണമെന്നാണ് ഗ്രാമസഭകളിലൂടെ ഉയർന്ന പ്രധാന ആവശ്യം. കേന്ദ്ര സർക്കാർ പുറപ്പെടുവിച്ച ഏറ്റവും പുതിയ കരട് വിജ്ഞാപന പ്രകാരം സംസ്ഥാനത്തെ 131 വില്ലേജുകളാണ് പരിസ്ഥിതി ലോല നിയന്ത്രണ മേഖലയിൽ ഉൾപ്പെട്ടിട്ടുള്ളത്. ഇതിൽ 51 വില്ലേജുകളും ഇടുക്കി ജില്ലയിലാണ് സ്ഥിതി ചെയ്യുന്നത്. കർഷകരും സാധാരണക്കാരും തിങ്ങിപ്പാർക്കുന്ന ജനവാസ മേഖലകളായ 28 വില്ലേജുകളെ നിയന്ത്രണ പട്ടികയിൽ നിന്ന് ഒഴിവാക്കണമെന്ന് കേരള സർക്കാർ നേരത്തെ തന്നെ കേന്ദ്രത്തോടും പശ്ചിമഘട്ട വിദഗ്ദ്ധ സമിതിയോടും ഔദ്യോഗികമായി ആവശ്യപ്പെട്ടിരുന്നു. എന്നാൽ സംസ്ഥാനത്തിന്റെ ഈ ന്യായമായ ആവശ്യം പൂർണ്ണമായും തള്ളിക്കളഞ്ഞുകൊണ്ടാണ് കേന്ദ്രം പുതിയ കരട് വിജ്ഞാപനം പുറത്തിറക്കിയിരിക്കുന്നത്.

സംസ്ഥാന സർക്കാരും കർഷക സംഘടനകളും മുന്നോട്ടുവെച്ച നിർദ്ദേശങ്ങളും ജനങ്ങളുടെ ആശങ്കകളും ഒട്ടും പരിഗണിക്കാതെ ഏകപക്ഷീയമായി വിജ്ഞാപനം പുറത്തിറക്കിയതിൽ പ്രതിഷേധിച്ച് ഇടുക്കി ജില്ലാ പഞ്ചായത്ത് പ്രസിഡന്റ്സ് അസോസിയേഷന്റെ നേതൃത്വത്തിലാണ് ശക്തമായ പ്രക്ഷോഭ പരിപാടികൾക്ക് രൂപം നൽകിയിരിക്കുന്നത്. ഗ്രാമസഭാ പ്രമേയങ്ങൾക്ക് പുറമെ വരും ദിവസങ്ങളിൽ കേന്ദ്ര സർക്കാരിന് മേൽ സമ്മർദ്ദം ശക്തമാക്കുന്നതിനുള്ള തുടർ സമരപരിപാടികളിലേക്ക് കടക്കാനാണ് തദ്ദേശസ്ഥാപനങ്ങളുടെ തീരുമാനം.