കണ്ണൂർ: മറ്റൊരാളുമായി ബന്ധമുണ്ടെന്ന സംശയത്തെ തുടർന്ന് ഭാര്യയെ കഴുത്തുഞെരിച്ചു കൊലപ്പെടുത്തിയ അസം സ്വദേശി പൊലീസിൽ കീഴടങ്ങി. അസം സ്വദേശിയായ റഫീജുൽ ഇസ്‌ലാം (29) ആണ് ഭാര്യ സജദ ഖാത്തുവിനെ (23) കൊലപ്പെടുത്തിയത്. ചൊവ്വാഴ്ച രാത്രി പതിനൊന്നരയോടെ ചിറ്റാരിപ്പറമ്പിൽ ചെള്ളത്ത് വയലിലെ വാടകവീട്ടിലാണ് ദാരുണ സംഭവം നടന്നത്. കൊലപാതകത്തിന് ശേഷം സ്റ്റേഷനിൽ ഹാജരായ പ്രതിയെ കണ്ണവം പൊലീസ് കസ്റ്റഡിയിലെടുക്കുകയായിരുന്നു.

ചൊവ്വാഴ്ച രാത്രി ഇരുവരും തമ്മിൽ വഴക്കുണ്ടായതായി അയൽവാസികൾ പൊലീസിന് മൊഴി നൽകിയിട്ടുണ്ട്. സംഭവസ്ഥലത്തുനിന്നും രാത്രിയിൽ ശബ്ദം കേട്ടിരുന്നതായും നാട്ടുകാർ പറയുന്നു. ചിറ്റാരിപ്പറമ്പിൽ തൊഴിലാളിയായി ജോലി ചെയ്തുവരികയായിരുന്നു റഫീജുൽ ഇസ്‌ലാം. കഴിഞ്ഞ ഒരാഴ്ചയായി ദമ്പതികൾ തമ്മിൽ കുടുംബവഴക്കും അസ്വാരസ്യങ്ങളും നിലനിന്നിരുന്നതായി അയൽവാസികൾ വ്യക്തമാക്കിയിട്ടുണ്ട്. ഭാര്യയുമായി താൻ ഏറെക്കാലമായി അകൽച്ചയിലായിരുന്നുവെന്നാണ് പ്രതി പൊലീസിന് നൽകിയ മൊഴി.

കൊല ചെയ്യപ്പെട്ട സജദ ഖാത്തുവിന്റെ മൃതദേഹം ആശുപത്രി മോർച്ചറിയിലേക്ക് മാറ്റി. പോസ്റ്റ്‌മോർട്ടം നടപടികൾ പൂർത്തിയാക്കിയ ശേഷവും, ആസാമിൽ നിന്നും ബന്ധുക്കൾ എത്തിയതിനു ശേഷവും മൃതദേഹം വിട്ടുനൽകും. ദമ്പതികൾക്ക് രണ്ടര വയസ്സുള്ള ഒരു കുട്ടി കൂടിയുണ്ട്. സംഭവത്തിൽ കണ്ണവം പൊലീസ് തുടർനടപടികൾ സ്വീകരിച്ചുവരികയാണ്.