കണ്ണൂര്‍: തളിപ്പറമ്പില്‍ കിണറ്റില്‍ ചാടിയ യുവതിയെ മരിച്ച നിലയില്‍ കണ്ടെത്തി. ചവനപ്പുഴ അങ്കണവാടിക്ക് സമീപം കരിയാപ്പത്ത് വീട്ടില്‍ ചിത്രലേഖയാണ് മരിച്ചത്. 40 വയസായിരുന്നു. രക്ഷിക്കാന്‍ ചാടിയ അമ്മ ലക്ഷ്മികുട്ടി(65)ക്ക് ഗുരുതര പരിക്കേറ്റു. ഇവരെ പരിയാരത്തെ കണ്ണൂര്‍ ഗവ. മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

വ്യാഴാഴ്ച പുലര്‍ച്ചെ അഞ്ചരയോടെയാണ് മാനസികാസ്വാസ്ഥ്യമുള്ള യുവതി കിണറ്റില്‍ ചാടിയത്. മണിക്കൂറുകള്‍ക്ക് ശേഷം ഉച്ചതിരിഞ്ഞ് മൂന്നരയോടെയാണ് സംഭവം അയല്‍ വാസികള്‍ അറിയുന്നത്. നാട്ടുകാര്‍ അറിയിച്ചതിനെ തുടര്‍ന്ന് തളിപ്പറമ്പ് അഗ്നിശമന നിലയത്തില്‍ നിന്നും എത്തിയ സംഘമാണ് ഇരുവരെയും പുറത്തെടുത്തത്. സംഭവത്തില്‍ പൊലീസ് വിശദമായ അന്വേഷണം നടത്തിവരികയാണ്.