കാസർഗോഡ്: ഉപ്പളയ്ക്കടുത്ത് പൈവളികെ പഞ്ചായത്തിലെ അതിർത്തി ഗ്രാമമായ ജോടുകല്ലിൽ പൊതുമരാമത്ത് വകുപ്പിന്റെസ്ഥലത്ത് നിർമ്മിച്ച പന്തൽ പൊളിച്ചുമാറ്റാനുള്ള അധികൃതരുടെ നീക്കത്തിനെതിരെ പ്രതിഷേധം ശക്തം. പന്തൽ പൊളിക്കുന്നത് തടയാൻ ഹൈന്ദവ സംഘടനകളുടെയും ബിജെപിയുടെയും നേതൃത്വത്തിൽ സ്ഥലത്ത് പ്രാർത്ഥനകളും രാപ്പകൽ ഭജനയും ആരംഭിച്ചതോടെ പ്രദേശം അതീവ സംഘർഷഭരിതമായി. സ്ഥിതിഗതികൾ ശാന്തമാക്കാൻ പ്രദേശത്ത് വൻ പൊലീസ് സന്നാഹമാണ് ക്യാമ്പ് ചെയ്യുന്നത്.

പൈവളികെ പഞ്ചായത്തിലെ ജോടുകല്ലിലുള്ള തരിശുഭൂമിയിൽ വർഷങ്ങളായി ഗണേശ ചതുർത്ഥി, ശ്രീകൃഷ്ണ ജന്മാഷ്ടമി തുടങ്ങിയ ഉത്സവങ്ങൾക്ക് വിഗ്രഹങ്ങൾ പ്രതിഷ്ഠിച്ച് ആരാധന നടത്തിവരാറുണ്ട്. കുറച്ചുകാലം മുൻപാണ് ഇവിടെ ഇരുമ്പ് തൂണുകളും ഷീറ്റുകളും ഉപയോഗിച്ച് സ്ഥിരം പന്തൽ നിർമ്മിച്ചത്.

ബിജെപി-മുസ്ലിം ലീഗ് തർക്കം; പൊളിക്കാൻ കോടതി ഉത്തരവ്

കഴിഞ്ഞ സെപ്റ്റംബറിലെ ഗണേശ ചതുർത്ഥി ആഘോഷങ്ങൾക്കിടെയാണ് തർക്കങ്ങളുടെ തുടക്കം. ജോടുകല്ലിലെ പിഡബ്ല്യുഡി ഭൂമിയിൽ അനധികൃതമായി പന്തൽ നിർമ്മിച്ചതിനെതിരെ മുസ്ലിം ലീഗ് രംഗത്തെത്തുകയും, മഞ്ചേശ്വരത്തെ പി.ഡബ്ല്യു.ഡി ഓഫീസിൽ വെച്ച് ബിജെപി - മുസ്ലിം ലീഗ് പ്രവർത്തകർ തമ്മിൽ കയ്യാങ്കളിയുണ്ടാവുകയും ചെയ്തിരുന്നു. ലീഗിന്റെ പരാതിയെത്തുടർന്ന് പൊതുമരാമത്ത് വകുപ്പ് പ്രാദേശിക ബിജെപി നേതൃത്വത്തിന് നോട്ടീസ് അയച്ചു.

ഇതിനിടെ, പന്തലിന് പഞ്ചായത്തിന്റെ ലൈസൻസോ മറ്റ് അനുമതികളോ ഇല്ലെന്ന് ചൂണ്ടിക്കാട്ടി പ്രദേശവാസിയായ ഒരാൾ കോടതിയെ സമീപിച്ചു. കോടതി ഉത്തരവ് വന്നതോടെ പന്തൽ പൊളിച്ചുമാറ്റാൻ അധികൃതർ തീരുമാനിക്കുകയായിരുന്നു.

'നിയമവാഴ്ച ഭൂരിപക്ഷത്തിന് മാത്രമോ?': വജ്രദേഹി മഠാധിപതി

പന്തൽ പൊളിക്കാനുള്ള നീക്കത്തിൽ പ്രതിഷേധിച്ച് ഞായറാഴ്ച പന്തലിന് കീഴിൽ ബിജെപിയുടെയും വിവിധ ഹിന്ദു സംഘടനകളുടെയും നേതൃത്വത്തിൽ യോഗം ചേർന്നു. ദക്ഷിണ കന്നഡയിലെ ഗുരുപുര ശ്രീ വജ്രദേഹി മഠാധിപതി ശ്രീ രാജശേഖരാനന്ദ സ്വാമിജി യോഗത്തിൽ അധ്യക്ഷത വഹിച്ചു. ആരാധനയ്ക്കായി തയ്യാറാക്കിയ പന്തൽ പൊളിക്കാൻ അനുവദിക്കില്ലെന്ന് അദ്ദേഹം മുന്നറിയിപ്പ് നൽകി.

സംസ്ഥാനത്തുടനീളം സ്വകാര്യ വ്യക്തികളും വിവിധ സാമുദായിക-മത സംഘടനകളും സർക്കാർ ഭൂമി കൈയേറിയിരിക്കുമ്പോൾ, ഉത്സവങ്ങൾക്കായി മാത്രം നിർമ്മിച്ച ഒരു ഷെഡ്ഡ് പൊളിക്കാൻ തിടുക്കം കൂട്ടുന്നത് എന്തിനാണെന്ന് അദ്ദേഹം ചോദിച്ചു. മതേതരത്വവും നിയമവാഴ്ചയും ഭൂരിപക്ഷ സമുദായത്തിന് മാത്രം ബാധകമാകുന്ന ഒന്നാണോയെന്നും സ്വാമിജി അഭിപ്രായപ്പെട്ടു. തുടർന്ന് പന്തൽ സംരക്ഷിക്കുന്നതിനായി ആക്ഷൻ കമ്മിറ്റിയും രൂപീകരിച്ചു.

രാമനാമ താരക യജ്ഞവും ഭജനയും; ചർച്ചയ്ക്ക് മുതിർന്ന് പൊലീസ്

തിങ്കളാഴ്ച പന്തൽ പൊളിക്കാൻ അധികൃതർ എത്തിയേക്കുമെന്ന വിവരത്തെത്തുടർന്ന് രാവിലെ മുതൽ പന്തലിൽ ‘ശ്രീ രാമനാമ താരക യജ്ഞം’ ആരംഭിച്ചു. തുടർന്ന് അനിശ്ചിതകാല ഭജനയും തുടങ്ങി. വിഷയം ശാശ്വതമായി പരിഹരിക്കാതെ പിന്മാറില്ലെന്ന് ആക്ഷൻ കമ്മിറ്റി സെക്രട്ടറി ലോകേഷ് നോണ്ട വ്യക്തമാക്കി. കഴിഞ്ഞ 57 വർഷമായി ഇവിടെ ഗണേശ ചതുർത്ഥി ആഘോഷങ്ങൾ നടക്കുന്നുണ്ടെന്ന് ബിജെപി ജില്ലാ വൈസ് പ്രസിഡന്റ് മണികണ്ഠ റായ് ചൂണ്ടിക്കാട്ടി. ഉത്സവങ്ങൾക്ക് മാത്രമല്ല, പൾസ് പോളിയോ പോലുള്ള സർക്കാരിന്റെ ആരോഗ്യ പ്രവർത്തനങ്ങൾ വരെ ഈ പന്തലിൽ വെച്ചാണ് നടത്തിയിട്ടുള്ളത്. മുസ്ലിം ലീഗിന് അനുകൂലമായി ചില രേഖകൾ വളച്ചൊടിച്ച് കോടതിയിൽനിന്ന് ഉത്തരവ് വാങ്ങുകയായിരുന്നുവെന്നും അദ്ദേഹം ആരോപിച്ചു.

പ്രദേശത്ത് സംഘർഷ സാധ്യത നിലനിൽക്കുന്നതിനാൽ ഡിവൈഎസ്പി ഉൾപ്പെടെയുള്ള ഉന്നത പൊലീസ് ഉദ്യോഗസ്ഥരുടെ നേതൃത്വത്തിൽ വൻ പൊലീസ് സംഘം സ്ഥലത്ത് തമ്പടിച്ചിട്ടുണ്ട്. പ്രശ്നം സമാധാനപരമായി പരിഹരിക്കുന്നതിനായി പൊലീസ് ഉദ്യോഗസ്ഥർ ആക്ഷൻ കമ്മിറ്റി ഭാരവാഹികളുമായി അനുരഞ്ജന ചർച്ചകൾ നടത്തിവരികയാണ്.