വടക്കഞ്ചേരി:സാധാരണ ഓട്ടോറിക്ഷകൾക്ക് അനുവദിക്കുന്ന സൗജന്യ ടോൾ പാസ് നാലുചക്ര ഓട്ടോറിക്ഷകൾക്കും അനുവദിക്കണമെന്നാവശ്യപ്പെട്ട് പന്നിയങ്കര ടോൾ പ്ലാസയിൽ ഉപരോധ സമരം. പന്തലാംപാടം സംയുക്ത സമരസമിതിയുടെയും കേരള വ്യാപാരി വ്യവസായി ഏകോപന സമിതി (കെവിവിഇഎസ്) വടക്കഞ്ചേരി യൂണിറ്റിന്റെയും നേതൃത്വത്തിലായിരുന്നു സമരം.

ചൊവ്വാഴ്ച രാവിലെ പത്തു മണിയോടെ ടോൾ പ്ലാസയിലെത്തിയ സമരക്കാർ ആറോളം ട്രാക്കുകൾക്ക് മുന്നിലായി നാലുചക്ര ഓട്ടോറിക്ഷകൾ കുറുകെയിട്ട് ഗതാഗതം തടസ്സപ്പെടുത്തുകയായിരുന്നു. ഇതോടെ ദേശീയപാതയിൽ വാഹനങ്ങളുടെ നീണ്ട നിര രൂപപ്പെടുകയും ഗതാഗതം സ്തംഭിക്കുകയും ചെയ്തു. തുടർന്ന് വടക്കഞ്ചേരി പൊലീസ് സ്ഥലത്തെത്തി സമരക്കാരുമായി ചർച്ച നടത്തിയാണ് ഭാഗികമായി വാഹനങ്ങൾ കടത്തിവിട്ടത്. ഒരു മണിക്കൂറോളം നീണ്ട ഉപരോധത്തിനൊടുവിൽ പ്രവർത്തകർ താൽക്കാലികമായി സമരം അവസാനിപ്പിച്ചു.

പ്രദേശവാസികളുടെ സൗജന്യ ടോൾ പാസ് പുതുക്കൽ നടപടികൾ ഒറ്റത്തവണയായി മാറ്റുക, ഒന്നിലധികം വാഹനങ്ങളുള്ള നാട്ടുകാർക്ക് ന്യായമായ സൗജന്യ പാസ് നൽകുക, പുതിയതും പഴയതുമായ വാഹനങ്ങളുടെ പാസ് അപേക്ഷകൾ കാലതാമസമില്ലാതെ വേഗത്തിൽ തീർപ്പാക്കുക, നാലുചക്ര ഓട്ടോറിക്ഷകൾക്ക് അർഹമായ സൗജന്യ പാസ് ഉടൻ അനുവദിക്കുക എന്നീ പ്രധാന ആവശ്യങ്ങളാണ് സമരസമിതി മുന്നോട്ടുവെച്ചത്. ന്യായമായ ആവശ്യങ്ങൾ അംഗീകരിച്ചില്ലെങ്കിൽ വരും ദിവസങ്ങളിൽ ടോൾ പ്ലാസ കേന്ദ്രീകരിച്ച് അനിശ്ചിതകാല പ്രക്ഷോഭം ആരംഭിക്കുമെന്നും നേതാക്കൾ മുന്നറിയിപ്പ് നൽകി.

ഉപരോധ സമരത്തിൽ പന്തലാംപാടം സംയുക്ത സമരസമിതി കൺവീനർ ജോർസി ജോസഫ് അധ്യക്ഷത വഹിച്ചു. കേരള വ്യാപാരി വ്യവസായി ഏകോപന സമിതി വടക്കഞ്ചേരി യൂണിറ്റ് സെക്രട്ടറി സിജു എം.ടി. സമരം ഉദ്ഘാടനം ചെയ്തു. പന്തലാംപാടം സംയുക്ത സമരസമിതി നേതാവ് സുരേന്ദ്രൻ സി.സി. സ്വാഗതവും ഗംഗാധരൻ വി. നന്ദിയും പറഞ്ഞു.