ഗുരുവായൂർ: ഗുരുവായൂർ ദേവസ്വം ഓഡിറ്റോറിയങ്ങളുടെ വാടക വർദ്ധനവ് ഭരണസമിതി പിൻവലിച്ചു. ഇന്ന് ചേർന്ന ദേവസ്വം ഭരണസമിതി യോഗത്തിലാണ് ഇതുസംബന്ധിച്ച തീരുമാനം ഉണ്ടായത്. മേൽപ്പത്തൂർ ഓഡിറ്റോറിയത്തിനും ശ്രീ ഗുരുവായൂരപ്പൻ ഓഡിറ്റോറിയത്തിനും ഏർപ്പെടുത്തിയിരുന്ന ഉയർന്ന നിരക്ക് ഒഴിവാക്കി, പഴയ നിരക്കായ 5,900 രൂപയായി തന്നെ നിലനിർത്താൻ തീരുമാനിക്കുകയായിരുന്നു.

നേരത്തെ വാടക 11,800 രൂപയായി ഉയർത്തിയത് വലിയ തോതിലുള്ള പ്രതിഷേധങ്ങൾക്ക് കാരണമായിരുന്നു. തുടർന്നാണ് ഭരണസമിതി പുനഃപരിശോധന നടത്തി നിരക്ക് പഴയതുപോലെ കുറച്ചത്. കൂടാതെ, പുതിയ നിരക്കായ 11,800 രൂപ അടച്ച് ഇതിനകം ഓഡിറ്റോറിയം ബുക്ക് ചെയ്തവരുടെ അധിക തുക തിരിച്ചു നൽകുമെന്നും ദേവസ്വം അധികൃതർ അറിയിച്ചിട്ടുണ്ട്.