''പുന്നാര മോനെ
ലോകത്തെന്തെല്ലാം നടക്കുന്നു?''

''ഒന്നുമറിയില്ലച്ഛാ...
എന്തൊക്കെ നടക്കുന്നു
നമുക്കെന്താ...?''

''പുന്നാര മോനെ
രാജ്യത്തെന്തൊക്കെ നടക്കുന്നു?''

''ഒന്നുമറിയില്ലച്ഛാ
എന്തൊക്കെയോ നടക്കുന്നു
നമുക്കെന്താ...?''

''പുന്നാര മോനെ
നാട്ടിലെന്തൊക്കെ നടക്കുന്നു?''

''ഒന്നുപോ അച്ഛാ
നമുക്കെന്താ...?''

''പുന്നാര മോനെ
നീ എന്തെടുക്കുന്നു...?''

''കുറേ സിംഹങ്ങള്‍
ഒരു കലമാനിനെ
വളഞ്ഞിട്ട് ആക്രമിക്കുന്നത്
Fb-യില്‍ കാണുന്നു...''

''പുന്നാര മോനെ
ആകാശം ഒരു സുനാമിയായി
ഭൂമിയെ വിഴുങ്ങാന്‍ വരുന്നത് ഞാന്‍ കാണുന്നു.
അതിന് നിന്റെ വേഗങ്ങള്‍ക്ക് എത്താന്‍ കഴിയാത്ത വേഗം
നീയത് കാണുന്നോ...''

''ഇല്ലച്ഛാ
എന്റെ മുഖം
ഈ സ്മാര്‍ട്ട്‌ഫോണില്‍ കുടുങ്ങിയിരിക്കുന്നു
ഊരുവാന്‍ കഴിയുന്നില്ല... രക്ഷിക്കൂ...''