'രോമാഞ്ചം', 'ആവേശം' എന്നീ ഹിറ്റ് ചിത്രങ്ങൾക്ക് ശേഷം ജിത്തു മാധവൻ സംവിധാനം ചെയ്യുന്ന സൂര്യ ചിത്രം 'സീൻ' റിലീസിന് ഒരുങ്ങുന്നു. ചിത്രത്തിന്റെ കേരളത്തിലെ അഡ്വാൻസ് ബുക്കിങ് ഇന്ന് (നവംബർ 3) വൈകിട്ട് ഏഴ് മണിക്ക് ആരംഭിക്കും. നവംബർ ആറിന് ദീപാവലി റിലീസായി ആഗോളതലത്തിൽ ചിത്രം തിയേറ്ററുകളിലെത്തും. ശ്രീ ഗോകുലം മൂവീസാണ് ചിത്രം കേരളത്തിൽ പ്രദർശനത്തിനെത്തിക്കുന്നത്.

ഡിഎസ്പി ഇമ്പരാജ് എന്ന പൊലീസ് ഉദ്യോഗസ്ഥനായാണ് സൂര്യ ചിത്രത്തിൽ എത്തുന്നത്. മലയാളി താരം നസ്‌ലൻ ഈശ്വരൻ എന്ന കഥാപാത്രത്തെ അവതരിപ്പിക്കുന്നു. നസ്രിയ നസീമും ചിത്രത്തിൽ പ്രധാന വേഷത്തിലുണ്ട്. സൂര്യയുടെ സ്റ്റൈലിഷ് മാസ് അവതാരവും നസ്‌ലന്റെയും നസ്രിയയുടെയും സാന്നിധ്യവും ചിത്രത്തെക്കുറിച്ചുള്ള പ്രതീക്ഷകൾ വർധിപ്പിക്കുന്നുണ്ട്. നേരത്തെ പുറത്തിറങ്ങിയ നസ്‌ലന്റെ ക്യാരക്ടർ ടീസറും ശ്രദ്ധ നേടിയിരുന്നു.

'സീനി'ന്റെ ട്രെയ്‌ലർ ഇതിനോടകം പ്രേക്ഷകർക്കിടയിൽ ചർച്ചയായിട്ടുണ്ട്. ആക്ഷൻ രംഗങ്ങൾക്കും കോമഡിക്കും ത്രില്ലറിനും പ്രാധാന്യം നൽകുന്ന ചിത്രമായിരിക്കും ഇതെന്ന സൂചനയാണ് ട്രെയ്‌ലർ നൽകുന്നത്. ജിത്തു മാധവന്റെ പതിവ് ശൈലിയിലുള്ള നർമവും സൂര്യയുടെ മാസ് പ്രകടനവും ഒരുമിക്കുന്ന ചിത്രത്തിനായി കാത്തിരിക്കുകയാണ് ആരാധകർ.

ജിത്തു മാധവനും സംഗീത സംവിധായകൻ സുഷിൻ ശ്യാമും വീണ്ടും ഒന്നിക്കുന്നു എന്ന പ്രത്യേകതയും 'സീനി'നുണ്ട്. സുഷിൻ ശ്യാം ആദ്യമായി സംഗീത സംവിധാനം നിർവഹിക്കുന്ന തമിഴ് ചിത്രം കൂടിയാണിത്. സോണി മ്യൂസിക് സൗത്താണ് ചിത്രത്തിന്റെ സംഗീതാവകാശം സ്വന്തമാക്കിയിരിക്കുന്നത്.

ഴഗരം സ്റ്റുഡിയോസിന്റെയും 2ഡി എന്റർടെയ്ൻമെന്റിന്റെയും ബാനറിൽ ജ്യോതികയും സൂര്യയും ചേർന്നാണ് ചിത്രം നിർമിക്കുന്നത്. ജയശ്രീ ദാമോദരനാണ് സഹനിർമാതാവ്. ശ്രീ ഗോകുലം ഗോപാലന്റെ ഉടമസ്ഥതയിലുള്ള ശ്രീ ഗോകുലം മൂവീസ് കേരളത്തിൽ ചിത്രം മെഗാ റിലീസായി എത്തിക്കും. കേരളത്തിലെ വിതരണാവകാശം ഡ്രീം ബിഗ് ഫിലിംസിനാണ്.

മാസ് ആക്ഷൻ, കോമഡി, ത്രില്ലർ ഘടകങ്ങൾ കോർത്തിണക്കിയ 'സീൻ' ദീപാവലി റിലീസായി എത്തുമ്പോൾ ബോക്സ് ഓഫീസിൽ വലിയ പ്രതീക്ഷകളാണ് അണിയറപ്രവർത്തകർക്ക്. സൂര്യയുടെ പൊലീസ് വേഷവും ജിത്തു മാധവന്റെ സംവിധാനവും നസ്‌ലൻ-നസ്രിയ കൂട്ടുകെട്ടും ചിത്രത്തിന്റെ പ്രധാന ആകർഷണങ്ങളാകുമെന്നാണ് പ്രതീക്ഷ.

ഛായാഗ്രഹണം: വിനീത് അഗസ്റ്റ്യൻ, സംഗീതം: സുഷിൻ ശ്യാം, എഡിറ്റർ: അജ്മൽ സാബു, ഓഡിയോഗ്രഫി: വിഷ്ണു ഗോവിന്ദ്, പ്രൊഡക്ഷൻ ഡിസൈനർ: അശ്വിനി കാലെ, ആക്ഷൻ ഡയറക്ടർ: ചേതൻ ഡി'സൂസ, ആർട്ട് ഡയറക്ടർ: എ. രാജേഷ്, കോസ്റ്റ്യൂം ഡിസൈനർ: മഷാർ ഹംസ, മേക്കപ്പ്: റോണക്സ് സേവ്യർ, തമിഴ് സംഭാഷണങ്ങൾ: ഡേവിഡ് സെൽവം, കോ-ഡയറക്ടർ: അരുൺ അപ്പുക്കുട്ടൻ, എക്സിക്യൂട്ടീവ് പ്രൊഡ്യൂസർ: എം.പി. സെന്തിൽ, ചീഫ് എക്സിക്യൂട്ടീവ് ഓഫീസർ: സുഷ്മ കൃഷ്ണമൂർത്തി, പ്രൊഡക്ഷൻ എക്സിക്യൂട്ടീവ്: കെ. ശ്രീധർ രാജ്, സ്റ്റിൽസ്: രോഹിത് കെ. സുരേഷ്, കാസ്റ്റിംഗ് ഡയറക്ടർ: ഷിഫ്ന ബബിൻ പാക്കർ, വിഎഫ്എക്സ്: ഹരിഹരസുതൻ, കളറിസ്റ്റ്: രംഗ, ക്രിയേറ്റീവ് പ്രൊഡ്യൂസർ: നവീൻ നഞ്ജുണ്ടൻ, പിആർഒ: ശബരി.