മൂന്നാമത്തെ കുഞ്ഞിനെ നഷ്ടമായതിനെക്കുറിച്ച് നടി ആശ ശരത്. കുങ്കുമ്മപ്പൂവ് സീരിയിലില്‍ അഭിനയിക്കുന്നതിന് മുമ്പായിരുന്നു സംഭവം. അന്ന് താന്‍ കടന്നു പോയത് വല്ലാത്ത ട്രോമയിലൂടെയായിരുന്നുവെന്നാണ് ആശ ശരത് പറയുന്നത്. ധന്യ വര്‍മയ്ക്ക് നല്‍കിയ അഭിമുഖത്തിലാണ് ആശ ശരത് മനസ് തുറന്നത്. അന്ന് തനിക്ക് പിന്തുണയായി കൂടെ നിന്നത് ഭര്‍ത്താവാണെന്നും ആശ ശരത് പറയുന്നുണ്ട്.

''എനിക്ക് മൂന്ന് മക്കള്‍ വേണമെന്നായിരുന്നു. അമ്മുവും പങ്കുവും കുറച്ച് വലുതായ ശേഷം കുങ്കുമപ്പൂവില്‍ അഭിനയിക്കുന്നതിന് രണ്ട് വര്‍ഷം മുമ്പ് ഞാന്‍ ഗര്‍ഭിണിയായിരുന്നു. ആണ്‍കുട്ടിയായിരുന്നു. എന്നാല്‍ എട്ട് മാസം ആയപ്പോള്‍ ഉള്ളിലെ പ്ലാസന്റ പ്രീവിയര്‍ തിരിഞ്ഞ് വരണമല്ലോ. എനിക്ക് കുഞ്ഞിനെ നഷ്ടമായി. വൈകാരികമായി വല്ലാതെ വേദനിപ്പിക്കുന്നതായിരുന്നു. പ്രസവിക്കേണ്ടി വന്നു. നോര്‍മല്‍ പ്രസവത്തിന്റേതായ കലാപരിപാടികളൊക്കെയുണ്ടല്ലോ. നമ്മുടെ ആരോഗ്യ പ്രശ്‌നങ്ങളും മറ്റും. കുഞ്ഞും ഇല്ല. ഭയങ്കര ട്രോമയുടെ കാലഘട്ടമായിരുന്നു'' ആശ ശരത് പറയുന്നു.

''മൂന്ന് കുട്ടികളേയും പ്രസവിച്ചത് നാട്ടിലാണ്. 40 ദിവസം കഴിഞ്ഞ് തിരിച്ചു പോകും. ആ സമയത്ത് റേഡിയോയില്‍ ജോലി ചെയ്യുന്നുണ്ടായിരുന്നു. ജീവിതത്തില്‍ ജോലിയില്ലാതിരുന്നിട്ടില്ല. തിരിച്ചു പോകുമ്പോള്‍ കുട്ടികളേയും കൊണ്ടാണ് പോവുക. പങ്കുവിന് ഒരു വയസുള്ളപ്പോള്‍ ഞാന്‍ അമ്മുവിനെ ഗര്‍ഭം ധരിച്ചിട്ടുണ്ട്. ശരത്തേട്ടന് ആ സമയത്ത് ജോലിയാണ്. പിന്നെയാണ് ബിസിനസിലേക്ക് പോവുക. പ്രെഗ്നന്‍സിയുടെ ട്രോമയെക്കുറിച്ചൊന്നും ചിന്തിച്ചിട്ടില്ല. തിരക്കിലായിരുന്നു. എന്തൊക്കെ ട്രോമയിലൂടെയായിരിക്കും പോയതെന്ന് പിന്നീട് ചിന്തിച്ചിട്ടുണ്ട്. ആ സമയത്ത് ഏറ്റവും കൂടുതല്‍ പിന്തുണ നല്‍കേണ്ടത് ഭര്‍ത്താവാണ്.'' എന്നും ആശ ശരത് പറയുന്നു.

കുങ്കുമപ്പൂവ് പരമ്പരയിലൂടെയാണ് ആശ ശരത് താരമാകുന്നത്. പിന്നാലെ സിനിമയിലെത്തി. ദൃശ്യത്തില്‍ മോഹന്‍ലാലിന്റെ എതിരാളിയായി മിന്നും പ്രകടനം കാഴ്ചവച്ചതോടെ മലയാള സിനിമയിലെ സജീവസാന്നിധ്യമായി മാറി. ഇപ്പോഴിതാ ദൃശ്യം പരമ്പരയിലെ മൂന്നാം ഭാഗത്തിനായി കാത്തിരിക്കുകയാണ് ആശ ശരത്ത്.