നായകന് ശേഷം കമല്‍ ഹാസനും മണിരത്‌നവും ഒരുമിക്കുന്ന സിനിമ. ചിമ്പു, തൃഷ, ഐശ്വര്യ ലക്ഷ്മി, അഭിരാമി, ജോജു ജോര്‍ജ്, അലി ഫസല്‍, അശോക് ശെല്‍വന്‍ തുടങ്ങിയ വന്‍ താരനിര. എആര്‍ റഹ്മാന്‍, രവി കെ ചന്ദ്രന്‍, എ ശ്രീകര്‍ പ്രസാദ് തുടങ്ങിയ പ്രതിഭാധനര്‍ അണിയറയില്‍. എന്നിട്ടും തഗ് ലൈഫിന് (Thug Life) നേരിടേണ്ടി വന്നത് കനത്ത പരാജയമാണ്. വര്‍ഷങ്ങള്‍ക്ക് ശേഷമുള്ള കമലിന്റേയും മണിരത്‌നത്തിന്റേയും ഒത്തു ചേരല്‍ പ്രതീക്ഷക്കൊത്ത് ഉയര്‍ന്നില്ലെന്നാണ് ബോക്‌സ് ഓഫീസ് റിപ്പോര്‍ട്ടുകള്‍ വ്യക്തമാക്കുന്നത്.

'മലയാളി അല്ലേ, മരത്തിന് പിന്നിൽ നിന്ന് വസ്ത്രം മാറാൻ പറഞ്ഞു! ബച്ചൻ സാർ ഉടനെ പുറത്തിറങ്ങി ദേഷ്യപ്പെട്ടു'; സെറ്റിലെ ദുരനുഭവത്തെക്കുറിച്ച് ശോഭന

ഇപ്പോഴിതാ തഗ് ലൈഫിന്റെ പരാജയത്തിന്റെ കാരണം എന്തെന്ന് വിശദമാക്കുകയാണ് നടന്‍ ഭഗവതി പെരുമാള്‍. തഗ് ലൈഫില്‍ അഭിനയിക്കുകയും ചെയ്തിട്ടുണ്ട് ഭഗവതി പെരുമാള്‍. വര്‍ഷങ്ങള്‍ക്ക് ശേഷം കമല്‍ഹാസനും മണിരത്‌നവും ഒരുമിക്കുന്ന സിനിമ എന്ന നിലയിലുള്ള പ്രതീക്ഷയാണ് ചിത്രത്തിന്റെ പരാജയ കാരണമായി അദ്ദേഹം ചൂണ്ടിക്കാണിക്കുന്നത്. ഒരു ഓണ്‍ലൈന്‍ മാധ്യമത്തിന് നല്‍കിയ അഭിമുഖത്തിലാണ് ഭഗവതി പെരുമാള്‍ തന്റെ അഭിപ്രായം പങ്കുവച്ചത്.

''ആലോചിച്ച് നോക്കൂ, നായകന്‍ പോലൊരു കള്‍ട്ട് ക്ലാസിക് സമ്മാനിച്ചവരാണ്. അവര്‍ തിരിച്ചുവരവുമ്പോള്‍ പ്രേക്ഷകര്‍ക്ക് പ്രതീക്ഷയുണ്ടാകും. അതേ സമ്മര്‍ദ്ധം അവര്‍ക്കുമുണ്ടാകും. പ്രതീക്ഷയ്‌ക്കൊത്ത് ഉയരണമെന്ന് പോലുമില്ല, എന്‍ഗേജിംഗ് ആയി കഥ പറഞ്ഞാലും മതിയായിരുന്നു. പ്രധാന കഥ കമല്‍ സാറും തൃഷയും ചിമ്പുവും വരുന്ന ഭാഗമാണ്. പക്ഷെ അത് പ്രേക്ഷകരുമായി കണക്ട് ആയില്ല'' എന്നാണ് അദ്ദേഹം പറയുന്നത്.

ആരാധകരുടെ പ്രതികരണങ്ങളും കമന്റുകളുമൊക്കെ തനിക്ക് മനസിലാക്കാന്‍ സാധിക്കും. താന്‍ ഈ സിനിമയുടെ ഭാഗമായിരുന്നില്ലെങ്കില്‍ തന്റെ പ്രതികരണവും ഏതാണ്ട് അത് തന്നെയാകും. എന്നാല്‍ തനിക്കിത് ജീവിതകാലം മുഴുവന്‍ ഓര്‍ത്തിരിക്കാന്‍ സാധിക്കുന്ന അനുഭവമാണെന്നും ഭഗവതി പെരുമാള്‍ പറയുന്നുണ്ട്.

വാസ്‌കോ വന്നു, അടുത്തത് ഉദയന്‍, പിന്നാലെ ഇന്ദുചൂഡനോ വേലായുധനോ? ആരാധകര്‍ക്ക് വേണ്ട 'എല്‍ ക്ലാസിക്കുകള്‍'

ഒരുപക്ഷെ സിനിമ പറയാന്‍ ശ്രമിച്ചതും ആളുകളുടെ പ്രതീക്ഷയും ഒത്തു വന്നിട്ടുണ്ടാകില്ലെന്ന് അദ്ദേഹം ചൂണ്ടിക്കാണിക്കുന്നു. അതേസമയം കമല്‍ ഹാസന്‍ അടുത്ത സിനിമയിലേക്ക് കടന്നുവെന്നും നമ്മളാണ് ഇപ്പോഴും ഇതേക്കുറിച്ച് സംസാരിച്ചു കൊണ്ടിരിക്കുന്നതെന്നും ഭഗവതി പെരുമാള്‍ പറയുന്നു. തഗ് ലൈഫില്‍ നിന്നും താന്‍ പഠിച്ചത് ഫിലിം മേക്കിംഗ് എന്ന പ്രക്രിയയില്‍ നിന്നും കമല്‍ ഹാസനും മണിരത്‌നവും എങ്ങനെയാണ് ഊര്‍ജ്ജം കണ്ടെത്തുന്നത് എന്നാണെന്നും അദ്ദേഹം പറയുന്നുണ്ട്.

ജൂണ്‍ അഞ്ചിനായിരുന്നു തഗ് ലൈഫ് തിയറ്ററുകളിലേക്ക് എത്തിയത്. വലിയ പ്രതീക്ഷയോടെയാണ് ആരാധകര്‍ ചിത്രത്തെ വരവേറ്റത്. എന്നാല്‍ ആദ്യ ഷോയ്ക്ക് ശേഷം ചിത്രത്തിന് കനത്ത തിരിച്ചടി തന്നെ നേരിടേണ്ടി വന്നു. റിപ്പോര്‍ട്ടുകള്‍ പ്രകാരം ചിത്രത്തിന് അഞ്ച് ദിവസത്തില്‍ 55 കോടിയോളം രൂപ മാത്രമാണ് നേടാനായത്. നിരൂപകരില്‍ നിന്നും മോശം പ്രതികരണങ്ങളാണ് സിനിമയ്ക്ക് ലഭിച്ചത്.